VOV4.K’ho- Kơnhòal Đăk Đoa, càr Gia Lai ơnàng rlau 990 kơi sồ vuông, mờ 111 thôn, ƀòn, ơm rah rài tàm 17 xã, thị trấn. Bă ù ơnàng, làng bol ơm kis rah rài, mơya tài ngui niam ală mạng xã hội bè zalo, facebook, den tàng broă lơh mblàng yal tàm kơnhòal sùm geh lơh niam mờ lơh geh cồng nha uă.  

Ià tềng tê điện thoại ngac ngar, bi Phạm Công Tùng, ơm tàm thôn Tân Lập, xã Trang, kơnhòal Đăk Đoa, càr Gia Lai pờ mpồl Zalo bơh thôn dê nàng sền jơnau yal tơnggit bè kòp Covid-19. Bi Tùng pà git, pah ngai, mpồl đơng lam rơcang sơndră kòp xã dê pơyua 2 jơnau yal là yal bè broă gơlik geh bơh kòp bơ tờp dê tàm càr Gia Lai mờ jơnau yal tơnggit bè ală càr, ƀòn dờng geh kòp. Geh uă jơnau yal tơnggit geh lơh jat rùp sềr ai lơh pơn yơu, den tàng tơl nă cau ƀuơn ngan git oh kòn he dê lòt bơsram, lòt lơh broă rê bơh tiah lơi den pal tam cah is tơrgùm bal, halà mìng yal bè tiah lòt rê mờ gròi sền is pràn kơldăng să jan tàm hìu. Kung bơh mpồl Zalo do, làng bol tàm thôn kung dong kờl mpồl đơng lam gròi sền làng bol geh lơh jat nền nòn ală jơnau sồr bè rơcang sơndră kòp halà ờ: “Broă gròi sền làng bol bơh tiah geh kòp rê halà làng bol jơh tam cah is tơrgùm bal rê tam cah is tàm hìu, oh kòn lòt bơsram, lòt lơh broă rê den bol hi kung gròi sền. Oh kòn lòt bơsram rê den làng bol neh dờp, yal tơn bơh tin nhắn, yal tàm pang yal tơnggit bal, yal hìu sơnm xã, Ủy ban Nhân dân xã in nàng sồr khi yal bè tiah lòt rê nàng làng bol in ờ ngòt”.

 Ồng En- Chủ tịch Ủy ban Nhân dân, Kuang atbồ Mpồl đơng lam rơcang sơndră kòp COVID-19 xã Trang, kơnhòal Đăk Đoa pà git, tŭ do, 5 thôn tàm xã ndrờm geh mpồl Zalo. Tơl mpồl geh bơh 120 tus 150 nă cau là ala mat ală hìu bơnhă làng bol. Mpồl đơng lam rơcang sơndră kòp bơh xã dê tam pà kơ nòl ai cau geh jơng in tus bal ală mpồl nàng ƀuơn hơ mơ ală jơnau lùp bơh làng bol dê. Geh tŭ, hơ̆ là ală jơnau lùp bè yal tiah lòt rê, geh tŭ là ală broă pal lơh tŭ tam cah is tàm hìu, geh tŭ den lùp jơnau tơnggit bè làng bol bơh càr, ƀòn dờng ndai rê tàm xã neh yal bè tiah lòt rê halà ờ: “Kơ nờm geh mpồl Zalo do den tàm tơngai lài, xã neh dờp 143 nă cau bơh tiah ndai rê. Tàm hơ̆, ờ uă cau lơh jat broă tam cah is tơrgùm bal, ờ uă cau den tam cah is tàm hìu. Làng bol neh geh Zalo den sền mat ală tiah geh kòp den khi git, mờ gơtùi rơcang lài. Dilah ƀòn dờng Hồ Chí Minh lơh jat Jơnau sồr sồ 16 den khi git lòt tus hìu sơnơm xã nàng yal".

Kuang àng kơnhòal Đăk Đoa pơlam làng bol mut tàm ală mpồl Zalo nàng sền jơnau tơnggit bè kòp Covid-19

Thiếu tá Khuất Đức Hiệu- Kuang atbồ Kuang àng xã Trang pà git, kung kơ nờm cồng nha tàm yal tơnggit bal bơh ală mpồl Zalo dê, bơh nhai 3 tus nhai 6 nam 2021, kuag àng xã neh lơh gơs jơnau kờñ lơh rlau 3 rbô 600 sră căn cước làng bol mơya kung gam gàr niam kơrnuat lơh jat broă rơcang sơndră kòp. Kuang àng xã Trang yal tơnggit bè tŭ tơngai, anih lơh sră căn cước làng bol. Làng bol mìng tus anih lơh sră căn cước 2 dơ̆ là tŭ ai sồ sap sèng mờ tŭ lơh sră nggal. Bè hơ̆ den tàng, làng bol ờ duh pal kơp, sră nggal kung gam lơh niam mờ gam gàr jat jơnau sồr rơcang sơndră kòp, ơm yah ngài, ờ tơrgùm rlau 20 nă cau tàm anih lơh sră căn cước làng bol: “Jơh ai sồ sap sèng, he jà cau mut tàm pang Zalo bơh he dê tơn, sồr làng bol rê wơl tàm hìu, rê tàm hìu den khi tàm jà gơp, mblàng yal is gơp in. Pơgap 30 phuk den he nhắn tin dùl dơ̆ là ơ làng bol, tŭ do, tus sồ 59 den ală làng bol cau sồ 69 là cau rơcang lài, khi geh tus. Tàm yal jơnau tàm pang Zalo dê, lơh gơlik bơta ƀuơn làng bol in mờ ờ tơrgùm gal cau”.

Jat khà kờp bơh kơnhòal Đăk Đoa dê, tŭ do kơnhòal geh rlau 40 rbô sồ điện thoại at tê geh ngui mạng 3G, 4G. Đal git là dùl gah mblàng jơnau geh cồng nha, sơbac mhar mờ priă tă lơh ờ uă, bơh nhai 3 nam 2020, Ủy ban Nhân dân kơnhòal Đăk Đoa neh jàu Kuang àng kơnhòal pờ ală Fanepage tàm Facebook mờ gah yal tơnggit Zalo official Account ai Ủy ban Nhân dân mờ Kuang àng bơh 17 xã, thị trấn tàm gùt kơnhòal dê in. Tàm do, làng bol gơtùi sền jơnau tơnggit bè lơh sa mpồl bơtìan tàm kơnhòal, gròi sền broă bơsong sră nggal hành chính mờ jơnau yal tơnggit bè kòp bơ tờp. Tàm kấp xã, Ủy ban Nhân dân kung dong kờl ală thôn crơng gơs ală mpồl Zalo nàng tàm yal jơnau mờ làng bol bè broă lơh rơcang sơndră kòp Covid-19.

Kơ nờm ngui geh cồng nha mạng xã hội zalo, facebook den tàng Kuang àng kơnhòal Đăk Đoa neh lơh gơs jơnau kờñ bè lơh sră căn cước làng bol mờ kung gam gàr niam broă rơcang sơndră kòp

Bơta kuơmàng là ală gah yal tơnggit bơh kấp kơnhòal tus kấp xã, tus thôn, ƀòn ndrờm geh tàm tơrbŏ bal mờ gơp. Bè hơ̆ den tàng, mìng kờñ mut tàm mpồl do, làng bol gơtùi hòi điện thoại mơ mờ Kuang atbồ Mpồl đơng lam rơcang sơndră kòp halà kuang atbồ kuang àng xã, kơnhòal dilah kuơmàng. Đại uý Đàm Mai Minh Tuấn, PhóKuang atbồ Mpồl bơt bơtà srơh sền gàr lơngap lơngai dà lơgar, Kuang àng kơnhòal Đăk Đoa pà git, broă do tàm ală mpồl online neh dong tơrmù priă tă lơh broă, bal mờ hơ̆ cồng nha mblàng yal kung geh tơnguh loh làng sơl: “Tơ nơ̆ tŭ lam lơh mpồl zalo mờ fanpage, tŭ tơngai rơcang sră nggal lơyah rlau. Khà ơruh pơnu, kơ nòm pa tàu ngui mạng xã họi uă rlau mờ cau dờng sơnam, den khà cau geh gơtùi tus rềp niam rlau. Tŭ kuang bàng lòt tus thôn, ƀòn, bơceh mòn rùp hin, jơnau ci, video, măi mok den kơn jơ̆ ngan mờ kal ke tai. Mơya tàm mạng xã hội den mhar ngan, mìng kờñ pơyua jơnau tơnggit den mìng bơh 3 tus 4 brơs mat là tơl nă cau neh git bloh”.

Broă ngui măi tính, điện thoại ngac ngar tŭ do neh geh uă tàm Gia Lai, kờp bal ală tiah sar lơgar ngài; broă làng bol ngui mạng xã hội nàng lơh quèng, boh boar kung neh mờng quèng ngan. Ngui mạng xã hội tàm broă atbồ, đơng lam, ală anih lơh broă, cơldŭ lơh broă, mpồl lơh broă, ală thôn, xã tàm kơnhòal Đăk Đoa đơs is, càr Gia Lai đơs bal neh gơtùi bơsong uă ngan kal ke tài gùng ngài, kal ke, dong  lam làng bol tus rềp rlau mờ gơ noar atbồ ală kấp. Tàm tơngai ơm yah ngài mpồl bơtìan nàng rơcang sơndră kòp Covid-19, ală ứng dụng hơ̆ ngai sơlơ ai gŏ cồng nha loh làng, pơgồp bơnah kơryan kòp bơ tờp, gàr broă lơh sa, kă bro.

Cau mblàng K’Duẩn