VOV4.K’ho- Ngai (16/4), tàm ƀòn dờng Buôn Ma Thuột, càr Dak Lak, Cục Lơh sa lơh broă bal mờ Bơtàu tơnguh ƀòn lơgar gơwèt Bộ Nông nghiệp mờ Phát triển Nông thôn bơyai lơh pơrjum lam lơh kơnòl broă nam 2021 gah lơh sa lơh broă bal mờ bơtàu tơnguh ƀòn lơgar mờ uă gùng dà broă lơh geh ai tàm tơngai kòp Covid-19 ờ hềt niam mờ ală hiệp định kă bro khat gơboh sơnđờm geh mut ngui ngan ngồn. Jơnau yal tàm pơrjum, kờp tus jơh nhai 3 nam 2021, gùt lơgar geh mờr 17 rơbô 600 hợp tác xã mờ 68 mpồl tam klăc bal hợp tác xã lơh broă tàm gah lơh sa suơn sre. 83% ală hợp tác xã lơh broă geh cồng nha, gơguh 50% pơn ndrờm bal mờ nam 2015. Priă lơh geh kờp bal bơh hợp tác xã lơh sa suơn sre lơh geh rlau 380 tơlak đong dùl nam.

Ồng Trần Thanh Nam, Thứ trưởng Bộ Nông nghiệp mờ Phát triển Nông thôn đó đơng lam tàm dơ̆ pơrjum

Ồng Trần Thanh Nam, Thứ trưởng Bộ Nông nghiệp mờ Phát triển Nông thôn sồr ală tiah pơn jat tai bơtàu tơnguh lơh sa lơh broă bal, bơtàu tơnguh phan bơna lơh geh bơh lơh sa suơn sre jat broă lơh uă gah, uă broă lơh gơdờp bal mờ rài lơh sa, tam gơl pa gùng dà broă lơh sa, lơh sa kă bro, nàng hời rơ hời tơnguh uă bơta pràn tàm pơr lòng ai phan bơna in.

Cau mblàng K’ Hạnh