VOV4.K’ho- Ngai do 27/10, Quốc hội cribơyai tơn tàm internet bè rơcăng cih Kơrnoăt bè bàr pe gùng dà broă lơh krơi is bơtàu tơnguh bơh 4 tiah dê, tàm hơ̆ geh: Hải Phòng, Nghệ An, Thanh Hóa mờ Thừa Thiên- Huế. Kềng bơdìh dơ̆ pơrjum Quốc hội, bàr pe nă kuang bàng đơs là, lam lơh gùng dà broă lơh krơi is nàng dong kờl bơtàu tơnguh lơh sa tiah hơ̆ dê là dipal mơya pal hơ pơrgon gàr geh “ù brê, ù sre”.

Bàr pe nă kuang bàng đơs sùm, broă ờ sền gàr geh brê neh lơh gơlik jơnau gơlời wơl kơn jơ̆ ngan, gơrềng ờ niam tus bơtàu tơnguh kơ̆ kơl jăp, kuơmàng tàm tŭ tơngai yal tơngkah laì bè tiah ơm kis bè tŭ do. Den tàng bè hơ̆, gùng dà broă lơh kơrnoăt boh lam krơi is bè ătbồ ù tiah mờ tam gơl jơnau kờñ ngui ù, ngan là ù brê, pơgồp bơnah lơh ƀươn sră pơ àr, lơh gơlik geh bơta ƀươn ai ală tiah in tàm tŭ kờñ ngan pal tam gơl jơnau kờñ ngui ù. Mơya, broă tam gơl pal lơh geh bơta dipal mờ cèng wơl cồng nha ngan ngồn, ngan là sền gàr tiah ơm kis mờ bơtàu tơnguh kơ̆ kơl jăp.

         Cau mblàng Lơ Mu K’Yến