VOV4.K’ho - Drim òr (08/12), pơrjum dơ̆ 4 Hội đồng Nhân dân (HĐND) càr Gia Lai khoă 12, tơngai lơh broă bơh nam 2021 tus 2026 neh mùl màl sơn đờm pơrjum.

                                          Dơ̆ pơrjum Hội đồng Nhân dân càr Gia Lai

Pơrjum dơ̆ do tơrgùm tàm broă sền wơl ală jơnau yal bè broă sền wơl cồng nha lơh jăt Nghị quyết bơh HĐND càr dê bè lơh sa mpồl bơtiàn, sền gàr bơta lơngăp lơngai dà lơgar nam 2021 mờ ală kơnòl, broă lơh nam 2022. Bŭ lah kòp Covid-19 gơtìp kal ke, mơya tàm nam 2021, broă ngui dơ̆ kes priă tàm càr Gia Lai geh gơguh pràn. Mùl màl, kờp jơh tă kes priă tàm càr geh 7 rơbô 386 tơmàn đong, ndrờm mờ 162% pơn drờm mờ kờp dŭ dà lơgar jào, sơrlèt 83% pơn drờm mờ tŭ do nam 2020. Kờp jơh khà phan geh lơh tàm càr gơguh 9,03%, GDP tơl nă làng bol geh 56 tơlăk 310 rơbô đong. Tàm nam do, neh geh tai 17 xã geh khà ƀòn lơgar pa, tơnguh khà tus 87 xã geh khà ƀòn lơgar pa. Mơya, tàm nam 2021, càr Gia Lai gam 4 tàm 18 jơnau kờñ ờ geh jăt mờ rơndăp broă geh ai.

Tàm pơrjum do, HĐND càr Gia Lai sền wơl, cri bơyai ring bal 33 rơndăp broă Nghị quyết geh yal.

Cau mblàng Ndong Brawl