VOV4.K’ho- Rlau 34 lồ brê rơcang gàr bồ tô tàm Tiểu khu 1065 bơh Ủy ban Nhân dân xã H’Bông, kơnhoàl Chư Sê, càr Gia Lai atbồ gơtìp mus kơl, cò tơnring tàm sùm bơh nhai 3 nam 2021 tus bồ nhai 9 nam 2021. Pal tus tŭ 34 lồ brê gơtìp ală bol blơ̆ mus kơl, cò tơnring jơh, 23 lồ tàm hơ̆ neh tam tờm bạch đàn, den mpồl lơh broă geh gơnoar kơnhoàl dê hơ̆ sồng git gŏ, kơryan. Broă sơ gràm aniai brê kơn jơ̆ ngan do ờ mìng ai gŏ bơta tràl sơbil bơh ală bol blơ̆ lơh tìs dê, mờ gam ai tơnggŏ bơta ờ niam tàm broă jàu brê, atbồ brê tàm tiah do.

Broă lơh tìs gơlik geh tàm ală bơnah brê 1, 2 mờ 4, Tiểu khu 1065, brê rơcang gàr bồ tô gơ wèt bơnah brê atbồ bơh Ủy ban Nhân dân xã H’Bông, kơnhoàl Chư Sê dê. Tàm anih gơlik geh broă lơh tìs, ală bol tờm lơh neh lơh tual tang mờ wil tơl phan drơng ngui sa mờ jun măi mok mut nàng cò tơnring brê, tam rlau 23 lồ mờ nggùl bạch đàn, 11 lồ gam wơl neh geh jì wàs jơh tờm chi brê. Mò Rmah H’Bé Nét, Chủ tịch Ủy ban Nhân dân kơnhoàl Chư Sê, càr Gia Lai pà git, ală gah broă lơh bơh kơnhoàl dê đơs, broă sơ gràm aniai brê rơcang gàr bồ tô kơn jơ̆ ngan do gơlik geh tàm sùm nggùl nam do, bơh nhai 3 tus nhai 9 nam 2021, tŭ tơngai jơh mpồl lơh broă chính trị tàm kơnhoàl tơrgùm sơndră kòp: “Nam 2021, kơnhoàl Chư Sê geh kòp Covid-19. Xã H’Bông geh 1 thôn pal wàng se, den tàng mpồl lơh broă chính trị tơrgùm tàm broă sơndră kòp, mpồl lơh broă ờ uă, gròi sền ờ tơl làm. Den tàng lời gơlik geh bơta do, bol hi kung dờp geh bơta ờ niam”.

Bol lơh tìs lơh tual tang mờ lam măi mok mut tàm brê nàng cò tơnring, tam tờm bạch đàn. Kờp jơh bă brê rơcang gàr bồ tô gơtìp sơ gràm phà là 34,6 lồ

Bơdìh mờ jơnau geh tơn do, ồng Bùi Văn Cường, Phó Chủ tịch Ủy ban Nhân dân xã H’Bông, kơnhoàl Chư Sê đơs là, gam geh ală bơta ờ niam tàm broă lơh jàu brê. Ồng Cường pà git, nggùl nam 2019, tŭ Mpồl atbồ brê rơcang gàr bồ tô Ayun Pa gơtìp tơn jơh lơh broă, xã geh jàu rlau 3 rbô 800 lồ brê, tàm hơ̆ geh rlau 2 rbô 100 lồ là brê rơcang gàr bồ tô mơya ờ geh phan bơna mờ mpồl lơh broă mờng chài nàng lam lơh kơnòl broă. Bơnah brê bơh xã dê là brê rềp nhàr mờ 2 kơnhoàl Phú Thiện mờ mang Yang, kung lơh broă sền gàr brê gơtìp uă kal ke: “Tơnơ̆ tŭ xã H’Bông dờp bơnah brê do den geh uă kal ke bè lòt gan gùng dà dờng halà gan 2 kơnhoàl Phú Thiện, Ia Pa, jơh lòt jơh rê mờr 100 kơi sồ. Ủy ban Nhân dân xã ờ geh mpồl lơh broă mờng chài bè đah kiểm lâm”.

Gơ rềng tus broă mus kơl brê kơn jơ̆ngan do, ồng Thái Thượng Hải, Kuang atbồ Hạt Kiểm lâm kơnhoàl Chư Sê pà git, mpồl gam lơh ngan lùp khàu, lơh loh ală cau lơh tìs: “Broă lơh tìs do là jơn jơ̆ ngan, den tàng Hạt Kiểm lâm neh bal mờ ală gah broă lơh geh gơnoar bè anih lơh broă cảnh sát lùp khàu, Viện Kiểm sát lòt sền anih gơlik geh broă lơh tìs. Bơh sơn rờp kung neh hòi alà cau geh gơ rềng, ai jơnau yal nàng ggit git cau tờm broă lơh tìs do. Mờ bă brê gơtìp cò tơnring dờng ngan, kuơmàng do là brê rơcang gàr bồ tô den Hạt Kiểm lâm lơh ngan rơcang sơndră, jòi cau lơh tìs, lơh glài kràñ jat adat boh lam”.

Bol lơh tìs neh thàn tam 23,5 lồ bạch đàn tàm bă ù brê rơcang gàr bồ tô

Bal mờ broă đơng lam lơh ngan lùp khàu, lơh loh broă lơh tìs, Ủy ban Nhân dân kơnhoàl Chư Sê kung neh yal broă lơh tìs tus Ủy ban Nhân dân càr Gia Lai, Sở Nông nghiệp mờ Phát triển Nông thôn càr, dan jàu brê rơcang gàr bồ tô tàm kơnhoàl ai ală mpồl mờng chài in nàng broă lơh sền gàr, atbồ brê geh cồng nha niam rlau.

Cau mblàng K’Duẩn