VOV4.K’ho- Kờp tus mho ngai 18/10, càr Gia Lai neh cĭt vaccine rơcăng sơndră kòp Covid-19 ai mờr 301 rbô nă cau in. Tàm hơ̆, tàm ƀòn dờng Pleiku, khà cĭt ai cau rlau 18 sơnam in neh lơh geh rlau 80%. Tus 5 jiơ mho ngai 18/10, càr Gia Lai neh bơyai lơh cĭt ai rlau 300 rbô 900 nă cau in.

Tàm hơ̆, rlau 72 rbô 100 nă cau neh geh cĭt sir 2 ding mờ rlau 229 rbô nă cau neh geh cĭt ding dơ̆ 1. Bè hơ̆, tàm Gia Lai, tŭ do geh 31% khà cau bơh 18 sơnam rlau hơđang neh geh cĭt êt ngan là bơh dùl ding vaccine rơcăng sơndră kòp Covid-19. Ală tiah tàm càr geh khà cĭt vaccine uă ngan rlau jơh là ƀòn dờng Pleiku bal mờ 82%, thị xã Ayun Pa geh 40%, thị xã An Khê geh 29%. Mò Nguyễn Thị Thanh Lịch- Phó Chủ tịch Ủy ban Nhân dân càr Gia Lai pà gĭt, broă lam cĭt vaccine mhar là dùl tàm ală bơnàng jă kuơmàng nàng càr lam lơh broă rơndăp lơh pờ mpồng, bơtàu tơnguh wơl lơh sa- mpồl bơtiàn tàm tơngai tus.

Cau mblàng Lơ Mu K’Yến