VOV4.K’ho– Quý 1 nam 2021, priă lơh geh bơh tac phan hờ lơgar ndai càr Dak Lak dê mìng geh 95 tơlak dolar Mỹ, geh 14,6% broă rơndap lơh tàm nam mờ gơmù rlau 20% pơndrờm bal mờ dùl tŭ nam lài. Dùl tàm ală jơnau lơh priă geh bơh tac phan hờ lơgar ndai bơh càr Dak Lak dê gơmù uă là tài gơ rềng bơh kòp Covid-19 tàm dunia, ală gah ơhò ờ tơl container nàng jàu mpồl tac phan hờ lơgar ndai in ơn phan.

Là dùl tàm ală mpồl lơh sa kă bro gam pal kong mờ kal ke tài ờ gơtùi tac phan hờ lơgar ndai, ồng Nguyễn Xuân Lợi, Kuang atbồ Kong ti Cổ phần bơcri priă mờ bơtàu tơnguh An Thái pà git: Tŭ do, uă sră pơrgon tac phan tus tơngai pal jàu ai mpồl blơi phan in mơya pal kơp tus dơ̆ geh ơhò rơndap tap sèng ơn phan. Ờ tơl container ơn phan kung lơh priă pơndiang phan gơguh uă ngan. Mùl màl: ală dơ̆ pơndiang tus Mỹ, lòt tus châu Âu gơguh 3 dơ̆ pơndrờm mờ lài, priă ơpah pơndiang lòt tus ală lơgar gơ wèt tiah Đông Nam Á kung gơguh bơh 25 tus 40%: “Tŭ ờ tơl container ơn phan den broă pơndiang sơlơ kal ke rlau den lơh gơbàn dùl ròt ală broă gơlik geh. Lài ngan là tŭ tơngai prap phan tàm anih prap ơn gơguh, dơ̆ 2 tai là tŭ tơngai ơn tàm ơhò jŏ rlau, tơngai ơpah cau jŏ rlau, lơh priă jền ơpah pơndiang gơguh uă. Den tàng nam do mpồl lơh sa kă bro ngan là gơmù priă cồng mờ digơlan pal tơm hoàc huơr tai”.

Kung ndrờm bè do sơl, ồng Lê Đức Huy, Phó Kuang atbồ Kong ti TNHH MTV tac mờ blơi phan bơh lơgar ndai 2-9 Dak Lak pà git, quý 1 nam do, 2 bơta phan tac hờ lơgar ndai tờm ngan bơh Kong ti dê là tiêu mờ kơphe ndrờm gơmù uă, gơmù tus 60% pơndrờm mờ nam lài. Mpồl lơh sa kă bro pal ờ dơp uă sră pơrgon tac phan tus bơh mpồl lơh broă bal châu Âu tài ờ gơtùi jòi geh ơhò nàng pơndiang. Geh tŭ ală sră pơrgon neh kĭ bơh jŏ den tŭ do kung gam tàm bơta phan ơm hờ bơdìh anih ơhò ơm nàng kơp tus dơ̆ geh tơmut tàm ơhò: “Bơh lồi nam 2020 bồ nam 2021 mờ tus tŭ do den khà container gời ờ geh tàm ală lơgar châu Á den tàng lơh priă ơpah ơhò lòt bơh ală lơgar châu Á lòt gan drà kă bro Mỹ halà châu Âu den gơguh êt ngan rlau jơh là 4 dơ̆, uă den 6 dơ̆. Phan mùl geh, cau blơi kung kờñ phan, mơya tŭ lòt sền priă ơpah ơho den jơh bal 2 gah ndrờm ring bal là pơndiang lơyài wơl, dilah ờ den hoàc huơr ir, ờ jai kong, geh ală sră pơrgon tac phan khi ntrờn wơl bơh quý 1 tus quý 2”.

Ồng Huỳnh Ngọc Dương, Phó Kuang atbồ Sở Công thương càr Dak Lak pà git, càr do tŭ do geh 21 mpồl lơh sa kă bro tac phan hờ lơgar ndai. Tàm quý 1 nam do, priă lơh geh bơh tac phan hờ lơgar ndai càr dê mìng geh 95 tơlak dolar Mỹ, geh 14,6% broă rơndap lơh tàm nam mờ gơmù rlau 20% pơndrờm mờ bal dùl tŭ nam 2020. Tài tac phan hờ lơgar ndai jat gùng dà lềng gơtìp kal ke, nàng dong kờl mpồl lơh sa kă bro, Sở Công thương càr Dak Lak gam jơh nùs tơnguh ală broă lơh tơrbŏ bal, rề ơnàng drà kă bro tac phan lơh gơs, tơrgùm ngui công nghệ thông tin kă bro điện tử ai mpồl lơh sa kă bro in. Mờ kung lơh broă mờ Cục tac mờ blơi phan bơh lơgar ndai gơ wèt Bộ Công thương bơyai lơh broă lơh hòi jà bơcri priă kă bro nàng ală mpồl lơh sa kă bro tac phan hờ lơgar ndai bơh càr dê gơtùi tus bal mờ ală mpồl dong kờl kă bro lơgar he dê tàm lơgar ndai kung bè ală mpồl lơh sa blơi phan bơh lơgar ndai nàng bal mờ gơp jòi broă lơh dipal: “Bol hi kung neh lơh broă mờ jơh ală Sở Công thương jat kềng tiah nhàr dà lơgar tiah đah tô, bơh hơ̆ den khi geh yal tơnggit, broă kă bro tiah nhàr dà lơgar di tŭ nàng gơtùi rơcang tơl khà phan tàm do. Bal mờ hơ̆ tai là tŭ do bol hi kung neh yal tơnggit mờ 2, 3 mpồl lơh sa kă bro tàm ală mpồng nhàr lơgar nàng khi rơcang dong kờl mpồl lơh sa kă bro Dak Lak in ơpah anih prap phan, jồm anih prap phan, dong tui iờ phan dilah bơta kòn yan tŭ jàu phan tàm mpồng nhàr dà lơgar gơlik geh”.

Cau mblàng K’Duẩn