VOV4.K’ho - Drim òr (09/04), HĐND càr Gia Lai khoă 11 neh sơn đờm pơrjum dơ̆ 19, tơn jơh tơngai lơh broă bơh nam 2016 tus 2021.

Tàm 5 nam do, HĐND càr Gai Lai khoă 11 neh lơh ngan mờ geh ală cồng nha kuơ màng, mờ 15 tàm 18 broă jào neh lơh geh mờ sơrlèt mờ rơndăp broă geh ai. Tàm hơ̆, broă lơh sa mpồl bơtiàn tàm càr ală nam do sùm tơnguh bơtàu, khà gơguh lơh sa pah nam tàm tơngai geh 7,55%, broă lơh sa pơn jăt tai tam gơl niam di gùng; bơta lơngăp lơngai, rài kis broă lơh sa mpồl bơtiàn geh gàr niam.

Pơrjum do, HĐND càr Gia Lai tơrgùm sền wơl jơh ală cồng nha neh lơh geh, ală broă gam ờ pràn mờ mblàng lơh loh tài ờ pràn, ai geh jơnau bơsram broă mờng chài, ală broă pal pơn jăt tai sền gròi tam gơl pa nàng tơnguh uă bơta niam, cồng nha broă lơh bơh Thường trực HĐND, ală gah lơh broă tàm HĐND, UBND càr, ală anih lơh broă tư pháp tàm tơngai bơh nam 2021 tus 2026.

Cau mblàng Ndong Brawl