VOV4.K’ho– Ală tiah bơh càr Gia Lai dê gam lơh ngan tơnguh broă mblàng yal tĕ khà tus tơl thôn, ƀòn tiah sar lơgar ngài, dong làng bol ală jơi bơtiàn kòn cau git bè gơnoar mờ kơnòl he dê tàm dơ̆ tĕ khà mờr tus.

Ồng Nguyễn Đăng Chung, Chủ tịch Ủy ban Nhân dân xã, Phó Chủ tịch Ủy ban tĕ khà xã Đông, kơnhoàl Kbang, càr Gia Lai pà git, xã neh kờp sền, lir mat cau tĕ khà, mờ kung sùm yal tơnggit, mblàng yal nàng dong jơh ală cau tĕ khà ndrờm git mờ lam lơh tơl làm gơnoar he dê: “Tus tŭ do, bè broă rơcang tus tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026 den bol hi lam lơh di mờ tŭ tơngai hơ pơrgon, gàr cồng nha broă lơh. Broă cih mat cau tĕ khà den bol hi neh geh sră nggal đơng lam kuang àng xã in đơng lam lam lơh mờ ală thôn, tus tŭ do den tàm xã neh geh mat ing bơh cau tĕ khà dê mờ bol añ gam jàu wơl ai ală thôn in kờp sền jơh nàng ờ gơtìp lơh huĭ mờ gàr bè ală gơnoar bơh cau tĕ khà tàm xã dê”.

Gơwèt mờ xã Đăk Talay, kơnhoàl Mang Yang, geh rlau 80% khà kờp làng bol là cau Bahnar, bàr ngai dùl dơ̆, kuang bàng xã đì rơndeh măi, ai loa pờ tơlik jơnau đơs làm bă tiah mờ pờ tơlik jơnau đơs mblàng yal làng bol in. Phàt sră cih jơnau tơnggit bè tĕ khà kung bè băng kup sap đơs geh đơs mờ dà kòn cau Bahnar mờ dà yoan nàng tơl nă cau in ƀuơn git. Bi Đinh Gôn, Kuang bàng xã Đăk Talay pà git: “Làng bol tàm do lòt lơh broă bơh àng drim gờñ, trồ mho pơgap 5, 6 jơ hơ̆ sồng rê. Sùm den bol hi lòt mblàng yal mờ loa pờ tơlik jơnau đơs bơh 5 jơ nàng làng bol in gơtùi klo uă. Mblàng yal mờ dà kòn cau. Bol hi mblàng yal bè hơ̆ den hơ̆ sồng làng bol wă, git mờ dà đơs kòn cau he dê”.

Ồng Đinh Đình Chi, Kuang atbồ Trung tâm Văn hóa Thông tin mờ Truyền thông kơnhoàl Kbang pà git, mờ bơta krơi is mờr 46% khà kờp làng bol bơh kơnhoàl dê là làng bol jơi bơtiàn kòn cau dùl êt nă cau, broă mblàng yal ală cau do in mờ uă broă lơh, dipal mờ niam chài tơl jơi bơtiàn kòn cau dê. Dùl đah den mpồl mblàng yal bè broă lơh tĕ khà bơh loa pờ tơlik jơnau đơs tàm ƀòn lơgar, đah ndai den mblàng yal mờ rùp sềr mờ yal tơnggit làm bă tiah: “Mờ tơngume mờ jơnau pơlam bơh Ban Tuyên giáo kung bè mpồl mblàng yal bơh Ủy ban tĕ khà dê, den tiah tờm gam sềr, lip, cih gơs jơnau mblàng tàm kơnhoàl, tiah tờm thị trấn. Tus tŭ do den broă lơh mblàng yal mờ rùp sềr kung neh geh lam lơh tàm rlau 300 thơk vuông pano, áp phích. Bơt bơtàu ală broă lơh, tơngume wèt tus tĕ khà. Mpồl yal tơnggit làm bă tiah neh cih ală jơnau lơh lèu, tơngume, đal git ală anih tus nàng tơrgùm tàm broă mblàng yal”.

Broă mblàng yal bè tĕ khà tàm Gia Lai li la broă lơh bơh rùp sềr, jơnau cih, ngui uă ngan rlau jơh anih yal tơnggit, sền gròi li la ală broă lơh mblàng yal mờ bơr. Sơlơ mblàng yal tàm tiah làng bol jơi bơtiàn kòn cau dùl êt nă cau mờ dà kòn cau Jrai, dà kòn cau Bahnar. Mò Phạm Thị Lan, Phó Chủ tịch Mặt trận dà lơgar Việt Nam càr Gia Lai đơs nền cồng nha bơh mpồl cau mblàng jơnau mờ bơr neh sền gŏ loh làng ngan tàm ală tiah sar lơgar ngài: “Kuơmàng là ală cau geh bơngă pin dờn, ală cau kra ƀòn, cau atbồ thôn ngui dà đơs kòn cau khi dê, dà đơs tàm tiah hơ̆ dê bè dà kòn cau Jrai, Bahnar nàng yal ală jơnau tơnggit jat nùs nhơm bal tus mờ tơl nă làng bol. Bơh mpồl yal tơnggit do den uă ngan làng bol, ngan là làng bol jơi bơtiàn kòn cau dùl êt nă cau khi kung geh ală bơta git wă, ngui sră pồ he dê nàng pồ ală cau geh tơl nùs nhơm, pràn jak, bơta chài nàng tus bal kuang bàng Hội đồng Nhân dân ală kấp”.

Ngai tĕ khà Quốc hội khóa 15 mờ Hội đồng Nhân dân ală kấp tơngai lơh broă bơh nam 2021 tus nam 2026 gam tus rềp. Cau tĕ khà ală jơi bơtiàn kòn cau tàm Gia Lai gam rơcang kơp gơn wă rò ngai chờ dờng.

Cau mblàng K’Duẩn