VOV4.K’ho- Hìu lời kir sơnrai bơh Đại tướng ồng Võ Nguyên Giáp dê tàm thôn An Xá, xã Lộc Thủy, kơnhoàl Lệ Thủy, càr Quảng Bình bơh uă nam do là anih gơlơh rềp mềl ngan mờ mờng kwèng ngan gơwèt mờ làng bol bal mờ cau ling gùt lơgar. Tiah do sùm dờp rò ală nùs nhơm ram mhŭ ngan bơh làng bol làm gùt ù tiah Dà lơgar dê tus còp ies, kah rơngal, kah kơlôi tus cau kwang ling dờng tiơng pơnrơ ngan bè tàm jơnau yal yau bơh jơi bơtiàn dê.

Lòt gan ală mpồng hìu lơh mờ chi neh klàr gơ dô dà jăt tŭ tơngai dê, lòt jăt gùng kòn mŭt tàm hìu Đại tướng ồng Võ Nguyên Giáp dê, gơ trăp tàm mat he dê là sèng tờm cê tàu tơlir jù niam ngan, geh koh ntê niam ngan mờ song ngan. Hìu neh klàr ơm kềng gah hiòng dà dờng Kiến Giang gơwèt thôn An Xá, xã Lộc Thủy, kơnhoàl Lệ Thủy, càr Quảng Bình gơ jăt bal mờ gĭt nđờ jơnau kir sơnrai rơnàng kơnòm să bơh Đại tướng dê. Lài do, tàm rài tam lơh, hìu neh geh tŭ gơtìp chu ồs sa jơh tơn. Nam 1977, jăt jơnau kơ̆p kờñ bơh hìu bơnhă Đại tướng dê, hìu geh lơh wơl tàm bơnàng ù yau jăt di bè hìu yau lài do. Hìu geh tìm rơkàng ƀalhiă ngan, tềng hơđơm rkàng hìu geh tìm tai pang mpìr lơh mpồng nàng ndơl nàng căng gơjrah dà mìu, tơngai jroh. Tàm dơlam hìu geh rơndăp lơh ƀalhiă ngan bal mờ cơldŭ tờm geh lơh tàm gùl hìu là tiah ơn jơnăng duh khuai mò pàng bal mờ rùp bơh Đại tướng ồng Võ Nguyên Giáp dê. Cơldŭ tàm dơlam geh dùl nơm tùh dờng prăp ơn ală phan ngui gam wơl bơh hìu bơnhă dê. Đah bơdìh kềng mum hìu bàr nơm kƀàng cơgĕ nàng rò năc. Gùt dar hìu gam yồng tĕp uă pang rùp kir sơnrai.

Ồng Võ Đại Hàm, là cau hòi Đại tướng mờ ồng jăt rài kòn sau tàm jơi nòi nam do neh mờr 80 sơnam là cau sền gàr Hìu lời kir sơnrai, drơng rơcăng broă chu ñàng tềng jơnăng duh khuai Đại tướng, pà gĭt: Hìu geh lơh tàm bơnàng ù hìu bơh ală ồng pàng dê rài yau, kung lơh mờ dơm chi bè do sơl. Tŭ lơgar Tây sơgràm phà wơl Quảng Bình, sùm lòt ca nô bơh Đồng Hới lòt jăt dà dờng Kiến Giang lơh sơgràm phà mờ neh chu ồs sa hìu do. Tơnơ̆ tŭ tơngklàs dà lơgar, kơnhoàl lơh wơl hìu, jơh tơl nă cau ndrờm kơ̆p kờñ Đại tướng tŭ rê hờ ƀòn tờm geh anih nàng ơm rlô bĭc”.

Hìu lời kir sơnrai Đại tướng ồng Võ Nguyên Giáp kềng gah hiòng dà dờng Kiến Giang

 Broă sền gàr Hìu lời kir sơnrai bơh hìu bơnhă ồng Võ Đại Hàm mờ mò Trần Thị Vân là kòn sau tàm jơi nòi Võ dê lơh. Làng bol mờ cau ling tàm gùt lơgar tŭ lòt còp ies geh wă rò wil tơl ngan mờ iăt yal wơl uă jơnau yal bè sơnam kơnòm dềt bơh Đại tướng dê. Bulah neh uă ngan dơ̆ mŭt tàm hìu do, mơya pah dơ̆ cơnđoà jơng hàu guh tềng mpồng hìu, cau ling yau là ồng Phan Thế Vinh gơlơh ngoh rơngăc ngan tàm nùs. Tài bơh ală dơ̆ Đại tướng rê còp ƀòn tờm, ồng là dùl tàm ală cau geh bơta chờ hờp geh tìp măt, tơm bơh bơr mờ Đại tướng. Cau ling yau ồng Phan Thế Vinh ơm tàm xã Lộc Thủy, kơnhoàl Lệ Thủy đơs: Geh bơta lơi hơ̆ gơ chồl ngan he là pah tŭ tus nam sơnam pa tus ngai chơ̆t bơh wa Giáp dê halà tus ngai tơngkah kir sơnrai ngai deh wa Giáp halà ală ngai lơh chờ añ ndrờm kờñ ngan rê tơrgùm tàm do mờ kah wơl wa. Ndrờm bè wa Giáp kung gam kis sơl mờ rê wơl tàm hìu do.

Hìu lời kir sơnrai Đại tướng ồng Võ Nguyên Giáp

Sơnam kơnòm bơh Đại tướng dê gơ jăt bal mờ dà dờng ƀòn tờm, hiòng dà dờng Kiến Giang lơbơn lơmư dà sàng ngan. Mò Ngô Thị Bảy ơm tàm thôn An Xá, xã Lộc Thủy, kơnhoàl Lê Thủy yal, ală dơ̆ Đại tướng rê còp ƀòn, làng bol tàm ƀòn tus rò gal ngan. Trồ mang, ƀòn lơgar, làng bol tàm ƀòn bơyai lơh đơs crih hò khoan tơn tàm ƀlàng hìu tềng đăp Hìu lời kir sơnrai. Mò Bảy bal mờ mpồl đơs crih tam ya làng bol tàm xã Lộc Thủy đơs ală jơnau đơs crih hò khuan niam ngan, lơh gơkờñ ngan cau iăt. Mò Bảy kah wơl, tŭ hơ̆, Đại tướng ơm nggui kềng mpồng hìu tềng đăp hìu, ơm lềr wềl gùt dar là hìu bơnhă mờ gal ngan làng bol, tàp tê jăt bal ală jơnau đơs crih hò khoan, nùs nhơm hìu bơnhă, nùs nhơm làng bol tàm ƀòn lơgar tam klăc bal chờ hờp ngan gĭt lơh. Mò Bảy yal: Dơ̆ sơnrờp tìp Đại tướng, tŭ hơ̆ gơlơh chờ hờp ngan mơya kung gơlơh mprơm nùs ngan bờh tŭ wa tus kŭp tê. Añ tŭ hơ̆ gam kơnòm ngan mờ đơs: ơi, “sau ưn ngài wa yơ”, kŭp tê wa dê mờ gơlơh ngoh rơngăc tơn den tàng gơtuh đơs “tê wa dê lơbơn ngan ih, mờ tê sau dê den kơldang ngan”, tơnơ̆ hơ̆ añ goh wa ñŏ. Muh mat wa dê gơlơh bè ờ gŏ di là dùl nă cau kwang ling tai ờ mờ gơlơh ndrờm bè là dùl nă cau bèp, cau ồng bơh ƀòn lơgar dê, rềp mềl ngan, niam ngan mờ sơnđàc làng bol”.

Phó Củ tịc lơgar mò Võ Thị Ánh Xuân chu ñàng, kah rơngal, kah kơlôi Đại tướng ồng Võ Nguyên Giáp tàm Hìu lời kir sơnrai

 Hìu ƀalhiă, dềt rơhền ngan ơm kềng gah dà dờng Kiến Giang gơ jăt bal mờ gĭt nđờ jơnau kir sơnrai bơh rài gam kơnòm tus dì tŭ Đại tướng sơnam neh dờng să ờ gam sô tai. Tŭ do, Hìu lời kir sơnrai bơh Đại tướng ồng Võ Nguyên Giáp dê gơ gơs là anih rềp mềl, mờng kwèng ngan gơwèt mờ uă ngan làng bol tàm làm gùt ù tiah Dà lơgar dê. Pang sră lời kir sơnrai ơn tềng gùl kơƀàng tàm hìu do gam cih bềng ală sèng akhar cih bềng bơta sền ngềr, ki ngàm, bơta kờñ gơboh bơh làng bol, cau ling gùt lơgar mờ gơ̆p bơyô dunia dêtŭ tus còp Hìu lời kir sơnrai bơh Đại tướng ồng Võ Nguyên Giáp dê.

            Cau mblàng Lơ Mu K’Yến