VOV4.K’ho- Jơnau yal càr Gia Lai yal rơndăp broă dan tam gơl rơlao 8 rơbô lồ ù brê hòn is tàm xã tiah nhàr dà lơgar Ia Mơr, kơnhoàl Chư Prông gơs ù lơh sa suơn sre nàng lơh tiah tuh dà ai broă lơh bơtơ̆t rơbòng dà Ia Mơr in neh lơh broă mus kơl brê nàng geh ù lơh sa bơh làng bol kis tàm do gơguh uă sùm. Bơta do lơh broă atbồ, sền gàr brê tàm tiah do neh gơtìp kal ke, den tŭ do sơlơ kal ke rơlao.

Mìng tàm mang ngai 15 nhai 4, rơlao 3 rơbô 300 thơ̆k vuông brê tàm lô 1, khoảnh 1, bă brê 1001, bơnah mpồl atbồ brê rơcang gàr lài Ia Mơr (kơnhoàl Chư Prông), ngài mờ broă lơh tờm rơbòng bơtơ̆t dơng dà Ia Mơr pa lơh gơs di pơgăp 100 thơ̆k gùng sền par neh gơtìp chu ồs sa jơh. Tòm chi neh gơtìp kơl, cèng dơm chi, bơnah nggu gam gơtìp ồs sa.

Rơlao 3 sào brê rềp mờ rơbòng tờm bơh broă lơh bơtơ̆t rơbòng dà Ia Mơr geh gơtìp mus tàm 1 mang

Sền gròi tàm tiah do, ồng Nguyễn Tuấn Anh, Phó Chủ tịch UBND xã Ia Mơr pà gĭt, do là broă mus kơl chi brê nàng geh ai ù lơh sa. Tŭ do, mìng kờp is tàm xã Ia Mơr, làng bol geh tus 500 lồ mìr lơh sa geh bơrlŭ bal tàm brê hòn is jăt bơta mìr tàm brê. Mùl màl, broă sơgràm ù brê gơbàn bơh jŏ ngan mờ sùm bơh nam do tus nam tơnơ̆: “Bè gùng dà broă lơh, den làng bol sơgràm jăt kàl. Lài ngan pồng tòm, klò kơmhò gùt dar nàng tòm chi chơ̆t, tơnơ̆ mờ hơ̆ tam gar điều nàng tàm kàl tus là tòm điều geh hòn”.

Ồng Đinh Văn Khẩn, Kuang atbồ mpồl atbồ brê Ia Mơr, do là mpồl geh mờr 4 rơbô tàm 8 rơbô lồ brê hòn is gam geh yal mờ Quốc hội ai gơnoar tam gơl lơh gơs ù lơh sa nàng lơh tiah tuh dà bơh bơtơ̆t rơbòng dà Ia Mơr dê pà gĭt, bơh lồi nam 2020 tus tŭ do, broă sơgràm ù brê gơbàn uă ngan. Jăt mờ hơ̆, nhai 1, cau tờm brê gŏ 4 dơ̆, kờp jơh bă ù rơlao 5 sào, mơya tus lồi nhai 3, kờp jơh dơ̆ mus kơl neh tus 29 dơ̆, mờ kờp jơh bă brê gơtìp sơgràm mờr 4 lồ. Hơ̆ là jơnau kờp is ală dơ̆ geh jòi gŏ cau tìs. Gam bă brê dờng ndai neh gơtìp sơgràm mơya ờ gŏ gĭt cau lơi, cau mus kơl chi brê tŭ lơi kung tam dră wơl mờ mpồl sền gàr brê tŭ gơtìp gŏ. “Oh mi tŭ trồ mang, di lah gŏ, mờ mpồl lơh broă ờ gal cau den cau mus kơl lơh ndơ̆ muh măt, mìng lời geh măt sền, tê at pềs nàng sreh oh mi lơh broă. Di lah mpồl lòt lơh broă gal cau den ală cau do dô tàm brê, he ờ jòi gĭt cau. Tŭ do, oh mi tàm mpồl lơh broă mìng ơm 1 ngai tàm 1 poh, tàm ala bal sùm hơ̆ sồng geh ngai ơm”.

Uă bă brê tàm càr Gia Lai pơn jăt tai gơtìp mus kơl

Ồng Phạm Vũ Tú, Phó Chủ tịch UBND kơnhoàl Chư Prông pà gĭt, tàm tiah 8 rơbô lồ brê hòn is gam geh kơnhoàl yal mờ Quốc hội nàng tam gơl gơs ù lơh sa suơn sre lơh tiah tuh dà bơh bơtơ̆t rơbòng dà Ia Mơr, tŭ do geh 2 cau tờm brê mờ 1 tiah atbồ. Bơh lồi nam 2020 tus tŭ do, kơnhoàl neh crơng gơs tai mờ geh sùm lơh broă bơh 5 mpồl lơh broă ală gah, tàm hơ̆ geh mpồl ling sền gàr tiah nhàr dà lơgar, kuang àng, mpồl sền gàr brê pơgồp bal mờ cau tờm brê mờ gơnoar atbồ xã, lơh jăt broă sền gròi.

Mơya, do mìng là broă lơh ing, mờ kal ke ngan nàng kơrian geh jơh broă brê gơtìp sơgràm: “Ală mpồl lơh broă lơh ală anih sền gàr tàm ală tiah geh uă ngan, ală tiah di gơlan gơtìp roh brê uă. Bàr mpồl atbồ brê là cau tờm brê, ală xã geh brê pal lơh ngan tàm broă atbồ, sền gàr brê. Bè nùs nhơm, bol añ lơh ngan tàm broă gàr brê, mơya kal ke ngan”.

Tŭ ù brê bơnơm ờ hềt tam gơl, brê Ia Mơr neh gơtìp sơgràm uă ngan. Tŭ do di lah ờ geh broă lơh lơi nàng kơrian geh cồng nha, den ờ mìng bă brê gam dan tam gơl, mờ jơh bal tiah brê dờng ơnàng tàm tiah nhàr dà lơgar do kung gơtìp gơs mìr sơl.

Cau cih Nguyễn Thảo- Cau mblàng Ndong Brawl