VOV4.K’ho - Mpồl đơng lam rơcang sơndră mờ kòp càr Gia Lai neh tơlik Rơndăp broă lơh tơrlòng atbồ cau gơtìp kòp Covid-19 ờ geh tơngŏ kòp, cau gơtờp wơl virus Sars CoV-2 mờ cau tìp rềp (F1) mờ cau kòp tàm ƀòn ơm kis.

       Càr Gia Lai tơrlòng tam cah is cau F0 ờ tơngŏ kòp, cau gơtờp wơl virus Sars CoV-2 mờ cau F1 tàm hìu

Mùl màl, tàm Kơrnoăt bơh Mpồl đơng lam rơcang sơndră mờ kòp Covid-19 càr Gia Lai ual: Bơh nhai 10 nam 2021 tus tŭ do, làng bol rê is gơguh ni sơna lơh ală tiah tam cah ngài tơrgùm bal gơtìp hăt ir cau, khà cau F0 gơguh mhar. Càr Gia Lai neh lơh gơs 2 hìu sơnơm ing sơm F0, mơya kung neh hăt sơl. Jăt rơndăp broă pa geh ai tơlik, càr Gia Lai geh tơrlòng sơm F0 geh gŏ tai mờ virus geh tam cah is tàm hìu di lah ờ tơngŏ mờ kòp; cau neh cit tơl 2 ding sơnơm vaccine rơcang sơndră mờ kòp Covid-19; cau bơh rơlao 1 sơnam tus hờ đơm 50 sơnam, ờ gơtìp kòp lài, ờ geh bun. Broă atbồ tàm hìu ơm kis tàm càr Gia Lai gơwèt mờ F0 geh gŏ wơl mờ virus Sars-CoV-2 kờp bơh ngai 01 nhai 12 nam 2021, gơwèt mờ cau F0 ờ tơngŏ mờ kòp geh ngui tŭ càr geh bơh 5 rơbô nă cau rơlao hờ đang.

Cau mblàng Ndong Brawl