Ală cau geh nùs nhơm dong kờl tiah sơnrờp tam dră mờ kòp càr Gai Lai

    Phan ngui, phan sa bơh ală cau geh nùs nhơm niam pà geh pơn diang tus tàm tiah tam cah is tơrgùm bal

Gam bi Phạm Thăng Bằng, cau tờm dùl suơn tam bơkào lan tàm ƀòn dờng Pleiku neh bal mờ ală cau tàm mpồl “bơkào lan Gia Lai” jào pà 29 tơlăk đong mờ 100 thùng ƀung mi ai Mpồl đơng lam rơcang sơndră mờ kòp Covid-19 càr Gia Lai in. Bi Phạm Thăng Bằng pà git: “Añ kơ̆p kờñ là ală anih lơh broă, ală gah mpồl lơh broă bal mờ làng bol dùl nùs bal tam klăc bal, lơh jăt jơnau bơto sồr bơh gơnoar atbồ dê nàng he kơrian jơh kòp gơtờp, lơh gơs jăt jơnau kơ̆p kờñ bơh gùt làng bol gam kơ̆p kờñ là tơn jơh kòp gơtờp sơlơ gờñ sơlơ niam”. Kung bal mờ nùs nhơm “dong kờl bal”, ală ngai do, geh gal ală mpồl lơh broă nùs nhơm dong kờl neh tă pơgồp uă phan lơh sơnơm bè chèo, dà lơh kloh vi khuẩn tê, mờ uă tấn biăp, kơnuh, plai chi ală bơta nàng dong kờl ai ală cau tàm tiah sơnrờp gam ngai kung bè mang tam dră mờ kòp in.

Jăt Ủy ban Mặt trận dà lơgar Việt Nam càr Gia Lai đơs, tơnơ̆ mờ rơlao 3 nhai lam sồr, gah lơh broă do neh dờp priă bal mờ phan bơh 345 mpồl, cau dùl nă să lơh is tă dong kờl tàm broă rơcang sơndră mờ kòp Covid-19 càr Gia Lai in mờ khà priă mờr 22 tơmàn đong. Mò Phạm Thị Lan, Phó Chủ tịch Ủy ban Mặt trận dà lơgar càr Gia Lai pà git: “Bol añ neh tơlik jơnau hòi jà mờ broă ring nùs bal bơh ală mpồl lơh broă, ală cau dùl nă să is, ală anih lơh broă, ală mpồl lơh sa kă bro dờp bal mờ dong kờl bal broă rơcang sơndră mờ kòp Covid-19. Bol añ geh ngui khà dong kờl do nàng di tŭ dong kờl ală anih tam cah is bơh mpồl ling càr bal mờ ală hìu sơnơm, mờ kung dong kờl làng bol tàm tiah gơtìp kòp tơmù bơta kal ke, ring niam rài kis. Kơ̆p kờñ là, mờ broă tam klăc dùl nùs bal den he geh lơh ngan nàng kơrian jơh kòp gơtờp”.

Cau cih Hoàng Qui-Cau mblàng Ndong Brawl