VOV4.K’ho- Ngai 4/4, 50 nă kuang bàng, cau lơh sơnơm tàm hìu sơnơm lơh ing sơm kòp Covid-19 càr Gia Lai dê neh jơh lơh jăt broă lơh ơm yah ngài kham sơm kòp 14 ngai, rê wơl hờ ală anih lơh broă nàng pơn jăt tai broă lơh. Mờ Ủy ban Nhân dân càr Gia Lai kung neh geh kơrnoat tơn lời lơh broă Hìu sơnơm lơh ing sơm kòp Covid-19.

Jăt Kơrnoat bơh Ủy ban Nhân dân càr Gia Lai dê, Hìu sơnơm lơh ing Gia Lai tơn lời lơh broă bơh ngai do, 5/4. Tàm tơngai lơh broă, bal mờ bơta dong kờl broă lơh ờs mờng bơh Hìu sơnơm Chợ Rẫy, ƀòn dờng Hồ Chí Minh dê mờ Viện vệ sinh dịch tễ Tây Nguyên, Hìu sơnơm lơh ing neh lơh sir gơs kơnòl broă sơm bời kòp ai 27 nă cau kòp tàm càr in. Bè hơ̆, tus tŭ do, ală kuang bàng, cau lơh sơnơm dŭt ndơl tàm tiah lam lài tam dră mờ kòp Covid-19 tàm càr Gia Lai neh lơh sir gơs kơnòl broă, wơl rê wơl mờ broă lơh.

Cau mblàng Lơ Mu K’Yến