VOV4.K’ho- Dơ̆ pơrlòng nam do, gùt càr Gia Lai geh rlau 14 rbô nă cau cih mat tus bal pơrlòng mờ 39 anih pơrlòng ngan ngồn mờ 17 anih pơrlòng rơcang lài tàm 17 kơnhoàl, thị xã, ƀòn dờng mờ 616 cơldŭ pơrlòng. Kờp dŭ geh 1 rbô 282 nă kuang bàng sền pơrlòng, 20 nă kuang bàng sền gròi mờ mờr 500 nă cau lơh broă dong kờl, geh ală mpồl bè kuang àng, lơh sơnơm, sền gàr ring lơngai.

Ồng Nguyễn Văn Long, Phó Kuang atbồ Sở Giáo dục mờ Đào tạo càr Gia Lai pà git, Sở Giáo dục mờ Đào tạo càr Gia Lai neh bơt bơtàu rơndap broă pơrlòng jơh bơsram kấp 3 bal mờ 4 khà nàng sơndră mờ kòp Covid-19. Bơh tŭ do tus dơ̆ pơrlòng geh lơh, ală mpồl duh broă pơrlòng jơh bơsram kấp 3 tàm càr Gia Lai rơcang rơndap broă sơndră mờ ală broă nisơna digơlan gơlik geh nàng dơ̆ pơrlòng geh lơh ờdo ờdă, jơh nùs, lơh geh cồng nha niam ngan rlau jơh tàm tŭ tơngai kòp Covid-19 gam gơlik geh ờ gơtùi git lài.

Cau mblàng K’Duẩn