VOV4.K’ho- Hội đồng Nhân dân càr Lâm Đồng khoá X neh sơnđờm mŭt pơrjum dơ̆ 4 nàng kờñ sền swì cồng nha lơh jăt broă lơh bơtàu tơnguh lơh sa- mpồl bơtiàn mờ sền swì, ring bal bàr pe sră yal mờ kơrnoăt kuơmàng. Jăt jơnau yal tàm pơrjum, bulah gơrềng bơh kòp dờng Covid-19 dê mơya Lâm Đồng kung gam gàr geh sùm khà gơguh lơh sa dương rlau 3,1%. Tàm hơ̆, mìng is tiah lơh broă sa sươn sre gơguh 4% mờ lơh sa mờ măy mok mờ bơ̆t bơtàu gơguh 5,5%. Pal sền ngăc là tă dia dà lơgar geh 10 rbô 620 tơmàn đong, gơguh 12,7% pơndrờm bal dùl tŭ mờ nam lài. Mơya, Lâm Đồng kung gam 8 tàm 18 broă jàu lơh sa- mpồl bơtiàn ờ hềt lơh geh jăt di broă rơndăp lơh.

Jơh gùt anih pơrjum dơ̆ 4, Hội đồng Nhân dân càr Lâm Đồng khoă X

Broă lơh sa kă bro bơh mpồl lơh sa kă bro dê tìp uă kal ke; drơng broă ala nhơl chờ gơ ơm dùl anih, priă geh bơh broă drơng ala nhơl chờ gơtìp gơmù uă ngan; mus brê, sơgràm ù brê kung gam gơbàn kal ke ngan sơl; kung gam sơl jơnau tam pà bă, tăc bơnàng ù lơh broă sa sươn sre ờ di jơnau ai bơh kơrnoăt boh lam dê gơlik geh tàm bàr pe tiah....Dơ̆ pơrjum do, càr geh tơrgùm mblàng sền, cribơyai mờ lơh loh ală broă, jăt tàm bơta hơ̆ geh tơlik ală broă lơh nàng lơh niam wơl mờ bơsong, lơh pràn bơtàu tơnguh lơh sa- mpồl bơtiàn mờ lơh gơs ală broă jàu, kơnòl broă kuơmàng tàm tơngai tus.

Cau mblàng Lơ Mu K’Yến