VOV4.K’ho- Tềng đap bơta gơlik geh kal ke bơh kòp Covid-19 jơh bal tàm càr mờ bơdìh càr, Sở Công thương Gia Lai neh geh broă rơndap lơh gàr tơl phan bơna kờñ pal geh mờ tăc phan bơna lơh geh bơh lơh sa suơn sre tàm ală bơta gơbàn bơh kòp dê. Jat hơ̆, Sở Công thương Gia Lai neh bơt bơtàu broă rơndap lơh ơn prap phan bơna, mờ kờp jơh mờ priă pơgap 9 rơbô tơmàn đong. Sồr  65 mpồl lơh sa kă bro tàm càr dê tơnguh bơta pràn lơh broă ơn prap phan bơna tàm anih ơn prap phan gơguh tus 1,5 dơ̆ pơndrờm mờ lài do.

Gia Lai tơnguh bơta pràn ơn prap phan bơna nàng rcang sơndră kòp Covid-19

Bal mờ hơ̆, broă gàr niam tăc phan bơna lơh geh bơh lơh sa suơn sre ai cau lơh broă sa tàm càr in jun rê tàm hìu măy lơh gơlik phan kung geh Sở Công thương Gia Lai sền gròi. Gah Công thương ală tiah geh gùng dà broă lơh pơndiang gàr niam broă lơh rcang sơndră kòp jun rê tus tàm hìu măy lơh gơlik phan; ờ ai bơta kơryan tăc phan gơwèt mờ phan lơh geh bơh lơh sa suơn sre; sồr ală mpồl lơh sa kă bro gàr sùm broă lơh gơlik phan, ai cau lơh broă lơh gơlik phan sa sào, ơm rlô tàm tiah lơh gơlik phan tơn, bơyai lòt blơi phan lơh gơlik bơh gah lơh sa suơn sre ai cau lơh broă sa in.

Cau mblàng K’Hạnh