VOV4.K’ho- Mho ngai 05/5, ồng Chu Ngọc Anh, Chủ tịch Ủy ban Nhân dân ƀòn dờng Hà Nội neh lòt sền broă lơh rơcang sơndră kòp tàm Hìu sơnơm kòp Nhiệt đới dà lơgar anih sồ 2 tàm kơnhoàl Đông Anh tơnơ̆ tŭ git gŏ 2 nă bác sĩ bơh Hìu sơnơm do dê bơtờp virus Sars CoV-2. Ồng Chu Ngọc Anh pà git, ƀòn dờng neh ring bal mờ Bộ Y tế wàng se mơ jơh gùt anih sồ 2 bơh Hìu sơnơm kòp Nhiệt đới dà lơgar dê. Kơnòl tềng đap mat là mhar kơryan kòp bơtờp, gàr ờdo ờdă ai mpồl y, bác sĩ tàm mpồl lam lài sơndră kòp in. Do kung là broă nàng kơryan kòp bơtờp tus tàm mpồl bơtiàn.

Jat ồng Chu Ngọc Anh đơs, mờ broă gơlik geh kal ke bơh kòp dê, uă jơi tam gơl să pa, ală mpồl lam lài sơndră kòp bè bác sĩ, cau lơh sơnơm neh geh cau bơtờp mờ virus Sars CoV-2. Ồng Chu Ngọc Anh sồr kờp sền jơh mat cau lik bơh hìu sơnơm tàm pơgap 10 ngai do nàng jòi, ai mẫu lơh xét nghiệm, mhar kơryan tiah geh kòp do.

Cau mblàng K’Duẩn