VOV4.K’ho- Jat Liên đoàn Lao động Hà Nội yal, kờp tus jơh ngai 20/5, neh geh jơh 296 Công đoàn anih lơh broă mpồl lơh sa kă bro crơng gơs “Mpồl ờdo ờdă kòp Covid-19” mờ rlau 7 rơbô 800 nă cau tus bal.

Tơnơ̆ 5 ngai lam lơh, jơh Kuang bàng Công đoàn ală tiah lơh sa mờ măy mok mờ lơh gơlik phan Hà Nội dê mut lơh bal, bơto pơlam mpồl Kuang bàng Công đoàn kơnă hơđơm in pơgồp bal mờ mpồl lơh sa kă bro crơng gơs “Mpồl ờdo ờdă kòp Covid-19”. Jơh ală mpồl neh bơt bơtàu broă lơh rcang sơndră, ờ lời gơtìp rơmơ̆p ndơl tềng đap ală bơta nisơna gơlik geh. Pah ngai “Mpồl ờdo ờdă kòp Covid-19” tàm ală mpồl lơh sa kă bro mblàng yal, sồr lơh, bơto pơlam, bơto tơngkah công nhân tàm mpồl lơh jat niam ală broă lơh rcang sơndră kòp tàm tiah lơh broă mờ bơdìh mờ jiơ lơh broă, ngan là lơh jat niam ngan broă sền gròi să jan, pơn chèu glòm muh mat, gàr niam bơta ơm yah ngài, yal mờ gah lơh sơnơm in tiah lòt rê dùl bă ngan ngồn.

Cau mblàng K’Hạnh