VOV4.K’ho– Ală hìu bơsram kấp 3 tàm càr Gia Lai neh lơh sir ală bơta nàng gàr dơ̆ pơrlòng jơh bơsram kấp 3 dà lơgar geh lơh ờdo ờdă, tàm tŭ tơngai kòp Covid-19 gam gơlik geh kal ke ờ gơtùi git lài.

Tàm hìu bơsram kấp 3 Nguyễn Bỉnh Khiêm, thị trấn Chư Sê, kơnhoàl Chư Sê, càr Gia Lai, ală kơnòm bơsram ơdŭ 12 gam sơbac mhar bơsram wơl jơnau git wă, lơh ală jơnau lùp pơrlòng geh ai tơrlòng lài. Ală cau pơgru hìu bơsram kấp 3 Nguyễn Bình Khiêm gam tàp ală oh in nùs nhơm kơ̆ kơljap nàng lơh jơnau pơrlòng lơh geh cồng nha niam ngan rlau jơh. Ùr pơgru Trần Thị Hồng Uyên, drơng broă pơlam lơh jơnau pơrlòng môn Ngữ văn, hìu bơsram kấp 3 Nguyễn Bỉnh Khiêm pà git: “Tàm tŭ tơngai bơsram mờ bơto bơtê den jơh bal kơnòm bơsram mờ cau pơgru bol hi jơh nùs ngan lơh jat broă rơcang sơndră kòp jat jơnau sồr 5K, 100% ală oh tus bal bơsram ndrờm pơn chèu glòm muh mat, lơh kloh khuẩn. Tàm tơngai kòp gơlik geh kal ke bè tŭ do, cồng nha bơsram ală oh dê kung gơtìp gơ rềng sơl, tài gơ rềng kòp bơh nam lài tus nam do; cau pơgru bal mờ kơnòm bơsram, hìu bơsram pơgồp bal mờ ală mpồl lơh broă, mpồl cau lam lơh broă pơlam lơh jơnau pơrlòng nền nòn, sồr mè bèo tơngkah oh kòn he dê tus bal tơl làm ală ơdŭ pơlam lơh jơnau pơrlòng”.

Dơ̆ pơrlòng nam do, Hìu bơsram kấp 3 Nguyễn Bình Khiêm geh rơcang 23 cơldŭ pơrlòng mờ rlau 300 nă cau tus bal pơrlòng. Jat pơgru Nguyễn Hải Hà, atbồ hìu bơsram kấp 3 Nguyễn Bình Khiêm pà git, bơh tŭ Sở Giáo dục mờ Đào tạo càr Gia Lai kờp dŭ lài mat cau pơrlòng, hìu bơsram neh sơbac mhar rơndap lơh ală cơldŭ pơrlòng dipal. Bơdìh hơ̆ tai, hìu bơsram gam rơcang wil tơl dà ràu tê lơh kloh khuẩn, chèu glòm muh mat, măi was khà duh să jan... nàng kờñ gàr niam ờdo ờdă rơcang sơndră kòp Covid-19 tàm jơh gùt tơngai pơrlòng: “Dilah geh kơnòm bơsram F1, F2 den pal yal mơ Sở in. Sở geh jơnau sồr là yal bè tiah lòt rê lài mờ tơngai pơrlòng 7 ngai nàng git mơ broă ơm rềp bơh kơnòm bơsram, kuang bàng sền pơrlòng dê. Kuang atbồ Sở Giáo dục mờ Đào tạo càr kung neh jàu, dilah lời gơlik geh bơta cau geh ơm rềp mờ cau F0, F1 den hìu bơsram pal kong kơnòl, nàng lơh bè lơi dơ̆ pơrlòng jơh bơsram kấp 3 geh lam lơh niam”.

Kơnòm bơsram lơh jat jơnau sồr pơn chèu glòm muh mat mờ loh kloh khuẩn tŭ bơsram pơlam lơh jơnau pơrlòng

Pơgru Trần Văn Lượng, atbồ hìu bơsram kấp 3 Tôn Đức Thắng, kơnhoàl Đức Cơ pà git, dơ̆ pơrlòng jơh bơsram kấp 3 nam do bơdìh mờ broă lơh jat nền nòn broă rơcang sơndră kòp mờ bơto wơl jơnau git wă kơnòm bơsram in, hìu bơsram gam dong kờl kơnòm bơsram geh rài kis kal ke nàng ală oh in lơh gơs dơ̆ pơrlòng mờr tus: “Hìu bơsram geh bơyai lơh pơrlòng jơh bơsram kấp 3 jat 2 rơndap broă, dilah kòp bơtờp gơlik geh bè tŭ do den hìu bơsram geh bơto wơl jơnau git wă tàm hìu bơsram tơn. Ală môn mờ kơnòm bơsram pơlam lơh jơnau pơrlòng den cau pơgru pal rơcang lài sră nggal bơto bơtê. Dilah kòp gơlik geh kal ke den cau pơgru geh lip jơh sră nggal bơto bơsram, pơyua lài ală kơnòm bơsram in nàng kơnòm bơsram pơlam lơh jơnau pơrlòng pờ tơn tàm internet jat jơnau đơng lam bơh Sở Giáo dục mờ Đào tạo dê. Kơnòm bơsram gơ wèt cau jơi bơtiàn kòn cau dùl êt nă cau tàm hìu bơsram uă ngan, priă jền kal ke, hìu bơsram sồr ală sră nggal bơto bơsram lơh jơnau pơrlòng hơ̆ den hìu bơsram geh dong kờl priă jền nàng tơrmù ƀà kal ke ală oh in”.

Dơ̆ pơrlòng nam do gùt càr Gia Lai geh rlau 14 rbô nă cau cih mat tus bal pơrlòng mờ 39 anih pơrlòng ngan ngồn, 17 anih pơrlòng rơcang lài tàm 17 kơnhoàl, thị xã, ƀòn dờng, mờ 616 cơldŭ pơrlòng. Kờp dŭ geh 1 rbô 282 nă cau sền pơrlòng, 20 nă kuang bàng gròi sền mờ mờr 500 nă cau dong broă geh ală mpồl bè kuang àng, lơh sơnơm, mpồl sền gàr ring lơngai ờdo ờdă.

Ồng Nguyễn Văn Long, Phó Kuang atbồ Sở Giáo dục mờ Đào tạo càr Gia Lai pà git, Sở Giáo dục mờ Đào tạo càr Gia Lai neh bơt bơtàu rơndap broă pơrlòng jơh bơsram kấp 3 mờ 4 khà nàng sơndră mờ kòp Covid-19. Bơh tŭ do tus tŭ dơ̆ pơrlòng geh lơh, ală mpồl duh broă pơrlòng jơh bơsram kấp 3 tàm càr Gia Lai rơcang lài ală rơndap broă sơndră mờ ală broă nisơna digơlan gơlik geh nàng dơ̆ pơrlòng geh lơh ờdo ờdă, jơh nùs, lơh geh cồng nha niam ngan rlau jơh: “Sở Giáo dục mờ Đào tạo neh sồr ală mpồl lơh broă ờ mìng lam lơh ală broă lơh ai dơ̆ pơrlòng in di quy chế, di broă rơndap lơh, mờ gam gàr ală jơnau sồr bè rơcang sơndră kòp bơtờp tàm tơngai kòp Covid-19 gơlik geh kal ke. Tàm hơ̆ geh 4 rơndap broă bơyai lơh pơrlòng ndrờm mờ 4 khà gơlik geh kòp dê, lơh jat nền nòn jơnau sồr 5k lài mờ tŭ, tàm tŭ mờ tơnơ̆ tŭ pơrlòng. Sở kung neh geh sră nggal sồr kơnòm bơsram, cau pơgru tus bal pơrlòng, cau sền pơrlòng pal lơh jat broă yal bè tiah lòt rê lài mờ tơngai pơrlòng geh lơh là 7 ngai mờ yal ală jơnau tơnggit bè anih cih mat tus bal pơrlòng, ală cụm pơrlòng nàng mblàng git loh mờ bơsong”.

Cau mblàng K’Duẩn