VOV4.K’ho - Ngai òr (14/04), Mpồl kuang bàng lơh broă bơh Hội đồng tĕ khà dà lơgar geh Thượng tướng Võ Trọng Việt, Chủ nhiệm ủy ban sền gàr bơta lơngăp lơngai dà lơgar lam bồ mpồl kuang bàng neh geh dơ̆ sền gròi broă gàr niam bơta lơngăp lơngai ờ do ờ dă mờ broă lơh sơnơm nàng rơcang tĕ khà kuang bàng Quốc hội mờ HĐND ală cấp tơngai bơh nam 2021 tus 2026 tàm càr Gia Lai.

Thượng tướng Võ Trọng Việt, Chủ nhiệm ủy ban sền gàr bơta lơngăp lơngai dà lơgar đơs tàm dơ̆ lơh broă

Jăt ủy ban tĕ khà càr Gia Lai yal, càr do neh crơng gơs 3 mpồl tĕ khà ndrờm mờ 3 gah tĕ khà kuang bàng Quốc hội mờ ală mpồl tĕ khà, ală gah tĕ khà HĐND ală cấp; crơng gơs 1 rơbô 438 mpồl tĕ khà tàm ală mpồl đùh sră tàm gùt càr. Bal mờ hơ̆, càr kung neh bơyai lơh 2 dơ̆ pơrjum cri bơyai, lơh gơs ală pơrjum nàng pơgồp jơnau đơs bơh cau tĕ khà tàm ƀòn ơm kis.

Pơrjum cri bơyai dơ̆ 3 kờp dŭ geh bơyai lơh tàm ngai 17 nhai 4 tus. Bè bơta lơngăp lơngai, ờ do ờ dă, càr Gia Lai neh geh tiểu ban lơh broă tờm, tam dră geh cồng nha mờ ală jơnau ờ di pal, lơh bơchồt; dră wơl ală jơnau ờ niam, nùs nhơm ờ di pal, tàm gơjrañ gơrềng tus mờ cau tơlĭk măt tĕ khà. Mờ càr gam geh sùm broă lơh bơh 24 mpồl lơh broă ơm dùl bă tiah mờ 10 mpồl ntrờn nàng rơcang sơndră mờ kòp Covid-19 tàm tiah nhàr dà lơgar rềp mờ lơgar Campuchia...

Tàm dơ̆ lơh broă, Thượng tướng Võ Trọng Việt, Chủ nhiệm Ủy ban sền gàr bơta lơngăp lơngai bơh Hội đồng tĕ khà dà lơgar đơs niam broă sền gàr bơta lơngăp lơngai ờ do ờ dă mờ lơh sơnơm ai broă tĕ khà càr Gia Lai in, mờ pin dờn broă bơyai lơh tĕ khà geh cồng nha niam bơnĕ.

Cau mblàng Ndong Brawl