VOV4.K’ho- Tơnơ̆ cồng nha bơh Pơrjum “Cribơyai tă bơsong kal ke gơ wèt tus mờ ală mpồl lơh sa kă bro geh priă bơcri lơgar ndai” dê, drim ngai 06/11, ƀòn dờng Hà Nội pơn jat tai bơyai lơh pơrjum “Cribơyai tă bơsong kal ke gơ wèt tus mờ ală mpồl lơh sa kă bro tàm ƀòn dờng tàm tŭ tơngai kòp Covid-19”. Pơrjum geh bơta tus bal bơh 150 nă kuang bàng, là kuang ala mat 2, 3 bộ, gah broă lơh dà lơgar; kuang đơng lam bồ ƀòn dờng Hà Nội; Hiệp hội mpồl lơh sa kă bro, gah broă lơh, mpồl lơh sa kă bro gam lơh broă tàm ƀòn dờng.

Pơrjum là tŭ nàng kuang đơng lam bồ ƀòn dờng Hà Nội iat ală jơnau dan bơh ală mpồl lơh sa kă bro dê, bơh hơ̆ geh ală broă lơh di tŭ tă bơsong kal ke tàm tŭ tơngai broă lơh sa kă bro gơtìp gơ rềng kơn jơ̆ kơn jut ngan tài bơh kòp Covid-19. Pa do, Ủy ban Nhân dân ƀòn dờng Hà Nội kung neh ai tơlik broă rơndap lơh bè bơtàu tơnguh wơl mờ bơtaù tơnguh lơh sa gơ dờp ờdo ờdă, ngac ngar, gròi sền geh cồng nha kòp Covid-19 tàm quý 4 nam 2021 mờ ală nam 2022, 2023.

Cau mblàng K’Duẩn