VOV4.K’ho - Tơngai do, bal mờ gơnoar atbồ mờ gah, mpồl lơh broă geh gơnoar, ală mpồl jăt yàng tàm càr Dăk Lăk kung neh geh uă broă lơh mùl màl, tam pà bal kal ke mờ làng bol kis tàm tiah gơtìp gơrềng bơh kòp Covid-19. Tàm gơtờp kòp dơ̆ 4 do, Mpồl ala măt gah jăt yàng Tin Lành càr Dăk Lăk neh jào mờr 5 rơbô 500 pò phan tus mờ làng bol tàm tiah gơtìp kòp, mờ kờp jơh khà rơlao 1 tơmàn 500 tơlăk đong. Bal mờ hơ̆, Ủy ban lơh sơnơm mpồl bơtiàn Hìu Jum Goh Tin Lành Việt Nam đah jum dà lơgar kung dong kờl ală hìu nhă geh cau F0 mờ F1 tàm càr Dăk Lăk ală pò phan, mờ kờp jơh khà 700 tơlăk đong.

Tơngai do, uă dơ̆ rơndeh geh pơn diang bal ală bơta phan kờñ gơboh bơh mpồl lơh broă mpồl bơtiàn-Mpồl ala măt gah jăt yàng Tin Lành càr Dăk Lăk neh tus mờ làng bol tàm tiah tam cah is, tiah gơtìp wàng se tài bơh kòp Covid-19, jào tus tềng tê ai làng bol tàm 26 ƀòn tàm càr Dăk Lăk in. Hơ̆ là ală ƀòn mùl màl gơtìp kal ke tài pal lơh jăt broă tam cah ngài rơcang sơndră mờ kòp Covid-19.

Mpồl lơh broă mpồl bơtiàn-Mpồl ala măt gah jăt yàng Tin Lành càr Dăk Lăk jào pà phan tàm UBND xã Cư̆ Né, kơnhoàl Krông Búk

Xã Cư̆ Né, kơnhoàl Krông Búk, là dùl tàm ală tiah gơtìp kòp uă ngan tàm càr Dăk Lăk tàm tơngai pa do. Tàm hơ̆ ală hìu kis tàm ală ƀòn bè Drao, ƀòn Dhiă, ƀòn Mui, ƀòn Kdrô kung ndrờm gơtìp wàng se nàng sơndră mờ kòp gơtờp. Tàm do, bơdìh mờ broă dong kờl bơh ală mpồl lơh broă tàm ƀòn, làng bol gam geh mpồl lơh broă mpồl bơtiàn bơh Mpồl ala măt gah jăt yàng Tin Lành càr Dăk Lăk jào pà 1 rơbô 465 pò phan. Dờp broă lơh geh kuơ màng mùl màl do, ồng Y Hiệp Êban, Bí thư Đảng ủy xã Cư̆ Né pà git: rài kis bơh làng bol neh gơtìp kal ke, tŭ do kòp gơtờp bè do tai den sơlơ kal ke rơlao, broă dong kờl, tam pà bal bơh ală cau geh nùs nhơm niam mùl màl geh kuơ màng ngan. “Xã Cư̆ Né bol añ chờ hờp ngan tài geh broă dong kờl bơh ală gah jăt yàng. Tàm hơ̆ uă ngan là mpồl jăt yàng Tin Lành càr Dăk Lăk neh dong kờl xã bol añ ală phan pà geh kuơ màng, nàng dong kờl làng bol, bŭ lah ờ uă, mơya do là phan pà geh kuơ màng ngan. Añ ala măt Đảng bộ ưn ngài ală mpồl lơh broă uă ngan, tàm hơ̆ uă ngan là mpồl jăt yàng Tin Lành càr Dăk Lăk”.

Làng bol kis tàm ƀòn Jung, xã Ea Yông, kơnhoàl Krông Păc pơrdŭ phan dong kờl

Nhai 8 lài do, tơnơ̆ mờ tŭ xét nghiệm mhar tàm xã neh geh uă cau geh gŏ mờ virus Sars CoV-2, jơh xã Cư̆ Bao, thị xã Buôn Hồ pal wàng se mờ lơh jăt Chỉ thị sồ 16 bơh Thủ tướng Chính phủ. Ờ Mìng kal ke bè phan sa-phan ngui ai làng bol in, mờ phan sa phan ròng kung gơtìp kal ke sơl. Tềng đăp mờ bơta do, gơnoar atbồ, ală mpồl lơh broă bal mờ ală cau geh nùs nhơm niam neh mhar dong kờl di tŭ. Ồng Y Ban Ayun, kuang atbồ ƀòn Krum A, xã Cư̆ Bao pà git: “Añ chờ hờp ngan tài ală cau geh nùs nhơm niam neh jào pà ală pò phan làng bol in. Tàm tơngai kòp gơtờp pa dogeh tai phan ngui phan sa ngui tàm rài kis hìu nhă bè ƀung mi, phe, sơdàng,... Ưn ngài Mpồl ala măt neh pơyoa ală pò phan; să tờm añ chờ hờp ngan mờ làng bol kis tàm ƀòn kung chờ hờp ngan sơl”.

Mpồl lơh broă mpồl bơtiàn-Mpồl ala măt gah jăt yàng Tin Lành càr Dăk Lăk jào pà phan tàm xã Cư̆ Êbur, ƀòn dờng Buôn Ma Thuột

Wă loh gùng dà broă lơh “tam dră mờ kòp bè tam dră mờ ling sò tơm” bơh Chính phủ, mờ nùs nhơm dong kờl bal, cau jăt yàng Tin Lành tàm càr Dăk Lăk sùm tơlik kơnòl bơh să tờm tus mờ mpồl bơtiàn. Khăt bè rài kis bal mờ nùs nhơm, geh cau tă phe, tă biăp, kơnuh plai chi, geh cau den tă priă ngan nàng dong kờl làng bol kis tàm tiah gơtìp kòp Covid-19 sơrlèt mờ kal ke. Lŏ H’ Oanh Ayun, kòn cau Rơđê kis tàm ƀìn Jung, xã Ea Yông, kơnhoàl Krông Păc geh nùs nhơm kơlôi là, tus bal mờ dà lơgar tàm broă rơcang sơndră mờ kòp Covid-19 là broă lơh “pà rơlao mờ dờp wơl”. “Tus bal mờ dà lơgar, tàm broă dong kờl làng bol gơtìp kal ke tài bơh kòp Covid-19, ƀòn Jung bol añ kung hòi jà làng bol jăt yàng tă ngai lơh broă, tă phe, ƀung mi nàng dong kờl làng bol gơtìp kal ke tài kòp Covid-19. Bol añ lơh jăt jơnau hòi jà bơh gơnoar atbồ tus bal rơcang sơndră mờ kòp Covid. Tŭ jào ală pò phan, bol añ kung geh lơh jăt tơl ală broă sền gàr să jan, hìu nhă mờ cau ndai in”.

Mpồl lơh broă mpồl bơtiàn-Mpồl ala măt gah jăt yàng Tin Lành càr Dăk Lăk jào pà phan tàm xã Cư̆ Êbur, ƀòn dờng Buôn Ma Thuột

Mục sư Lemous Philemol, kuang atbồ Mpồl ala măt gah jăt yàng Tin Lành càr Dăk Lăk pà git: bơh tŭ kòp Covid-19 gơtìp dơ̆ 4 tàm càr Dăk Lăk, mpồl lơh broă mpồl bơtiàn bơh Mpồl ala măt gah jăt yàng Tin Lành càr Dăk Lăk neh jào pà mờr 5 rơbô 500 pò phan, tơl pò phan geh: phe, dùl thùng ƀung mi, dà màn, dà tơngi, sơdàng mờ priă bơh 200 tus 300 rơbô đong. Kờp jơh khà rơlao 1 tơmàn 500 tơlăk đong. Bơdìh mờ ală phan pà bơh Ủy ban lơh sơnơm mpồl bơtiàn bơh Hìu Jum Goh Tin Lành Việt Nam đah jum dà lơgar pà ală hìu cau jăt yàng gơtìp F0, F1 tàm càr Dăk Lăk tàm tơngai do là 700 tơlăk đong, geh bal phe mờ priă. Bơdìh hơ̆ tai, Mpồl ala măt gah jăt yàng Tin Lành càr Dăk Lăk kung bơyai lơh ai mpồl bác sĩ bơto pơlam bơta pràn kơl dang să jan tàm internet ai ală cau lơi in kờñ git tai bè kòp Covid-19, broă sền gàr să tờm di lah gơtìp F0 ha là F1, F2... Mục sư Lemous Philemol pà git: “Tàm bơta kòp Covid-19, tàm hơ̆ uă ngan là tàm kòp gơtờp dơ̆ 4 do neh gơtờp mhar ală tiah tàm gùt lơgar. Lơh aniai uă bơta tàm rài kis mpồl bơtiàn. Ală cau jăt yàng tàm gùt tiah jòi tơl bơta còp să, pơn dờm pơn điang, lam sồr, dong kờl phan bơna. Geh uă broă lơh nùs nhơm dong kờl geh kuơ nàng tus bal tàm dră mờ kòp gơtờp. Añ sền gŏ ală cau lơh broă nùs nhơm dong kờl là ală bác sĩ, kuang bàng, cau ling ha là ală oh mi cau ùr tơrgùm phan dong kờl làng bol tàm tiah gơtìp kòp in. Nùs nhơm tàm sơnđàc bal neh lơh uă cau ngoh rơngăc ngan tàm kàl gơtìp kòp do. Bol añ kung tă pơgồp dùl bơnah phan ờ uă ngan sơl nàng tam pà bal nùs nhơm sơnđàc bal”.

Bal mờ broă lơh nùs nhơm dong kờl, dong kờl làng bol tàm tiah gơtìp kòp sơrlèt mờ kal ke, tơngai do, Mpồl ala măt gah jăt yàng Tin Lành càr Dăk lăk sùm lam sồr ală mpồl jăt yàng Tin Lành tàm càr sùm lơh jăt nền nòn jơnau bơto sồr 5K bơh Bộ Y tế mờ ală broă rơcang sơndră mờ kòp Covid-19. Ală broă lơh yàng gah jăt yàng dê geh bơyai lơh pờ tơlik tàm internet. Ală mục sư, kuang atbồ mpồl bơto pơlam làng bol jăt yàng bañ tơrgùm gal cau, tàm hơ̆ uă ngan là bañ bơyai lơh ñô sa, jun bao. Ală broă lơh geh nùs nhơm kuơ màng mùl màl bơh Mpồl ala măt gah jăt yàng Tin Lành càr Dăk Lăk neh tă pơgồp bal nùs nhơm kờñ gơboh, tus bal rơcang sơndră mờ kòp Covid-19.

Cau cih H Zawut-Cau mblàng Ndong Brawl