VOV4.K’ho- Trồ tơngai prang jŏ jòng, dà căt mờ ală tơnau dà ndrờm soăt den tàng uă ngan bă sre lơh kòi kàl mrềt prang tàm kơnhoàl Chư Pah, càr Gia Lai gơtìp chơ̆t ro. Gơwèt mờ ală hìu bơnhă lơh kòi là priă lơh geh tờm, den kàl lơh kòi nam do sền bè là neh roh jơh.

Sền ƀlàng sre Ia Sah dùl dà rơmĭt chơ̆t ro jơh, ồng Rơ Chăm Chíu, làng bol ƀòn Mrông Yố 2, xã Ia Ka, kơnhoàl Chư Pah, mìng gĭt pơlai soh gời lơm. Kàl lơh kòi kàl mrềt prang nam do bơh hìu bơnhă ồng dê neh roh jơh, mờ ồng kung ờ hềt gĭt tam gơl tus broă lơh mbè lơi nàng geh priă jền tàm tơngai tus.

Hìu bơnhă añ tam 3 sào kòi, 1 sào ai tơn hào bơh 6 tus 7 tạ kòi, pah nam den hìu bơnhă kung tơl sa đau sơl. Mơya dùl nam do là ờ tơl sa tàm tŭ uă cau gam toès kòi, kòi chơ̆t jơh là tài bơh dà ờ geh dùl ết lơi, tŭ do, dà lơgar bơto pơlam làng bol tàm tiah do di pal mờ phan tam lơi den pal lơh jat dà lơgar bloh.

Làng bol moat jrùm gah ƀlàng sre lơh kòi gơtìp chơ̆t ro

Ngài mờ ƀlàng sre bơh ồng Rơ Chăm Chíu dê ờ ngài, mờr 4 sào kòi bơh ồng Rơ Chăm Luyên dê kung neh chơ̆t ro jơh sơl. Jat ồng Luyên yal, do là nam dơ̆ 2 hìu bơnhă ờ geh tơnhào gar kòi lơi tàm ƀlàng sre Ia Sah dê.

Bàr pe nam lài gam tơl sa đau sơl, bơh 2 tus 3 nam do ờ geh dà, trồ prang soăt dà mờ ro jơh. Kơ̆p kờñ ngan gơnoar atbồ tiah do, Đảng, Dà lơgar sền tàm ƀlàng sre do den tam gơl tus tam phan lơi ai gơ in di pal mờ làng bol.

Ồng Hoàng Văn Thành, Phó chủ tịch UBND xã Ia Ka, kơnhoàl Chư Pah pà gĭt, uă nam do làng bol kòn cau Jrai tàm xã uă ngan là lơh kòi sre kơnờm dà căt mờ bơh ală dà croh, ờ geh ai dà bơh ală bơtơ̆t rƀòng dà ờ. Nam do, trồ prang jŏ jòng, dà geh is neh soat den uă ngan bă ù lơh kòi sre neh chơ̆t ro. Tơrgùm kờp bơh sơnrờp pà gŏ, neh geh rlau 70 lồ kòi kàl mrềt prang tàm xã gơtìp hoàc huơr halà chơ̆t jơh, mờ mờr 200 hìu bơnhă gơtìp gơrềng, uă ngan là tàm ƀòn Mrông Yố 1 mờ 2. Ồng Hoàng Văn Thành kơlôi sơnơng, dilah kấp hơđang ờ gờñ bơto pơlam,  bơyai lơh ai làng bol in tam gơl rơndap tap sèng phan tam, hoàc huơr tàm kàl lơh sa nam do dê geh gam pơn jat tai tàm ală nam tus do.

Di dơ̆ do kung dan mờ kấp geh gơnoar geh gùng dà broă lơh geh dùl bơnah priă jền dong kờl làng bol in lơh sa wơl. Jat jơnau kờp dŭ den digơlan ală nam tus do pơn jat tai trồ prang soat dà. UBND xã geh pơgồp bal mờ ală anih lơh broă geh gơnoar xã dê kung geh pơgồp bal niam mờ làng bol nàng bơto pơlam làng bol in tam ală phan tam lơyah tơngai di pal mờ rơndap tap sèng phan tam, di pal mờ trồ tiah, ù tiah tàm kàl prang bơh ală nam pơn jat tai in.

Dùl ƀlàng sre ơnàng gơtìp trồ prang soat dà lơh kòi chơ̆t tàm gơl dà rơmĭt ñòp

Ồng Trần Đắc Thắng, Phó trưởng Phòng Nông nghiệp mờ Phát triển Nông thôn kơnhoàl Chư Pah pà gĭt, mpồl neh lơh broă kờp sền jơh bă ù lơh kòi kàl mrềt prang tàm ù tiah kơnhoàl dê. Kàl mrềt prang nam do, gùt kơnhoàl lơh rlau 1 rơbô 700 lồ kòi den geh tus rlau 170 lồ gơtìp trồ prang ờ geh dà mờ chơ̆t jơh. Nàng bơsong broă bè tam phan, ngan là lơh kòi gam gơtìp trồ prang soat dà, ồng Trần Đắc Thắng pà gĭt.

Phòng Nông nghiệp mờ Phát triển Nông pơgồp bal niam mờ Anih tờm drơng broă lơh sa suơn sre kung bè UBND ală xã lơh jat broă kờp sền jơh bă ù kàl mrềt prang ngan là gơwèt mờ bă ù lơh kòi. Mìng ai lơh sa tàm ală bă ù gàr niam geh khà dà tuh, gơwèt mờ ală tiah trồ prang ờ geh dà den tơngkah làng bol tam gơl phan tam di pal nàng trồ prang ờ geh dà ờ gơ aniai tus mờ làng bol.

Cau cih Hoàng Qui- Cau mblàng K’ Hạnh