VOV4.K’ho-Kông ty Kơphê Đức Lập tàm kơnhoàl Dăk Mil, càr Dăk Nông dê geh Thủ tướng Cíñ phủ kĭ ring bal gùng dà rơndăp tăp sèng wơl, tam gơl pa jăt gùng dà lơh sa bal, dà lơgar ờ ătbồ priă lơh sa lơh gơrềng bơh nam 2015. Bơh hơ̆ tus tŭ do, Kông ty do ờ gơtùi lơh sa bal tài bơh dồs ờ jai tơm tŭ do neh gơguh tus 174 tơmàn đong. Ồng Phạm Tiến Hùng là Kwang ătbồ Kông ty Kơphê Đức Lập pà gĭt, bơnah priă dồs do gơbàn bơh tàm tơngai bơh nam 1999- 2001, kông ty do càn priă bơh bàr pe ngân hàng dê nàng blơi mờ tăc kơphê mờ lơgar ndai. Ồng Phạm Tiến Hùng, đơs: Mìng is priă dồs ngân hàng mờ dồs ală mpồl lơh sa kă bro dê den bơnah priă cồng càn priă gơdeh bơh 6 tus 7 tơmàn đong pah nam. Tàm tŭ hơ̆, kông ty lơh gơlik geh priă cồng mìng geh pơgăp 2 tơmàn đong lơm, ờ tơl nàng tơm priă cồng càn priă. Pah nam kung gam hoàc hươr bơh 5 tus 6 tơmàn đong sơl, den tàng bè hơ̆ kal ke ngan. Mờr 20 nam do ờ gơtùi càn geh khăt dùl bơnah priă càn lơi.

Pal sền ngăc ngan là, ală bơnah priă càn bơh Kông ty Kơphê Đức Lập dê tàm ală ngân hàng geh Ủy ƀan Ñân zân càr Dăk Nông đơs là ai càn ờ di jơnau ai. Nàng lơh jăt lơh sa bal, nam 2016, càr Dăk Nông neh geh sră nggal pơyua ală ngân hàng in sồr tơn jơh 100% ală bơnah priă cồng càn priă gơdeh mờ dùl bơnah dồs tờm ai kông ty do in. Mơya, bơh bàr pe sră nggal tăc bro, tus lồi nam 2019, jơh ală priă dồs tàm ală ngân hàng neh geh tăc ai bàr pe mpồl lơh sa kă bro, cau dùl nă să in, broă cribơyai tơn jơh dồs ờ gơtùi.

Lơh sa bal tàm Kông ty TNHH MTV Nam Nung kung gam gơkòl sơl tài bơh dồs ờ jai tơm rlau 170 tơmàn đong

Bal mờ lơh broă sa sươn sre, broă rơndăp tăp sèng wơl, lơh sa bal tàm gah lơh broă brê bơnơm tàm tiah Tây Nguyên kung gam gơkòl sơl. Kông ty TNHH Một thành viên Nam Nung tàm kơnhoàl Krông Nô, càr Dăk Nông là dùl jơnau ai lơh pơnyơu tŭ neh 6 nam kung gam ờ hềt gơtùi lơh sa bal sơl, tài bơh priă dồs neh rlau 170 tơmàn đong. Tàm hơ̆, mìng is dồs priă nhai cau lơh broă dê neh gơguh tus 20 tơmàn đong, dồs priă blơi sră bảo hiểm 24 tơmàn đong. Khà gam wơl là dồs ală cau lơh broă bal dê, ală mpồl ai càn priă dề. Ồng Hà Hữu Thanh là Phó Kwang ătbồ drơng kơnòl broă Kông ty do pà gĭt, ờ mìng dồs kơnòl lơm, mpồl lơh sa kă bro do gam gơlik geh tai jơnau tam pìt ù mờ làng bol. Tàm khà 1 rbô 100 lồ kau su bơh kông ty dê, tŭ do geh tus 800 lồ gam tam pìt mờ làng bol. Rlau 6 rbô 500 lồ brê jàu ai kông ty in tŭ do tơrgùm kờp mìng gam wơl pơgăp 340 lồ là gam brê, gam wơl là neh gơtìp sơgràm phà nàng tam phan tam. Ồng Hà Hữu Thanh yal: Lơh bè lơi mờ lơh sa bal gơtùi tŭ mờ jơh bal ù tiah, jơtài phan bơna ờ hềt bơsong geh mờ làng bol. Mờ tŭ do, làng bol tam pìt tàm bă ù geh phan tam. Ờ gơtùi lơh sa geh, làng sơgràm ù, cau ngui ù mờ cau tăc tơn, kung geh sơl bàr pe nă cau tăc bro tàm bă ù sơgràm pìt hơ̆. Bè đah kông ty mìng geh yal mờ càr bè hơ̆ gời lơm, gơnăp gơnoar bơh càr dê.

Ndrờm bè càr Dăk Nông sơl, bơta dồs kơnòl bơh ală kông ty lơh broă sa sươn sre brê bơnơm dê kung kal ke ngan sơl tàm ală càr tàm tiah Tây Nguyên. Ồng Lê Danh Thắng là Phó Kwang ătbồ Sở Tài cíñ càr Dăk Lăk dê pà gĭt, uă mpồl lơh sa kă bro, pơnyơu bè Kông ty Kơphê Buôn Ma Thuột, Kông ty Kơphê Dray Hlinh, Kông ty Kơphê Kau su Krông Ana lơh broă ờ geh cồng nha ngan, dồs kơnòl tàm tơngai jŏ jòng. Jăt Adat Mpồl lơh sa kă bro den ală kông ty gơtìp dồs kơnòl ngan bè hơ̆ pal lơh jăt lơh sa gơtìp dồs kơnòl. Mơya, jăt Kơrnoăt 30 bơh Ƀộ Cíñ trị khoă XI mờ Nghị địñ 118 nam 2014 bơh Cíñ phủ dê den ờ geh broă lơh lơh sa gơtìp dồs kơnòl ai ală kông ty lơh broă sa sươn sre brê bơnơm dà lơgar in. Ală kông ty mìng gơtùi lơh jăt tơn jơh lơh broă, mơya broă tơn jơh lơh broă  sùm tàm nđờ nam do kung gam ờ hềt jơh sơl tài bơh ală priă dồs ờ jai tơm mờ tam pìt ù tiah, tam pìt tàm ală sră pơrgon lơh sa kă bro bal, lơh bal, jàu dờp bă ù. Ală bơta gơkòl do kờñ pal geh bơta tus bal bơh ală ƀộ, gah lơh broă dà lơgar dê. Ồng Lê Danh Thắng đơs: Ală tŭ lơh geh ală jơnau ờ gơtùi gĭt lài, geh jơnau là tài bơh ờ rơcăng lài, ờ hềt lơh geh jơnau kờñ bè bơh sơnrờp. Tàm tơngai tus, bol añ geh pơn jăt tai pơgồp bal mờ ală sở, gah lơh broă càr, kờp sền wơl ală jơnau cih bơh kơrnoăt boh lam dê, kung bè bơta gơlik geh ngan ngồn. Jăt tàm bơta hơ̆, tă pơgồp jơnau đơs ai càr in kung bè dan mờ ală ƀộ gah lơh broă dà lơgar di tŭ tă bơsong kal ke, kòl yan ai ală anih lơh broă in.

Neh 6 nam Kông ty Kơphê Đức Lập ờ gơtùi lơh sa bal tài bơnah priă dồs dờng ngan tŭ do neh gơguh tus rlau 174 tơmàn đong  

 Jơh gùt kơnhoàl ù tiah Tây Nguyên geh mờr 100 kông ty lơh broă sa sươn sre brê bơnơm dà lơgar dê, ătbồ mờ ngui rlau 1 tơlak 200 rbô lồ ù. Bơh ală nam 1991, broă rơndăp tăp sèng wơl, tam gơl pa tàm ală mpồl lơh sa kă bro do neh geh lơh jăt gùng dà bơh Đảng, Dà lơgar dê, mờ geh lơh pràn rlau tơnơ̆ Kơrnoăt 30 nam 2014 bơh Ƀộ Cíñ trị khoă XI dê. Bulah bè hơ̆, tơnơ̆ uă nam, broă rơndăp tăp sèng wơl, tam gơl pa kung gam ờ hềt lơh geh uă cồng nha sơl.        

Jơnau tờm bơh broă do dê là tài broă lơh ătbồ ờ pràn jak, ờ gŏ lòt sền, jăt sền gơlam tus lơh sa, kă bro ờ geh cồng nha, jơnau roh ù, roh brê, tăc bro, tam gơl, sơgràm ù tìs mờ kơrnoăt boh lam gơbàn kal ke. Uă bơta ờ niam, ờ pràn jak, bơta tìs gơkòl sùm bơh nam do tus nam ndai, ờ hềt geh bơsong. Bơta do ngan ngồn gơlam tus ală mpồl lơh sa kă bro rơndăp tăp sèng wơl, tam gơl pa lơh sa bal tìp kal ke là jơnau ờ gơtùi pleh klàs, bơta pràn bơh gĭt nđờ rhiang rbô lồ ù gơtìp pơhì pơhà. Broă do gam kờñ bơta tus bal tă bơsong bơh dà lơgar tus ƀòn lơgar dê.

            Cau cih VOV Tây Nguyên- Cau mblàng Lơ Mu K’Yến

Dilah làng bol mờ gơ̆p bơyô kờñ pờ sền jơnau cih dơ̆ sơnrờp dan pờ jăt gùng pơlam do: https://vov4.vov.gov.vn/Kho/chuyen-muc/nghi-quyet-so-30-pal-geh-boh-mul-mal-kong-ty-nong-lam-nghiep-tam-tay-nguyen-jon-c162-409891.aspx