VOV4.K’ho- Git nđờ rhiang nă kuang bàng lơh sơnơm, kuang àng mờ ling klàng gơ wèt Mpồl đơng lam rơcang sơndră kòp Covid-19 càr Gia Lai neh jal mhar lam lơh broă tam pà, tam cah is git nđờ rbô nă cau rê bơh tiah geh kòp ƀòn dờng Hồ Chí Minh, tơnơ̆ tŭ ƀòn dờng do lam lơh broă ơm yah ngài mpồl bơtiàn. Broă tam pà geh lơh bơh 2 jơ drim ngai 31/5. Jat hơ̆, mpồl lơh broă bơh Mpồl đơng lam rơcang sơndră kòp Covid-19 càr Gia lai neh sồr rlau 1 rbô 500 nă cau tàm 53 nơm rơndeh rơndồ mờ 116 nă cau đì tàm dùl nơm rơndeh par bơh ƀòn dờng Hồ Chí Minh rê hờ ƀòn dờng Pleiku yal gah lơh sơnơm in.

Tơnơ̆ tŭ rơwah, 667 nă cau geh ai mẫu xét nghiệm kòp Covid-19, 133 nă cau geh lam lòt tam cah is tơrgùm bal tàm kơnhoàl Đức Cơ. Ală cau gam wơl lơh jat broă tam cah is tàm hìu, geh bơta sền gròi bơh gơnoar atbồ tàm ƀòn lơgar dê. Bơdìh mờ broă sền gròi nac tàm ƀlàng rơndeh par, jơh ală ƀlàng rơndeh ơm tàm càr Gia Lai sồr ală rơndeh rơndồ git jơnau yal, sền gròi mờ camera sền gròi gùng lòt ală rơndeh rê bơh ƀòn dờng Hồ Chí Minh nàng rơcang sơndră kòp. Càr neh pờ wơl 4 anih sền gròi kòp tàm ală gùng rơndeh 14, 19 mờ 25 mut tàm càr bơh 12 jơ mang ngai 31/5, sền gròi mờ pơn jat tai tam pà gơ wèt tus mờ ală rơndeh rơndồ rê bơh ƀòn dờng Hồ Chí Minh.

Cau mblàng K’Duẩn