VOV4.K’ho- Drim ngai 31/8, mpồl lơh broă bơh càr Gia Lai dê neh jun 22 nă cau ùr geh bun mờ 2 nă kơnòm dềt gam ơm kis ing tàm càr Bình Dương rê hờ ƀòn tờm. Jơh ală cau ùr, kơnòm dềt do neh geh jun rê hờ anih tam cah is tơrgùm bal E991 bơh càr Gia Lai dê. Ală cau do geh tam cah is mờ xét nghiệm uă dơ̆. Uă ngan ală cau ùr jun rê dơ̆ do ndrờm geh bun rlau 6 nhai, geh rài kis kal ke, tàm hơ̆ geh cau geh bun neh 9 nhai.

Nàng jun khà làng bol do rê, Gia Lai neh ai 1 nă bác sĩ mờ 2 nă ùr đơng deh lòt bal mờ mpồl nàng bơsong dilah geh broă lơi. Lài hơ̆, Sở Lao động- Thương binh mờ Xã hội càr Gia Lai mờ đah càr Bình Dương neh pơgồp bal, dong kờl lơh xét nghiệm; rơndap ai làng bol Gia Lai tus anih tơrgùm bal đì rơndeh rê hờ ƀòn tờm. Bơh sơn rờp kờp dŭ geh 25 nă cau ùr mờ 4 nă kơnòm dềt geh jun rê, mơya tài pràn kơldăng să jan, mìng geh 24 nă cau geh tơl bơta nàng rê. Jơh 22 nă cau ùr geh bun mờ 2 nă kơnòm dềt rê hờ càr ndrờm gàr pràn kơldang să jan, dơ̆ rê neh geh lơh ƀuơn ƀuài, ờdo ờdă.

Cau mblàng K’Duẩn