VOV4.K’ho- Tŭ do, càr Gia Lai geh 16 tàm 17 rơndăp broă lơh gam geh lơh mờ kờp jơh bơta pràn lơh geh rơlao 1.200 MW, mờ khà priă rơlao 40 rơbô tơmàn đong. Mơya, broă ală cau tờm bơcri priă “tàm pơrlòng” lơh nàng di tŭ pờ ồs đèng gờñ lài mờ ngai 31 nhai 10 nam 2021 nàng geh dờp khà priă uă rơlao jăt mờ gùng dà broă lơh bơh Chính phủ dê neh lơh gơlĭk geh uă broă gơtìp kal ke tàm broă lơh mờ ngui cau lơh broă. UBND càr Gia Lai pà gĭt, càr do gam tơrgùm bơsong mờ gờñ geh bơsong gơs ală bơta kal ke do.

Jăt cồng nha gròi sền lồi nhai 4 nam 2021 bơh Sở Công thương càr Gia Lai dê, tŭ do geh 16 tàm 17 rơndăp broă lơh ồs đèng càr gam geh lơh, mơya uă cau tờm bơcri priă lơh ờ hềt lơh gơs ală sră nggal ơpah ù jăt jơnau cih tàm adăt ù tiah.

Tàm broă lơh jăt ală rơndăp broă lơh ồs đèng càl tàm càr Gia Lai gơlĭk geh uă broă

Is ngan, geh ờ uă rơndăp broă lơh tàm kơnhoàl Kông Chro lơh ờ uă broă lơh tàm ù brê. Ồng Nguyễn Duy Lộc, Phó kuang atbồ Sở Công thương càr Gia Lai pà gĭt, geh bơta do là tài do là ală broă lơh cấp 1, gơwèt broă atbồ bơh Bộ Công thương. Tŭ lơh, ală mpồl lơh broă mìng yal gơnoar atbồ kơnhoàl in, den tàng tŭ sền gròi mùl màl tàm lồi nhai 4 nam 2021, gah công thương hơ̆ sồng gĭt. Mờ ală rơndăp broă lơh ồs đèng càl tàm ù brê, Sở geh dan nàng ai bă ù do lĭk bơdìh rơndăp broă ai ù tiah brê bơnơm dê.

Ồng Nguyễn Duy Lộc, Phó kuang atbồ Sở Công thương càr Gia Lai pà gĭt, sở gam pơgồp bal mờ ală gah lơh broă bal mờ cau tờm bơcri priă lơh ồs đèng càl nàng lơh niam wơl, lơh gơs sră nggal di jăt jơnau cih bơh kơrnoăt geh ai: “Ală mpồl lơh broă yal là tàm broă mŭt lơh, sră nggal ơpah ù gam geh sền nàng gĭt, ală anih lơh broă geh gơnoar gam kơlôi sơnơng. Sở Công thương gam pơlam niam càr in broă lơh do. Jăt gùng dà là gĭt jơnau bal tàm adăt boh lam, bol añ ai tơl bơta niam nàng cau tờm bơcri priă lơh bơsong kal ke di tŭ ală phan tus tềng anih lơh broă, ờ gŏ di geh jơnau ai tơl bơta mờ sơgràm adăt boh lam”.

Càr Gia Lai gam tơrgùm bơsong ală broă gơlĭk geh

Broă geh pơnrơ ngan ndai tàm ală rơndăp broă lơh ồs đèng càl tŭ do là broă ngui mờr 300 nă cau lơh broă lơgar bơdìh (mìng là cau lơgar Lo) ờ hềt geh ai sră. Ồng Nguyễn Văn Lộc, Phó Kuang atbồ anih lơh broă drơng broă anih lơh broă UBND càr Gai Lai pà gĭt, neh geh sră nggal bơh UBND càr sồr geh ờ uă mpồl lơh broă tơrgùm bơsong nền nòn broă do. Gùng dà broă lơh là, di lah mpồl lơh sa kă bro ờ lơh gơs sră nggal ai cau jăk chài lơgar bơdìh in di jăt mờ kơrnoăt geh ai, càr geh lơh jăt broă tơnrê ală cau lơh broă lơgar bơdìh ờ geh sră nggal: “Càr đơng lam jào ală anih lơh broă geh gơnoar sền gròi tơl pang sră, cau lơi tus tàm ngai lơi, là cau jăk chài ha là cau lơh broă bè ờs nàng geh tơlĭk ală kơrnoăt lơh glài tìs gơwèt mờ cau lơh broă mờ mpồl lơh sa kă bro ngui cau lơh broă. Ờ tơl sră nggal den tơnrê. Kơnòl tờm tàm do bè atbồ, sền gròi sră geh ai lơh broă cau lơh broă là Sở Lao động– Thương binh mờ Xã hội, tơnrê ha là ờ là kuang àng càr geh jơnau. Mơya tài broă do gam lơh sră nggal den tàng ală mpồl lơh broă neh geh sră nggal dan tơnjŏ tơngai nàng bơsong”.

Cau cih Nguyễn Thảo-Cau mblàng Ndong Brawl