VOV4.K’ho- Tàm jơnau yal mho ngai 08/9, Mpồl đơng lam rcang sơndră kòp Covid-19 càr Gia Lai yal, bơh 0 jiơ mang ngai 09/9, ai gơnoar ƀòn dờng Pleiku in ơm lơh jat broă lơh ai ơm yah ngài mpồl bơtiàn jat Chỉ thị sồ 16, mơkung sồr ală tiah tàm càr bơt bơtàu gùng dà broă lơh bơtàu tơnguh lơh sa- mpồl bơtiàn tàm bơta “bè ờs pa”.

Mpồl đơng lam rcang sơndră kòp Covid-19 càr Gia Lai sồr pơn jat tai tai ơm ing ală broă lơh ờ kuơ, drà pờ ing, drà tăc jat kềng gah gùng; làng bol ờ tơrgùm uă ir 10 nă cau bơdìh mờ tiah lơh broă dà lơgar, hìu bơsram, hìu sơnơm, tiah mpồl bơtiàn. Anih ràng tăc phan sa, phan hùc geh kă bro wơl, mơya mìng geh tăc cèng rê lơm. Bơdìh hơ̆, càr Gia Lai kung sồr ƀòn dờng Pleiku pơn jat tai wàng se kràñ gơwèt mờ ală tiah geh gơrềng tus ală cau kòp pa geh sền gŏ tàm tơngai pa do; mhar jòi gĭt tiah lòt rê, căng tiah, wàng se jat mpồl làng bol ơm kis. Gơwèt mờ ală kơnhoàl, thị xã, càr Gia Lai sồr bơt bơtàu gùng dà broă lơh sền gàr tiah ờdo ờdă, lam lơh ală broă lơh sa mpồl bơtiàn jat gùng dà broă lơh “bè ờs pa”.

Cau mblàng K’Hạnh