VOV4.K’ho- Mho ngai 27/9, UBND ƀòn dờng Hà Nội ai ngui sră nggal bè broă tam gơl bàr pe broă lơh rcang sơndră kòp Covid-19 tàm bơta pa tàm ù tiah ƀòn dờng dê.

Làng bol geh lòt tàp pràn să jan đah bơdìh

Ngan ngồn, bơh ngai 28/9, UBND ƀòn dờng ai gơnoar lơh jat bàr pe broă lơh, sồr ală anih lơh sa kă bro, drơng broă, làng bol lơh jat niam jơnau sồr 5K, sồr pal quét mã QR mờ ală broă lơh rcang sơndră kòp bơh Bộ Y tế mờ ƀòn dờng dê, tàm hơ̆ geh: tàp pràn să jan đah bơdìh bè ờ tơrgùm uă ir 10 nă cau; Anih tờm kă bro; anih tàñ mai, anih tăc phan soh, phan bong hàng să jan. UBND ƀòn dờng jàu Sở Y tế in pơgồp bal mờ ală mpồl pơn jat tai lơh jat broă gròi sền gah lơh sơnơm, ngan là lơh xét nghiệm gròi sền 2, 3 ngai dùl dơ̆ tàm ală anih wàng se, anih geh bơta pơhìn bơtờp kòp uă ngan, tiah pơhìn bơtờp kòp uă nàng gròi sền bơta bơtờp kòp; pơn jat tai kờp sền nàng lơh sir broă lơh cĭt vaccine rcang sơndră kòp.

Cau mblàng K’Hạnh