VOV4.K’ho - Drim òr (10/12), pơn jăt tai broă pơrjum dơ̆ 4, HĐND càr Gia Lai khoă 12, ală kuang bàng neh yal cồng nha cri bơyai tàm mpồl mờ uă tơngu me kuơ màng.

Ồng Lưu Trung Nghĩa, Kuang atbồ Sở NN mờ PTNT càr Gia Lai đơs bè broă dong kờl blơi phan geh lơh bơh broă lơh sa suơn sre ai làng bol in

Tàm pơrjum, ală kuang bàng neh ring bal mờ tơngu me jơnau yal cồng nha lơh jăt kơnòl lơh sa mpồl bơtiàn, broă đơng lam bơh UBND càr tàm nam 2021.Ală kuang bàng đơs là, bŭ lah gơtìp mờ uă kal ke, tơlòng tài bơh kòp Kovid-19, mơya broă lơh sa mpồl bơtiàn càr Gia Lai nam do geh bơta niam. Bơdìh hơ̆ tai, geh ờ uă broă gơlik geh ờ niam ngan gam geh kung geh kuang bàng song dơ pă yal, cri bơyai tàm pơrjum. Tàm hơ̆, broă bơto, bơsram tàm internet, broă dong kờl tăc phan geh lơh bơh broă lơh sa suơn sre ai làng bol tàm kàl kòp gơtờp geh ală kuang bàng sền gròi.

Ờ niam bơh broă bơto bơsram tàm internet mìng là gơtùi lơh geh cồng nha tàm tiah geh ƀuơn, den tàng lơh gơrềng tus mờ bơta niam broă bơsram sră gơwèt mờ kơnòm bơsram tàm tiah kal ke. Broă dong kờl làng bol, hợp tăk xã blơi phan geh lơh bơh broă lơh sa suơn sre kung ờ hềt mùl màl geh cồng nha tàm kàl kòp gơtờp, pal kơlôi sơnơng geh ală broă lơh cồng nha.

Cau mblàng Ndong Brawl