VOV4.K’ho - Tàm kơnhoàl Ea H’leo, càr Dăk Lăk, gah bơto bơtê mờ bơsram neh lơh jăt bơta ngăc ngar ală gùng dà broă bơto mờ bơsram tơn mờ bơto mờ bơsram pờ tàm internet nàng gàr niam broă bơsram sră ai kơnòm bơsram in tềng đăp mờ bơta kal ke bơh kòp Covid-19.

Rơlao dùl poh do, tàm tŭ kòp Covid-19 geh sền gròi, Hìu bơsram cấp 1 Ea H’leo, kơnhoàl Ea H’leo neh mhar bơyai lơh ai kơnòm bơsram in tus lòt bơsram wơl tàm ơdŭ bơsram.

                            Hìu bơsram cấp 1 Ea H'leo tus wơl bơsram tàm ơdŭ bơsram

Pơgru Nguyễn Văn Tân, Kuang atbồ hìu bơsram pà git, tŭ do hìu bơsram geh 16 ơdŭ mờ 523 nă kơnòm bơsram, tàm hơ̆, kơnòm bơsram kòn cau geh 216 nă. “Nàng gàr niam broă bơto bơsram ờ do ờ dă ai ală kơnòm bơsram in, hìu bơsram kung neh dan mờ ală cấp ƀồm sơnơm lơh kloh vi khuẩn, pơs wàs kloh niam, geh dà rào tê. Hìu bơsram bơyai lơh tam pà dềt ơdŭ bơsram nàng gàr niam khà kơnòm bơsram hờ đơm 30 nă tàm dùl ơdŭ. Hìu bơsram dan mờ ală cấp cit tơl sơnơm ai mpồl kuang bàng, cau lơh broă in. Bè khà kơnòm bơsram ơm ing ờ lòt bơsram tài bơta ală kơnòm bơsram pal tam cah is den hìu bơsram neh ai broă bơto bơsram ai ală kơnòm bơsram in mờ broă jào jơnau bơsram”.

Oh Nguyễn Phạm Bảo An, bơsram ơdŭ 5A, hìu bơsram cấp 1 Ea H’leo chờ hờp ngan tài geh lòt bơsram wơl tơnơ̆ mờ dùl tơngai ơm tam cah ngài tài kòp gơtờp. “Tŭ oh lòt bơssram, oh gơlơh chờ hờp ngan tài geh tìp wơl ală bơyô mờ ală cau pơgru. Tŭ oh bơsram tàm hìu den ală jơnau kal ke oh ờ gơtùi lùp pơgru mờ nhắn tin tàm zalo nàng lùp. Gam bơsram tàm hìu bơsram den pơgru gơtùi bơto oh tơn”.

        Bơto bơsram tơn tàm ơdŭ, ală hìu bơsram pal lơh jăt nền nòn broă rơcang sơndră mờ kòp gơtờp

Ndrờm bal ală broă bơto mờ bơsram tơn tàm ơdŭ mờ bơsram pờ tơlik tàm internet, jào jơnau bơsram… jăt mờ bơta kòp covid-19 neh geh ală hìu bơsram tàm kơnhoàl Ea H’leo, càr Dăk Lăk lơh jăt di pal ngan. Pơgru Nguyễn Thị Minh Trường, Phó kuang atbồ Hìu bơsram cấp 1 Ea Khăl pà git: nàng broă bơto bơsram pờ tàm internet geh cồng nha, hìu bơsram neh bơcri priă lơh gùng internet, bơ̆t bơtàu rơndăp broă bơto di pal; pơgru rơcang jơnau bơto jăt broă lơh pa, rơwah tơngu me tờm, tơmù ờ uă ngan nàng ală kơnòm bơsram wă jơnau bơsram. Mờr 500 nă kơnòm bơsram, tàm hơ̆ geh 210 nă kơnòm bơsram kòn cau tàm Hìu bơsram cấp 1 Ea Khăl, xã Ea Khăl, kơnhoàl Ea H’leo neh gơdờp mò broă bơsram pờ tàm internet. “Hìu bơsram kung bơyai lơh ai ală kơnòm bơsram lơi bơsram pờ tơlik tàm internet den ai ală kơnòm bơsram, bơsram tàm internet, ală kơnòm bơsram rềp hìu bal bơsram dùl ơdŭ bal den gơtùi tus ơdŭ ndai nàng bơsram bal, gơtùi 2 nă, 3 nă bơsram bal dùl nơm măi. Ală kơnòm bơsram lơi ờ geh măi bơsram tàm internet den hìu bơsram bơyai lơh bơto mờ broă jào jơnau bơsram. Geh ală kơnòm bơsram tài geh cau pròc mhàm lòt lơh broă tàm tiah ngài rê ală kơnòm ờ gơtùi lòt bơsram, ờ gơtùi tus hờ hìu bơyô bơsram bal den ală cau pơgru gơtùi tus hờ hìu jào jơnau bơsram ai ală kơnòm bơsram hơ̆ in. Ală kơnòm bơssram tàm tiah tam cah is, ală pơgru ờ gơtùi tus tơn geh dan mờ gơnoar atbồ, tus mpồl covid mpồl bơtiàn dong kờl”.

Tŭ do, kơnhoàl Ea H’leo geh 67 hìu bơstam mờ 29 rơbô nă kơnòm bơsram bơh mầm nòn tus cấp 2. Ồng Phạm Văn Đảng, gơnoar atbồ ing Phòng Giáo dục mờ Đào tạo kơnhoàl Ea H’leo pà git: Tài kòp gơtờp gam ờ hềt geh sền gròi, gùt kơnhoàl mìng rơ̆p geh nggùl khà hìu bơsram geh tam gơl lòt bơsram tơn. Broă ờ do ờ dă rơcang sơndră mờ kòp gơtờp sùm geh ală hìu lơh jăt nền nòn. Ală hìu bơsram sùm bơyai lơh lùp sền, kờp ală kơnòm bơsram geh cau pròc mhàm rê bơh tiah gơtìp kòp gam gơtìp tam cah is tàm hìu nàng geh gùng dà broă bơsram sră di pal. “Bè đah phòng Giáo dục mờ Đào tạo neh geh sră nggal đơng lam ală hìu bơsram bơ̆t bơtàu rơndăp broă, broă lơh lài bơto bơsram. Mờ tơl nă cau pơgru pal bơ̆t bơtàu broă lơh lài ai broă bơto ơdŭ bơsram să tờm in, tàm hơ̆ geh sền kuơ bơta niam broă bơto bơsram tus tơl nă kơnòm bơsram in. Bŭ lah mờ broă lơh lơi den bơta ngăc ngar tờm jơnau bơsram kơnòm bơsram pal wă, tŭ bơsram tus tàm jơnau lơi den lơh jơnau bơsram tus tàm bơta hơ̆. Lơh ngan ai tơngai niam tŭ kơnòm bơsram geh bơta bè F0 mờ tàm tiah hơ̆ ờ tơl niam ờ do ờ dă den ală kơnòm bơsram geh tam gơl bơsram pờ tơlik tàm internet, jào jơnau bơsram. Gam tŭ tam gơl tus tiah tơlir gŏ geh niam ờ do ờ dă, lơh jăt broă bơto bơsram ờ do ờ dă den Mpồl đơng lam xã, kuang atbồ hìu bơsram yal ală kơnòm bơsram in lòt bơsram”.

Tus tŭ do, tàm kơnhoàl Ea H’leo cau pơgru mờ kơnòm bơsram ờ gam krơi is tàm broă tam gơl ngăc ngar ală broă bơsram sră. Broă rơcang ai broă bơto bơsram pờ tơlik tàm internet kung bè bơto tơn bơh ală hìu bơsram geh bơyai lơh niam rơlao, dong kờl kơnòm bơsram, bơsram jăt di pal tơngu me, broă bơsram neh geh ai.

Cau cih Tuấn Anh-Cau mblàng Ndong Brawl