VOV4.K’ho - Tàm tŭ kơ̆p Bộ Nông nghiệp mờ Phát triển Nông thôn (NN mờ PTNT) bal mờ càr Gia Lai tam gơl gĭt nđờ rơbô lồ ù brê nàng lơh ù lơh sa suơn sre nàng lơh tiah tuh dà ai bơtơ̆t rơbòng dà Ia Mơr in, Mpồl atbồ bơcri priă mờ lơh bơtơ̆t 8 gơwèt Bộ NN mờ PTNT pa geh sră nggal sồr geh lơh rơbòng lam dà, drơng broă tuh ai rơlao 1 rơbô lồ ù lơh sa suơn sre tàm Ia Mơr in.

                                                                     Tiah lơh bơtơ̆t rơbòng dà Ia Mơr

Do geh sền là broă lơh tềng đăp măt nàng tơmù bơta hoàc huơr bơh broă lơh bơtơ̆t rơbòng dà 3 rơbô tơmàn đong tàm tiah nhàr dà lơgar. Tŭ do, bŭ lah geh ơm tơn tềng jơng bơtơ̆t Ia Mơr, mơya rơlao 1 rơbô lồ ù lơh sa suơn sre tàm xã Ia Mơr sùm gơtìp tàm bơta prang ờ geh dà.

Kờñ drơng tàm broă tuh dà tàm bă ù lơh sa do in, jăt sră nggal sồr, Mpồl atbồ bơcri priă mờ lơh bơtơ̆t rơbòng dà 8 kờp dŭ geh lơh ală rơbòng dà ntê gơwèt tiah rơbòng đah măt tơngai lĭk, rơbòng đah măt tơngai mŭt mờ rơbòng ƀồm dà, kờp jơh bơta jòng mờr 15 kơi sồ, mờ di pơgăp 180 broă lơh tàm rơbòng dà nàng geh dà tuh ai rơlao 1 rơbô lồ phan tam in. Priă bơcri lơh là 50 tơmàn đong, kờp dŭ geh ngui priă gam jơnkah gam tai bơh rơndăp broă lơh Ia Mơr tơngai dơ̆ 2 mờ priă jơnkah ală rơndăp broă lơh ndai bơh Bộ Nông nghiệp mờ Phát triển Nông thôn atbồ.

Cau mblàng Ndong Brawl