VOV4.K’ho- Tềng đăp bơta gơbàn kal ke ờ gơtùi gĭt lài bơh kòp Covid-19 dê, tŭ mpồl cau bơh ală tiah tàm tiah đah jum dà lơgar sùm “ur ar” dô rê, Mpồl đơng lam rơcăng sơndră kòp Covid-19 càr Gia ai gam kràñ cê jơh nùs lơh jăt ală broă lơh tam dră wơl mờ kòp dùl bă tiah tơn, lơh jăt ală bơta digơlan gơbàn bơh kòp Covid-19 dê.

Ală ngai do, anih gròi sền kòp Covid-19 tàm gùng rơndeh dờng 14, gơl gùng lòt gan rbàng 110, tàm xã Ia Le, kơnhoàl Chư Pưh, càr Gia Lai dê dờp uă ngan cau mờ rơndeh rơndồ tus, mìng là bơh ală càr, ƀòn dờng tàm tiah đah jum dà lơgar wơl rê wơl hờ càr. Pah ngai, anih gròi sền do gròi sền rlau 1 rbô nă cau. Nàng gàr niam broă lòt rê tàm gùng rơndeh dờng mơkung gròi sền kràñ cê kòp, càr Gia Lai neh ai tai kuang bàng lơh sơnơm mờ kảnh sát gùng lòt, lơh jăt broă lơh tam pà gùng, pơlam làng bol săp sèng, đo bơta duh să jan mờ yal mờ cau lơh sơnơm in dùl bă sơrbac mhar ngan rlau jơh. Kơnờm lơh niam broă lơh tam pà gùng, ai ơm yah ngài tơn tàm gùng mŭt, anih gròi sền kòp tàm rbàng 110 càr Gia Lai dê neh gŏ ală cau bơtờp kòp Covid-19. Bi Nguyễn Minh Tuấn- Trung tá, Kuang ătbồ Mpồl Kảnh sát gùng lòt sồ1, Kuang àng càr Gia Lai lơh kơnòl broă tàm do pà gĭt: Bol añ hòi jà jơh ală mpồl cau mŭt lơh broă nàng gròi sền kràñ cê ai broă lơh rơcăng sơndră kòp Covid-19 in nàng pleh jơnau kòl gùng; mpồl cau lơh sơnơm ai tai cau lơh broă nàng lơh broă lơh yal mờ cau lơh sơnơm in dùl bă sơrbac mhar, gàr niam gùng lòt gơtùi lòt rê sùm mờ jun cau lòt ơm yah ngài.

Mpồl lơh sơnơm tàm anih gròi sền kòp tàm rbàng 110, xã Ia Le, kơnhoàl Chư Pưh pơlam làng bol yal mờ cau lơh sơnơm in

Ồng Siu Y Bá- Chủ tịch Ủy ban Nhân dân kơnhoàl Chư Pưh, càr Gia Lai pà gĭt, kơnhoàl bơyai lơh pơgồp bal niam đah ală mpồl cau nàng pleh lơh kơn jơ̆ ai làng bol in lòt gan anih gròi sền kòp: Mpồl cau rê gal ngan, dilah bơsong ờ thàn den gơrềng uă ngan. Mơya, bol añ kung pơndờm pơnđiang làng bol, bol he bañ dơrcul nùs, jăt bơta rơndăp tăp sèng nàng geh yal di jăt jơnau sồr, bañ pleh pồn lòt gan gùng kòn, gùng pleh, dô pleh anih gròi sền kòp nàng lơh niam broă yal mờ cau lơh sơnơm in dùl bă song dơ pă mờ ơm yah ngài di jơnau sồr.

Bơh ngai 26/4 tus bồ poh do, càr Gia Lai gŏ kờp jơh mờr 30 nă cau bơtờp kòp Covid-19. Mpồl kuang bàng lơh sơnơm lơh jăt kơnòl broă cang tiah mhar, jòi cau ơm rềp mhar, xét nghiệm tơn ală cau gơrềng tus ală cau kòp bơtờp pa. Bal mờ hơ̆, càr kung neh lơh broă 21 anih ơm yah ngài tơrgùm bal, mờ bơta tơl pràn dờp rlau 3 rbô nă cau. 48 anih ơm yah ngài ndai kung neh geh lòt sền, rơcăng ală bơta pal geh lơh geh jơnau kờñ dờp tai pơgăp 7 rbô nă cau.

Tơnơ̆ mờ tŭ geh tam pà gùng, ală làng bol geh broă lòt rê gơrềng mờ tiah geh kòp geh jun mhar tơn hờ anih ơm yah ngài tơrgùm bal jăt di jơnau sồr

Mò Nguyễn Thị Thanh Lịch- Phó Chủ tịch Ủy ban Nhân dân càr, Phó Kuang ătbồ Mpồl đơng lam rơcăng sơndră kòp Covid-19 càr Gia Lai pà gĭt, tam dră wơl mờ ală bơta digơlan gơlik geh bơh kòp dê, càr neh geh ală broă rơndăp lơh gàr tơl phan bơna pal geh, mờ ờ gơtìp kal ke broă kă bro phan lơh geh bơh sươn sre. Bè rơcăng lài anih sơm kòp, Gia Lai neh lơh nền ngui, tam gơl Hìu sơnơm 331 tàm gùng Phạm Văn Đồng, ƀòn dờng Pleiku geh pơgăp 100 nơm jơnờng piam kòp, lơh jăt broă lơh sơm kòp ai cau kòp kơn jơ̆ in. Ală Hìu sơnơm Kòp Jòr bơsiă gơlik mhàm, Hìu sơmơm Kòp Klờm soh, Hìu sơnơm Y học Cổ truyền mờ lơh pràn wơl să jan ƀòn dờng Pleiku kung neh rơcăng lài ală bơta pal geh nàng lơh geh jơnau kờñ sơm kòp gơwèt mờ ală cau pin bơtờp kòp mờ bơtờp kòp Covid-19 nggờc tus di mơ. Mò Nguyễn Thị Thanh Lịch, đơs: Bol añ lơh hìu sơnơm is mìng sơm kòp Covid-19 lơm, lơh jăt geh kơnòl broă ai cau kòp in pal ngui bơta chài măy mok bè bơta dong kờl đah ngoại khoa, bơkiar leh is, halà kòp bơh lài; crơng gơs dùl mpồl cau sùm dong kờl sơm kòp ai cau kòp kơn jơ̆ in, nàng sơm kòp is. Bơdìh hơ̆ tai, bol añ lơh dùl nơm hìu sơnơm sơm kòp ai cau kòp geh ală bơta gơ tơngŏ kòp nggờc.

            Cau cih Nguyễn Thảo- Cau mblàng Lơ Mu K’Yến