VOV4.K’ho- Sơmờm tŭ ờ hềt loh làng tŭ lơh jat gùng dà broă lơh tam gơl ù brê ờ geh chi che tàm kơnhoàl tiah nhr lơgar Chư Prông, càr Gia Lai nàng tam tờm kao su (tơngai bơh nam 2008-2010), bàr pe mpồl lơh sa kă bro neh koh kơl, sơgràm ù nàng tam gĭt nđờ rơhiang lồ kao su tàm ù brê. Bulah broă ờ hềt geh sền gŏ uă nam do, mơya cau lơh tìs kung gam ờ hềt gĭt, càr Gia Lai kung ờ hềt lơh glài mờ bơsong sơl.

Ồng Nguyễn Anh Vũ, Kuang atbồ Mpồl atbồ brê rcang gàr bồ tô dà Ia Puch, kơnhoàl Chư Prông pà gĭt, 359 lồ 8 sào brê gơtìp bàr pe mpồl lơh sa kă bro mus kơl, sơgràm gơwèt 9 tiểu khu (889, bơh 919 tus 924, tiểu khu 229 mờ 919A), bơnah brê mpồl dê atbồ. Tàm hơ̆, 200 lồ neh geh tam tờm kao su tơrlir niam, gam tàm tơngai ai bơsơ̆t. Ngan là, bă ù tam kao su tàm do tờm dờng bơh 20 tus 30 phơng. Pơgap mờ do 2 nam, tàm tŭ sền gròi bă ù do, Kuang bàng atbồ brê sền gŏ gĭt nđờ jơ̆t nă làng bol tàm ală tiah ndai geh ơpah nàng còr bơsơ̆t kao su. Jat ồng Vũ, bơta do dong ală mpồl lơh broă tam kao su tìs mờ kơrnoat boh lam mpồn să jan ngan ngồn.

Bè sơnam tờm cao su dê, añ đơs là bă ù do geh tam tàm tơngai bơh nam 2008-2010. Bol añ sền gŏ bàr pe nă làng bol lòt còr bơsơ̆t cao su, mơya ờ gơtùi gĭt là mpồl lơh broă lơi. Bơh lùp sền, khi đơs là bơh tiah ndai tus, geh ơpah nàng còr bơsơ̆t kao su.

200 lồ brê kao su tàm tơngai ai tơn hào geh tam “kơñau” pơgap mờ do rlau jơ̆t nam tàm kơnhoàl Chư Prông

Tơngai ờ hềt loh làng tàm broă lơh jat gùng dà broă lơh tam gơl brê klàr tus tam kao su tàm kơnhoàl Chư Prông, càr Gia Lai, rlau 120 lồ brê gơwèt bơnah brê bơh Mpồl atbồ brê rcang gàr bồ tô dà Ia Puch neh gơtìp mus kơl, sơgràm nàng tam tờm phan sa mờ kao su. Mơya, tus tŭ do, pa mìng geh mờr 870 lồ bơh làng bol sơgràm geh lơh loh. Mìng is gơwèt mờ 359 lồ 8 sào brê gam wơl, den Thanh tra  càr Gia Lai đơs là, cau tờm brê neh gĭt, mơya ờ gŏ yal (Jơnau pơndŭt Thanh tra sồ 11 nhai 9/2019). Sơlơ̆u wơl, tàm dơ̆ tơrgùm kờp brê nam 2014, cau tờm brê gam kờp bă ù kao su tìs mờ kơrnoat boh lam do tàm bă brê tam bơh mpồl lơh broă dê. Thanh tra càr Gia Lai kung sơnñio loh, cau mus kơl, sơgràm brê tàm do là bàr pe mpồl lơh sa kă bro.

Nam 2019, Thanh tra càr Gia Lai sền gĭt cau lơh tìs là bàr pe mpồl lơh sa kă bro. Mơya tus tŭ do, càr Gia Lai kung ờ hềt gĭt sơl

Bơh nam 2019, tơnơ̆ tŭ geh tàm jàu broă, Anih lơh broă Kảnh sát Lùp khàu (gơwèt Kuang àng càr Gia Lai) neh yă dơ̆ lơh tìs gơwèt mờ 2 nă cau hơ̆ là Nguyễn Thị Hương mờ Phan Quốc Huy (là ală Kuang atbồ Mpồl atbồ brê Ia Puch tàm ală tơngai bơh nam 2008 tus nam 2010) nàng lùp klàu lơh glài “Lơh ờ jơh kơnòl broă lơh gơbàn jơnau gơ lời wơl kơn jơ̆ ngan). Bulah bă ù tam kao su gơtìp tam tìs mờ kơrnoat boh lam do gơ ơm rềp mờ bă ù brê tam gơl nàng tam cao su mờ càr Gia Lai jàu ai ală mpồl lơh broă in, hơ̆ là: Công ty Cổ phần Đầu tư Quốc Cường Gia Lai; Công ty kă bro phan mờ lơgar ndai Quang Đức, Công ty TNHH MTV Cao su Chư Prông, Công ty TNHH MTV Cao su Trung Nguyên, mơya tus tŭ do, cau lơh tìs kung gam là “ờ hềt gĭt” sơl. Ồng Phạm Vũ Tú, Phó Chủ tịch UBND kơnhoàl Chư Prông pà gĭt:

Kơnhoàl bol añ geh kơnòl broă pơgồp bal mờ ală gah lơh broă bơh càr dê nàng pơgồp bal lơh loh, sền gĭt ală mpồl cau, cau dùl nă să is lơh tìs. Bol añ kơ̆p kờñ ală nih lơh broă geh gơnoar bơh càr dê gờñ bơsong tơn jơh broă do, nàng broă atbồ dà lơgar dê lơh geh cồng nha uă ngan rlau jơh tàm broă atbồ bă ù brê gam wơl mờ bă ù gơtìp lơh tìs.

Gĭt nđờ rơhiang lồ ù brê gơtìp mus kơl, mơya tài bơh lơyài sền gŏ, den gĭt nđờ rơhiang lồ kao su neh geh tam tìs mờ kơrnoat boh lam, là jơnau ai lơh pơnyơu mpờl gŏ ngan ai ală rơwas in mut tàm trồm jrum tàm broă atbồ, sền gàr brê tàm kơnhoàl Chư Prông dê. Broă lơh lùp khàu, lơh glài broă lơh tìs tàm tiah do dê kung lơyài tus ờ gơtùi gĭt wă sơl, lơh gơlik broă lơh tìs, gơrềng tus cồng nha sền gàr brê bơh càr Gia Lai dê.

Cau cih Nguyễn Thảo- Cau mblàng K’ Hạnh