VOV4.K’ho- Ngai 22/7, Mpồl đơng lam rcang sơndră kòp Covid-19 càr Gia Lai bơyai lơh pơrjum mhar nàng lam lơh ală broă lơh jal mhar rcang sơndră kòp tơnơ̆ tŭ ală tiah sền gŏ sùm ală cau bơtờp mờ virus Sars CoV-2. Yal tàm dơ̆ pơrjum, kờp bơh ngai 26/4 tus ngai 22/7, Gia Lai geh 21 nă cau bơtờp mờ virus Sars CoV-2, tàm hơ̆ geh 5 nă cau neh bời kòp mờ ai rê tàm hìu.

                       Mpồl lơh sơnơm ƀồm sơnơm lơh kloh khuẩn tàm ală tiah cau kòp lòt rê

Tềng đap bơta kòp gơlik geh kal ke, Mpồl đơng lam rcang sơndră kòp Covid-19 càr Gia Lai sồr ală gah lơh broă geh gơnoar pal sơr băc mhar lơh broă jòi gĭt tiah lòt rê, kờp sền bơtơl ală tiah geh gơrềng mờ jòi cau jal mhar, bơyai lơh xét nghiệm ai ală cau măy rơndeh mờ tiah tơrgùm uă làng bol ơm kis tàm ƀòn dờng Pleiku in. Lơh broă căng tiah kòp ing tàm thị trấn Kbang, ƀòn Tà Kơ, (xã Sơ Pai, kơnhoàl Kbang) mờ ală tiah geh gơrềng tus ală cau kòp; ai mẫu xét nghiệm di tŭ ai ală cau F1,F2 in kung bè ƀồm sơnơm lơh kloh khuẩn ală tiah lòt rê geh gơrềng tus mờ ală cau kòp.

Cau mblàng K’Hạnh