VOV4.K’ho- Ngai 04/5, tàm Hà Nội, Bộ Kuang àng bơyai lơh pơrjum Mpồl sồr lơh Rơndăp broă lơh Cih sră nggal dà lơgar bè làng bol ơm kis mờ Rơndăp broă lơh Lơh gơlik, lơh mờ ătbồ sră căn cước làng bol. Jăt jơnau yal, ală tŭ lơh jăt rơndăp broă lơh sră nggal làng bol ơm kis dà lơgar dê neh dùl ròt tơmŭt tàm ală anih rlau 98 tơlak nă làng bol tàm gùt lơgar mờ gam tàm tơngai “lơh loh làng” jơnau yal bal mờ jơnau kờñ lơh sồ đal gĭt măt cau dùl nă să is ai jơh ală làng bol in lài mờ ngai 01/7/2021 do.

Kờp tus ngai 27/4, kờp jơh sră nggal tơrgùm dờp sră căn cước làng bol bơh Kuang àng 63 càr mờ ƀòn dờng dê là mờr 34 tơlak sră nggal, lơh geh mờr 68% pơndrờm mờ broă jàu 50 tơlak sră nggal. Gơwèt mờ broă tàm tơrbŏ, tam pà sră nggal, tŭ do Bộ Kuang àng neh pơgồp bal mờ Bảo hiểm Xã hội Việt Nam, Cục Gròi sền lơh sră nggal dà lơgar- Cơldŭ lơh broă Chính phủ, Tổng cục Dia- Bộ Tài chính cribơyai ring bal ală broă lơh măy mok nàng drơng tàm tơrbŏ in.

Cau mblàng Lơ Mu K’Yến