VOV4.K’ho - Jăt jơnau kờp bơh gah lơh sa suơn sre, càr Dăk Lăk tŭ do geh tus 62 broă lơh bơtơ̆t rơbòng dà gơtìp ờ kơl jăp pal geh bơcri priă nàng lơh kơl jăp wơl. Tềng đăp mờ bơta do, tàm kàl mìu dà tih, ală mpồl lơh broă, ală kơnhoàl, thị xã, ƀòn dờng tàm càr Dăk Lăk gam tơnguh sùm broă lơh 4 tàm tiah tơn nàng gàr kơl jăp ai broă lơh do mờ tàm tiah đah jum in.

                       Ñhiòng dà hòr gơtìp gơsrềp, tơnao dà Ea Drăng pal yuh dà gờñ nàng dờp dà tih

Bơh bồ nhai 9 tus tŭ do, broă lơh bơtơ̆t dơng dà Ea Drăng, tàm thị trấn Ea Drăng, kơnhoàl Ea H’ Leo, càr Dăk Lăk pal sùm yuh dà gờñ nàng dờp dà mìu tih. Ồng Nguyễn Văn Hiếu, Kuang atbồ Công ty TNHH MTV atbồ broă lơh bơtơ̆t rơbòng dà Dăk Lăk tàm kơnhoàl Ea H’ Leo pà git, bơsram broă mờng chài bơh broă gơtìp lìu dà tềng bơtơ̆t, lơh gơbam dà tàm tiah đah jum nam 2013 lài do tài ñhiòng dà hòr gơtìp wêt, den tàng tàm kàl mìu, công ty do pal tam pà cau sền gàr ngai kung bè mang tàm broă lơh nàng yuh tam pà dà, gàr ờ do ờ dă làng bol kis tàm thị trấn Ea Drăng in. “Bơta krơi is bơh broă lơh do den bă ù ơnàng tus 58,6 lồ mờ khà dơng dà mìng geh 1 tơlăk 217 rơbô khối, den geh ai bơh tàm bơta yal lài trồ tiah mờ công ty do geh tam pà lơh bè lơi nàng di pal. Tŭ do, di lah yuh di pơgăp bơh 30 tus 40 khối tàm 1 giây den neh lơh gơbam tàm suơn tam biăp bơh làng bol, den tàng là jăt mờ mùl màl bè hơ̆ den công ty do sùm pal tơmù khà dà tàm tơnao dà ai geh khà dà, dờp dà tus tàm ală tiah tus, pleh mờ broă gơtìp aniai tus mờ làng bol”.

         Bơtơ̆t dơng dà Pu Huê ờ geh mpồng yuh dà, dà lìu tus tàm gùng lòt tus xã Ea Ktur-Cư̆ Wi tŭ dà tih

Jăt broă sền gròi trồ tiah, ai cau sền gàr tàm ală broă lơh geh kuơ, mờ gùng dà broă lơh 4 tơn tàm tiah hơ̆, ală kơnhoàl, thị xã, ƀòn dờng, ală mpồl lơh broă atbồ broă lơh bơtơ̆t rơbòng dà tàm càr Dăk Lăk gam rơcang lơh jăt ală gùng dà broă lơh gàr ờ do ờ dă tơnao bơtơ̆t tàm kàl mìu dà tih. Ồng Trịnh Văn Quang, kuang atbồ broă lơh bơtơ̆t rơbòng dà Pu Huê pà git, bơtơ̆t dơng dà bơh broă lơh geh pơgồp bal mờ broă lơh gùng lòt, gơwèt gơl gùng lòt tàm ală xã Ea Tur, Cư̆ Wi, Ea Hu kơnhoàl Cư̆ Kuiñ, mơya mờ lơh jăt broă lìu yuh dà. Bơta do lơh tơnao dơng dà Pu Huê sùm gơtìp mờ bơta di gơlan gơtìp ờ kơl jăp tŭ geh dà uă: “Bơta mờng bơh brong dà là pơgồp bal mờ yuh dà lìu do den ờ tơl niam tàm broă yuh dà tih, den tàng dà ờ yuh jơh mờ lơh lìu tàm gùng lòt den tàng lơh gơtìp ờ niam tus mờ broă lơh bơtơ̆t, tàm hơ̆ uă ngan là bơta ờ do ờ dă tus mờ kòn bơnus lòt tàm gơl gùng do. Den tàm kàl mìu càl dờng bol añ lơh jăt nền nòn jăt gùng dà broă lơh neh geh ai, tŭ lơi geh jơnau yal mìu dà tih den pal ai cau sền gàr 2 đah bồ gùng bal mờ sền gàr broă yuh dà, di lah gơtìp bơta ờ niam gơbàn den pal gàr bơta ờ do ờ dă niam ngan. Kung kơ̆p kờñ tàm tơngai tus, ală cấp, ală gah lơh broă sền sơwì, kơlôi sơnơng nàng geh broă tơnguh broă bơcri priă lơh nàng gàr niam broă lơh kung bè ờ do ờ dă ai gùng lòt tàm xã do in”.

                  Bơtơ̆t gơtìp tơrlah uă, tơnao dà Phù Mỹ (kơnhoàl Ea H' Leo) ờ gơtùi dơng dà

Jăt jơnau yal bơh Sở Nông nghiệp mờ Phát triển Nông thôn càr Dăk Lăk yal, gùt càr tŭ do geh 785 broă lơh bơtơ̆t, drơng broă tuh dà ai rơlao 262 rơbô lồ ù tam phan ală bơta in (ndrờm mờ di pơgăp 82% bă ù tam phan pal tuh dà). Nàng gàr niam ờ do ờ dă lài mờ mìu dà tih, càr neh sền wơl, di tŭ lơh kơl jăp wơl 18 broă lơh tờm, broă lơh di gơlan gơtìp ờ kơl jăp. Bŭ lah bè hơ̆, tŭ do càr gam geh tus 62 nơm bơtơ̆t, tơnao dơng dà di gơlan gơtìp tơrlah pal geh lơh kơl jăp wơl mờ khà priă rơlao 360 tơmàn dong.

              Ñhơ̆t glòm jơh tơnao dà Ea Msen (kơnhoàl Cư̆ Kuiñ) di gơlan gơtìp rềs àr uă ngan tŭ dà tih

Jăt ồng Nguyễn Thành Long, Kuang atbồ Chi cục bơtơ̆t rơbòng dà càr Dăk Lăk yal, tàm khà priă càr ờ uă, broă lơh kơl jăp tơnao dơng dà  ndrờm bal pal dan mờ dà lơgar dong kờl, den tàng broă lơh lài ngan nàng gàr kơl jăp ờ do ờ dă ai ală broă lơh tàm kàl mìu dà tih gam là pal geh sùm gùng dà broă lơh 4 tơn tàm tiah hơ̆, rơcang tơn bơh tàm ală tiah: “Gơwèt mờ ală mpồl atbồ lơh den pal rơcang ai priă lơh kơl jăp ing, tàm hơ̆ uă ngan là ală tiah gơtìp tơrlah mờ di gơlan gơtìp rềr àr là pal lơh kơl jăp mơ. Dơ̆ bàr là tàm kàl mìu dà tih den pal ai cau sền gàr ngai kung bè mang, di lah pal yuh dà den pal yal lài nàng làng bol in git. Bơdìh hơ̆ tai den pal sùm sền gròi bơta kơl jăp ờ do ờ dă broă lơh, yal di tŭ gơnoar atbồ kung bè Sở Nông nghiệp mờ Phát triển Nông thôn nàng geh gùng dà lơh kơl jăp mơ”.

Cau cih Minh Huệ-Cau mblàng Ndong Brawl