VOV4.K’ho – Drim òr (09/8), càr Gialai bơyai lơh Pơrjum tơn jơh srơh pơr lòng kờ` gơboh dà lơgar tàm làng bol jat yàng bàp (tơngai bơh nam 2012 tus nam 2017), bơh hơ\, jờng rơ, pà bằng khen ai 120 nă cau jat yàng bàp geh cồng nha jak ngan in. Tu\ do, Gialai geh rlau 124 rbô nă cau jat yàng bàp, geh mờr 9% khà kờp làng bol càr dê. Tàm hơ\, geh 340 nă cau geh Đảng, 257 nă kuang bàng HĐND ală kấp. Bal mờ hơ\, gam geh uă cau jat yàng bàp at gơnoar broă tàm ală anih lơh broă dà lơgar mờ ală mpồl chính trị bơh dà lơgar tus kơnă hơ đơm.

Tơngai lài, làng bol jat yàng bàp tàm càr Gialai sùm tam klac bal, lòt bal bơt bơtàu gơnoar atbồ làng bol, bơt bơtàu rài kis ngac ngar jak chài mờ jơh nùs tus bal sền gàr ngap lơngai, sền gàr dà lơgar. Tàm pơrjum, 60 nă cau là cau jat yàng bàp neh geh dờp bằng khen bơh UBND càr, Ủy ban Mặt trận dà lơgar càr Gialai mờ 60 nă cau ndai geh jờng rơ tài geh cồng nha jak ngan tàm srơh pơr lòng kờ` gơboh dà lơgar.