VOV4.K’ho- Bulah tìp kal ke tài gơrềng bơh kòp Covid-19 tàm uă tiah, dơ̆ tĕ khà pồ kuang bàng Quốc hội khoá XV mờ kuang bàng Hội đồng Nhân dân ală kấp tơngai lơh broă bơh nam 2021- 2026 neh lơh geh cồng nha niam bơnĕ bal mờ khà cau tĕ khà lòt pồ lơh geh rlau 99%, lời wơl tềl kah niam bơnĕ tàm nùs nhơm cau tĕ khà gùt lơgar dê bè dùl dơ̆ tĕ khà niam geh, geh kơnòl mờ bơceh pa. Bè hơ̆, ntềng đah ală jơnau bơsram ai geh bơh dơ̆ tĕ khà do taih?   

Sền wơl dơ̆ tĕ khà pồ kuang bàng Quốc hội khoá XV mờ kuang bàng Hội đồng Nhân dân ală kấp pa geh lơh, ồng Vương Đình Huệ- Chủ tịch Quốc hội, Kuang ătbồ Mpồl duh broă tĕ khà dà lơgar đơs nền, dơ̆ tĕ khà dơ̆ do geh lơh di adat boh lam, tềm pềr, ờdo ờdă mờ ngan ngồn là “Ngai chờ ù tiah dà lơgar dê”.

Ồng Vương Đình Huệ- Chủ tịch Quốc hội, đơs: Tiah geh khà cau lòt tĕ khà mờ dùl êt ngan rlau jơh là rlau 98%. Khà lòt tĕ khà bè hơ̆ là neh niam bơnĕ ngan mờ bol he pồ tơl 500 nă kuang bàng Quốc hội tai. Geh ală tiah bè Bắc Giang là pal bơyai lơh tai rlau 4 rbô 300 thùng sră ndai, nàng drơng ai làng bol gơtìp ơm yah ngài is tàm hìu, ơm yah ngài tơrgùm bal in. 

Tàm bơta kòp gơbàn kal ke, mơya rlau 99% cau tĕ khà lòt tĕ khà, bơta hơ̆ sơlơ tơngŏ ai nùs nhơm tam klăc bal bơh jơi bơtiàn dê, sơlơ kal ke, sơlơ lòng den sơlơ gŏ bơta pràn bơh làng bol dê. Den tàng bè hơ̆, jơnau bơsram bơh sơnrờp bơh dơ̆ tĕ khà pồ kuang bàng Quốc hội khoá XV mờ kuang bàng Hội đồng Nhân dân ală kấp tơngai bơh nam 2021- 2026 hơ̆ ngan là bơta pin dờn, dùl nùs bal mờ gĭt wă geh kơnòl bơh làng bol dê.

Bulah tàm tŭ tơngai gơbàn kòp Covid-19 kal ke ngan, mơya bơta pa bơh dơ̆ tĕ khà dê là ală cau tơlik măt tĕ khà kuang bàng Quốc hội mờ kuang bàng Hội đồng Nhân dân neh tam gơl broă hòi jà tĕ khà. Ala tài hòi jà tơn mờ să, ală cau tơlik măt tĕ khà neh tam gơl hòi jà tơn mờ să mờ hòi jà bơh tàm internet, mơkung gơmù khà ală dơ̆ tìp măt pơndrờm mờ bơto pơlam bơh sơnrờp. Ală tiah neh lơh mhar ngui công nghệ, ngui niam ngan bơta pràn bơh ală phan ngui yal tơngĭt jơnau, tô ri pờ tơlik jơnau đơs bơh làm gùt ƀòn lơgar. Tàm tiah gơbàn uă kòp, 2 càr là Bắc Giang mờ Bắc Ninh kong gơrềng kơn jơ̆ ngan rlau jơh mơya neh geh uă broă lơh bơceh pa, pơgồp bơnah kuơmàng lơh gơs cồng nha bơh dơ̆ tĕ khà dê. Bắc Giang geh tus rlau 4 rbô thùng sră ndai, là khà thùng sră ndai dờng rlau jơh tàm gùt lơgar, ală mpồl tĕ khà neh “lòt tơl gùng, teh mpồng tơl hìu” nàng ală cau tĕ khà ờ gơtùi lòt tus anih tĕ khà in kung gam gơtùi să tờm he đùh sră sơl. Ồng Lê Ánh Dương- Chủ tịch Ủy ban Nhân dân càr Bắc Giang đơs nền: Jơnau bơsram dờng màng ngan bơh bơta đơng lam bơh Đảng, Dà lơgar, Quốc hội dê là jơnau kuơmàng khà dùl lơh geh bơta cồng nha bơh dơ̆ tĕ khà bềng bơta kal ke, bơta lòng bè dơ̆ tĕ khà pa do. Ồng Lê Ánh Dương, đơs: Broă bơyai lơh tĕ khà bol añ kơlôi tus ală gùng dà ai ală tiah gơtìp ơm yah ngài, tiah gam ơm yah ngài mpồl bơtiàn, tiah wàng se kơryan kòp mờ ai ală cau tĕ khà ơm tàm tiah ơm yah ngài in kung tiah ơm yah ngài mpồl bơtiàn. Bơdìh mờ thùng sră tờm tàm anih đùh sră den cau tàm mpồl tĕ khà cèng thùng sră ndai tus tàm ală anih mờ cau tĕ khà ờ gơtuì lik bơh tiah ơm yah ngài den kung gam geh lơh jăt geh gơnoar tĕ khà bơh he dê.

Bơta song dơ pă loh làng bè jơnau yal bơh pơrjum cribơyai săc rwah, yal tơngĭt cau tơlik măt tĕ khà, ai jơnau đơs cau tĕ khà dê bè cau tơlik măt tĕ khà nàng sac rwah geh ală cau tơlik măt tĕ khà dipal kung là jơnau bơsram kuơmàng tàm dơ̆ tĕ khà do. Jăt ồng Ngô Sách Thực- Phó Chủ tịch Ủy ban Mặt trận dà lơgar Việt Nam, den: ngan ală broă gơrềng tus cau tơlik măt tĕ khà geh yal tơngĭt loh làng song dơ pă neh dong làng bol pồ tơl 500 nă kuang bàng Quốc hội. Ồng Ngô Sách Thực, đơs: Ală cau tơlik măt tĕ khà geh sac rwah jăt tàm tơl jơnau sồr jăt jơnau cih bơh Adat tĕ khà kuang bàng, Adat Bơyai lơh Quốc hội mờ jăt tàm bơta Bơto pơlam sồ 36 bơh Mpồl Rơndăp broă dà lơgar dê, Chỉ thị sồ 45 bơh Bộ Chính trị dê gơrềng tus broă lơh tĕ khà. Tàm hơ̆, bơdìh mờ 5 jơnau sồr jăt jơnau cih bơh adat dê, bè: jơnau sồr bè dòn song mờ Dà lơgar, sơnoa boh lam; ală bơta pal geh bè bơta pràn jak tàm broă lơh, nùs nhơm, bồ tơngoh, pràn kơldang să jan, bơta tơl pràn, broă lơh broă, gàr bơta gĭt gơ̆p mờ cau tĕ khà,...kung đơs sùm tus broă ală kuang bàng là pal geh bơta kơ̆ nùs, khin đơs, lam lài tàm broă lơh jăt gùng dà, broă lơh kơrnoat boh lam.

Dùl jơnau bơsram mờng chài kuơ geh ai bơh dơ̆ tĕ khà do gam là bơta pơgồp bal đah Mpồl duh broă tĕ khà dà lơgar, ală Ủy ban tĕ khà càr, ƀòn dờng mờ ală anih lơh broă yal tơngĭt jơnau sră băo tàm jơh gùt tŭ tơngai mờr dùl nam do. Hơ̆ gam là broă sền gàr bơta song dơ pă, loh làng, ờ ndơ̆p mpồn, làng bol lơh tờm, ring bal, ndrờm bal tàm tơl broă rơcăng tĕ khà. Ngui niam gơnoar broă bơh Mặt trận dà lơgar ală kấp dê mờ ală mpồl gơwèt bal dê tàm broă hòi jà làng bol, cau tĕ khà gùt lơgar tus bal tàm ală broă tàm ală tŭ tĕ khà. Bơh hơ̆, lơh geh nùs nhơm pin dờn, chờ hờp gơwèt mờ dơ̆ tĕ khà, tơnguh uă bơta gĭt wă, kơnòl chính trị bơh làng bol dê tus bal bơ̆t bơtàu mpồl kuang bàng dà lơgar, gơnoar ătbồ ală kấp. Ồng Bùi Văn Cường- Tổng Thư ký Quốc hội, Kuang ătbồ Cơldŭ lơh broă Quốc hội, Kuang ătbồ Cơldŭ lơh broă Mpồl duh broă tĕ khà dà lơgar, đơs nền: Broă lơh mblàng yal geh uă tam gơl pa bơceh pa mờ lơh geh cồng nha uă, mpồl cau mblàng yal neh geh rơcăng lài niam ngan. Gùng dà mblàng yal kung neh geh rơcăng lài mờ dơ̆ mblàng yal kung neh di broă, di anih. Bơta hơ̆ lơh gơlik nùs nhơm hô hơng, chờ hờp chờ hờñ pơñiờ să ai cau tĕ khà mờ làng bol gùt lơgar in. Tàm do, bol he gŏ ală oh mi kuang bàng đơng lam Đảng, Dà lơgar tŭ lơh jăt gơnoar làng bol den ndrờm geh ală anih lơh broă mblàng yal jơnau mblàng yal dùl bă di tŭ ngan, gơrề nùs nhơm bơta gơn kơnờm nàng bol he lam lơh dơ̆ tĕ khà lơh geh cồng nha.

Cồng nha bơh dơ̆ tĕ khà pồ kuang bàng Quốc hội khoá XV mờ kuang bàng Hội đồng Nhân dân ală kấp tơngai lơh broă bơh nam 2021- 2026 neh pà gŏ nùs nhơm jơi bơtiàn, bơta lơh bal kràñ cê jơh nùs ngan, hơđơm hơđang dùl nùs bal bơh jơh ală anih lơh broă chính trị dê, sùm àng sơrdah bulah tàm jơh ală bơta bè kòp bơtờp, kal ke. Bơta dùl nùs bal mờ bơta gĭt wă geh kơnòl bơh mờr 70 tơlak nă cau tĕ khà dê kung là jơnau kuơmàng pơgồp bơnah tàm cồng nha lơh geh bơh dơ̆ tĕ khà tài bơh dùl jơnau song ƀalhiă ngan “kal ke tus kàr lơi làng bol lơh kung gơtùi lơh sir sơl”.

Cau cih Lại Hoa- Cau mblàng Lơ Mu K’Yến