VOV4.K’ho- Di tŭ ồng Nguyễn Xuân Phúc geh pồ at gơnoar broă Chủ tịch lơgar Cộng hoà xã hội chủ nghĩa Việt Nam, mho òr (05/04), Tổng Bí thư, Chủ tịch lơgar Lào ồng Thounglun Sisolith neh pơyoa jơnau chờ gờm mờ hòi điện thoại chờ gờm.

Tàm pang sră chờ gờm Tổng Bí thư, Chủ tịch lơgar Lào pin dờn là, mờ bơta pràn, bơngă pin dờn mờ bơta mờng chài geh uă bơh să tờm, Chủ tịch lơgar ồng Nguyễn Xuân Phúc bal mờ mpồl kuang bàng đơng lam pa geh pơn jăt tai ai lơgar Việt Nam lơh geh ală cồng nha dờng màng rơlao tai, lơh geh cồng nha Nghị quyết pơrjum dờng dơ̆ 13 Đảng Cộng sản Việt Nam neh ai.

Thủ tướng lơgar Lo ồng Lý Khắc Cường pơyoa jơnau chờ gờm Chủ tịch lơgar ồng Nguyễn Xuân Phúc mờ Thủ tướng Chính phủ ồng Phạm Minh Chính. Thủ tướng lơgar Lo đơs tờm geh bŏt bơtàu broă lơh bal geh cồng nha bal, geh kuơ bal đah bàr lơgar, pơgồp bal niam ai broă lơh bàr lơgar rềp bal gĭt gơ̆p lơh bơyô bal mờ lơh broă bal tơl ală bơta đah lơgar Lo mờ lơgar Việt Nam.

Kung dùl ngai bal, Thủ tướng lơgar Nhờk ồng Yoshihide Suga kung neh geh jơnau chờ gờm pơyoa tus Chủ tịch lơgar ồng Nguyễn Xuân Phúc mờ Thủ tướng Chính phủ ồng Phạm Minh Chính sơl.

Cau mblàng Ndong Brawl