VOV4.K’ho- Ngai bồ poh do dê, Bộ Quốc phòng neh bơyai lơh dơ̆ Lam lơh srơh tàm pơrlòng kuơ màng mờ tơngume “Ling klàng bal mờ gùt lơgar ai bal bơta pràn, dùl nùs bal tàm pơrlòng rcang sơndră kòp mờ jai pha  kòp dờng  Covid-19”. Lơh jat dơ̆ lam lơh, Kuang bàng, cau ling tàm uă mpồl ling tàm gùt lơar neh lơh jat jơnau sồr ai ling dong kờl mpồl ling lơh sơnơm tus tàm ală càr tiah đah Jum dà lơgar in lơh jat kơnòl broă rcang sơndră kòp Covid-19.

Ala mat Quân ủy dà lơgar, Bộ Quốc phòng, Mpồl duh broă tàm pơrlòng- Pà khà jờng Bộ Quốc phòng, lam lơh srơh tàm pơrlòng, Đại tướng ồng Lương Cường Chủ nhiệm Tổng cục Chính trị Ling klàng làng bol đơs loh Srơh tàm pơrlòng kuơ màng “Ling klàng bal mờ gùt lơgar ai bal bơta pràn, dùl nùs bal tàm pơrlòng rcang sơndră kòp mờ jai pha kòp dờng Covid-19”, ai tơl nă Kuang bàng, cau ling in sùm gĭt loh uă ngan nùs nhơm “sơndră mờ kòp bè tam dră mờ bol sò tơm”, “sơlơ kal ke den sơlơ pal lơh ngan tàm pơrlòng”, “neh lơh ngan den sơlơ lơh ngan rlau tai”; “neh tam kăc bal den sơlơ tam klăc bal rlau tai”; “neh jơh nùs lơh ngan den sơlơ jơh nùs lơh ngan rlau tai”, tơnguh uă kơnòl tài làng bol, tài dà lơgar, gĭt wă bơta lơh is sơr lèt gan bơta kal ke, bòl glar, rcang lòt lài tàm broă lơh rcang sơndră kòp, lơh sir jak ngan kơnòl broă chính trị kuơ màng, sền hơ̆ là kơnòl broă tam lơh bơh ling klàng dê tàm rài lơngap lơngai. Jơh ală mpồl ling, Kuang bàng, cau ling gùt ling klàng tàm ală tiah ndrờm lơh ngan ală broă lơh pơgồp bal, dong kờl kấp ủy, gơnoar atbồ ală tiah bơsong bơta kal ke, dong tơn hào phan lơh geh mờ tăc phan lơh geh bơh suơn sre, phan tam lơyah ngai, ai phan bơna kờñ pal geh drơng broă tàm rài kis mờ sền gròi pràn kơl dang să jan ai làng bol in; rcang gùng dà broă lơh rcang sơndră kòp tàm kấp jơnhoa rlau tai nàng di tŭ sơndră, bơsong, ờ lời gơtìp rơmơ̆p ndơl, nisơna tàm tơl bơta gơlik geh.

Đại tướng ồng Lương Cường đơs ngan gùt ling klàng tơrgùm tàm pơrlòng, tơngŏ nùs nhơm lơh ngan jai pha, rcang lài, lơh ngan, lòt lài tàm broă tus bal mờ lơh sir jak ngan kơnòl broă rcang sơndră kòp. Đại tướng ồng Lương Cường đơs:

 Pơn jat tai lơh jat gĭt loh bơta tàm kơnă hơđơm mờ bơta gơlik geh bơh kòp dê, ngan là ală tiah tờm nàng di tŭ cribơyai bal mờ Quân ủy Dà lơgar, Bộ Quốc phòng, mpồl lơh broă kuơ màng bơh Chính phủ dê tàm tiah đah Jum dà lơgar, kuang đơng lam bồ, gah đơng lam mờ Mpồl đơng lam rcang sơndră kòp ală kấp đơng lam geh cồng nha broă lơh rcang sơndră kòp. Sùm pơgồp niam mờ kấp ủy, gơnoar atbồ mờ mpồl ling phàu crong ală tiah gàr niam broă lơh bơh ală mpồl ling, anih gròi sền kòp tàm tiah nhàr lơgar, dà lềng, jơh nùs lơh ngan kơryan broă mut mờ lik tàm lơgar tìs mờ kơrnoat boh lam. Bơyai lơh niam ală tiah ai ơm yah ngài, hìu sơnơm ing, lơh ngan tus bal xét nghiệm mờ cĭt sơnơm vaccine rcang sơndră kòp ai làng bol in, sơm kòp ai cau kòp in, ngan là cau kòp kơn jơ̆ tàm ală hìu sơnơm tàm dơlam mờ bơdìh mpồl ling klàng dê....”

Tàm dơ̆ lam lơh 220 anih tàm tơrbŏ bal tàm gùt ling klàng lơh jat pràn ngan dơ̆ lam lơh Srơh tàm pơrlòng kuơ màng mờ tơngŏ bơta jơh nùs lơh ngan, nùs nhơm, geh kơnòl mờ ală broă lơh ngan ngồn tàm srơh rcang sơndră kòp dờng do. Lơh pôs đồng tàm ù tiah ală càr tiah đah Jum dà lơgar gam geh bơta kòp gơlik geh kal ke, tàm hơ̆ geh ƀòn dờng Hồ Chí Minh, Thiếu tướng Nguyễn Trường Thắng, Tư lệnh Quân khu 7 pà gĭt, tàm khat dùl bơta lơi mpồl ling phàu crong quân khu dê geh lòt lài tàm broă lơh rcang sơndră kòp.

Gùt quân khu pờ dơ̆ tàm pơrlòng uă ngan sơndră kòp dong kờl làng bol, pơgồp bal mờ kấp ủy, gơnoar atbồ, mpồl cau mờ làng bol, ală mpồl lơh broă geh gơnoar lam lơh kràñ cê jơh nùs mờ dơ̆ lĕ bal, lơh jat niam ngan ală broă lơh rcang sơndră kòp, pờ ơnàng tiah tơlir, lơh ết rơ hời tiah pơr hê, lơh tus lơh geh tiah tơlir tàm tiah pơr hê. Mơkung tus bal geh cồng nha broă dong kờl jơgloh, dong kờl kòp jê, lơh ngan ờ lời làng bol jơgloh, ờ tơl phan sa mờ kal ke.

Gơwèt mờ mpồl ling sền gàr tiah nhàr lơgar, Gah đơng lam Mpồl ling sền gàr tiah nhàr lơgar ală càr tiah đah Tô  dà lơgar mờ tiah đah Tô tàm gùl lơgar neh sac rơwah 58 nă Kuang bàng, cau ling lơh sơnơm geh bơta mờng chài uă, geh uă bơta mờng chài tus bal pơlam tàp, bơto pơlam bơh ală cau pơgru, bác sĩ Viện Y học rcang lài ling klàng mờ Kuang bàng cơldŭ cau ling lơh sơnơm mpồl ling sền gàr tiah nhàr dà lơgar dê. Ală cau bơsram tus bal ơdŭ bơto pơlam do neh geh bơto bơtê tơnguh uă bơta mờng chài, broă lơh, bơta chài lơh jat broă rcang sơndră kòp Covid-19, rcang lòt gùng tàm pà bal bơta kal ke mờ ling klàng, làng bol tiah đah Jum dà lơgar dê, rcang niam ngan mờ tơl làm nàng gơtùi sơr băc mhar pơgồp bal lam lơh ală broă lơh ờs mờng, lơh ngan pơgồp bơnah bal mờ mpồl lơh broă tàm tiah lam lài lơh mhar kơryan kòp mờ kơryan geh cồng nha kòp Covid-19 jat jơnau sồr bơh Thủ tướng Chính phủ dê. Tàm dơ̆ ai ling lòt lơh broă, Trung tướng Đỗ Danh Vượng- Chính ủy, Mpồl ling sền gàr tiah nhàr dà lơgar đơs ngan:

Ala mat Đảng ủy, Bộ Tư lệnh añ jàu kơnòl broă ai oh mi in, kơ̆p kờñ bơh Đảng ủy, Bộ Tư lệnh, lài ngan là oh mi gĭt loh bơta ngòt rơngơ̆t, jơnau sồr jal mhar bơh kơnòl broă rcang sơndră kòp mờ bơta gĭt wă tơl làm mờ geh kơnòl, kơnòl broă dờng màng bơh ling klàng dê đơs bal, bơh mpồl ling sền gàr tiah nhàr dà lơgar dê đơs is mờ kuơ màng ngan là mpồl ling cau lơh sơnơm sền gàr tiah nhàr lơgar tàm dơ̆ tam dră do dê; sền gŏ loh bơta chờ hờp geh kơnòl mờ pơn iờ să, jat tàm bơnàng jă hơ̆ sền gĭt loh bơta jơh nùs, bồ tơngoh bơh he dê bal mờ gùt ling klàng gùt làng bol rcang sơndră kòp mờ jai pha kòp dờng. Kung rcang lài dờp khat dùl kơnòl broă lơi jat jơnau sồr bơh tơl anih lơh broă, mpồl lơh broă dê tàm tŭ he geh sồr lòt, nàng lơh mbè lơi bol he rcang sơndră kòp niam ngan rlau jơh mờ jai pha mhar ngan rlau jơh kòp dờng Covid-19, gàr niam pràn kơl dang să jan, bơta ờdo ờdă màng kis bơh làng bol gùt lơgar bol he dê.

 Gơtùi đơs là mờr 2 nam do, Mpồl ling sền gàr tiah nhàr lơgar neh sùm là mpồl ling lam lài tàm tiah lơh broă lam lài, lơh gơs pơng gàr kơ̆ kơljap tàm tiah nhàr lơgar mờ 1 rơbô 974 mpồl anih sền gròi, rlau 8 rơbô 221 nă Kuang bàng, cau ling sền gàr tiah nhàr lơgar tus bal kơryan broă mut mờ lik bơh tàm lơgar tìs mờ kơrnoat boh lam mờ rcang sơndră kòp; lam lơh srơh gùt làng bol tus bal rcang sơndră kòp Covid-19 mờ mut mờ lik tàm lơgar tìs mờ kơrnoat boh lam tàm uă tiah ală gơl gùng tiah nhàr lơgar mờ geh jơnau bơceh lơh tàm pà broă gròi sền broă mut mờ lik bơh tàm lơgar geh cồng nha, gàr niam broă lơh rcang sơndră kòp tàm ală mpồng tiah nhàr lơgar; ờ rơngòt bơta bòl glar kal ke, bơta pơhìn bơtờp kòp nàng jơh nùs, tryang tryồng tus bal dong kờl làng bol tàm ală tiah ai ơm yah ngài, tiah wàng se kơryan kòp. Dơ̆ ai ling lòt lơh broă dơ̆ do ngan là tơngŏ nùs nhơm rcang lài dong kờl ai ală tiah kòp uă “lòt khat dùl tiah lơi, lơh khat dùl broă lơi tŭ Dà lơgar kờñ” bơh cau ling geh griăt tơlir dê.

          Jơnau tơrgùm bal VOV- Cau mblàng K’Hạnh