VOV4.K’ho- Tơngai lài, jơnau mus kơl aniai brê, pơndiang dơm chi brê kơñau tìs mờ kơrnoat boh lam gơbàn kal ke ngan tàm 2 càr Kon Tum mờ Gia Lai. Gĭt nđờ jơ̆t lồ brê tàm kơnhoàl tiah nhàr lơgar Ia H’Drai, càr Kon Tum gơtìp mus kơl aniai jơh nàng ai ù lơh sa, mơya ờ hềt geh mpồl cau tờm brê lơi kong kơnòl. Ai tàm kơnhoàl tiah sar lơgar ngài Kbang, càr Gia Lai den brê dổi dờng, kuơmàng ờ huan ngan geh neh gơtìp mus kơl jơh nàng ai dơm chi. Mìng tàm tơngai lơyah lơm, mpồl lơh broă geh gơnoar sền gŏ pơgăp 50 khối dơm chi kuơ neh geh pơndiang pơrdŭ lik bơh brê.

Tàm bă brê dềt 726 gơwèt ù tiah xã tiah nhàr lơgar Ia Dal, kơnhoàl Ia H’Drai, càr Kon Tum geh 17 lồ brê neh gơtìp kơl jơh nàng ai ù lơh sa. Tàm tiah do chi brê gơtìp kơl gơ pừ ờ gŏ nđàc sơngĭt dùl êt lơi. Tềl lời wơl tàm tiah do pà gŏ ală tờm chi dơm dờng, geh bơta kuơ neh gơtìp òt uă gơl, òt mpàn pơndiang lòt tus tiah ndai. Tàm uă ngan bă brê ơnàng 17 lồ do, làng bol neh tam bùm blàng mờ điều. Ồng Nguyễn Quốc Tuấn- Kuang ătbồ Hạt Kiểm lâm kơnhoàl Ia H’Drai, đơs nền, bă brê ơnàng 17 lồ do gơwèt bơta ătbồ bơh Công ty Cổ phần Kao su Sa Thầy dê. Ồng Nguyễn Quốc Tuấn pà gĭt: Jăt khà kờp sền brê nam 2014 mờ bơta gơbàn brê dê nam 2020 den bă brê ơnàng 17 lồ do là gơwèt mờ Công ty Cổ phần Kau su Sa Thầy ătbồ neh tam gơl nàng ai ù tam kau su.

Brê gơtìp mus kơl aniai nàng ai ù lơh sa sươn sre tàm Ia H’Drai, càr Kon Tum

Bè hơ̆, jăt gơnoar ătbồ mờ gah lơh broă geh gơnoar kơnhoàl Ia H’Drai dê yal, den 17 lồ do gơ ơm tàm bă brê ơnàng 6 rbô lồ Công ty Cổ phần Kau su Sa Thầy apah, ndrờm bal mờ broă brê neh geh tam gơl, ai jơh dơm chi lài mờ tŭ jàu ù ai mpồl lơh sa kă bro in. Do kung ngan là cơng tàng nàng gơnoar ătbồ xã Ia Dal, Hạt Kiểm lâm mờ Ủy ban Nhân dân kơnhoàl Ia H’Drai đơs nền 17 lồ gơtìp mus kơl ờ gŏ di là brê. Mơya, ồng Đỗ Thanh Nam- Kuang ătbồ dờng Công ty dê den đơs nền wơl, ù ờ gơwèt bơta ătbồ bơh Công ty dê: Bă brê 17 lồ do là bă brê gơ ơm bơdìh bă brê Công ty ătbồ, hơ̆ là ờ gŏ di là bă brê bơh Công ty dê. Loh làng là bè hơ̆, ngan digơlan là hĭu ih. Bă brê do ờ gŏ di là bă brê bơh Công ty dê ătbồ. Đơs ngan bè hơ̆.

Broă 17 lồ brê tàm xã Ia Dal, kơnhoàl Ia H’Drai, càr Kon Tum gơtìp mus kơl jơh nàng ai ù lơh sa sươn sre neh geh să tờm ồng Dương Văn Trang- Bí thư Tỉnh ủy Kon Tum sồr lơh loh bơh bồ nhai 6. Mơya, mờr 1 nhai neh lòt gan, jơnau yal bơh ală mpồl lơh broă geh gơrềng dê kung gam wih wơl mờ ờ gŏ loh làng. 

Ală tờm chi dơm dờng tàm Ia H’Drai geh khòm tơrgùm pơndiang lòt tus tiah ndai nàng tăc bro

Ai tàm kơnhoàl Kbang, càr Gia Lai, mpồl lơh broă geh gơnoar pa gŏ pơgăp 50 khối dơm chi kuơ neh gơtìp kơl mờ pơndiang dô lik bơh brê. Tàm bă brê dềt 25, bă brê bơh Công ty TNHH MTV lâm nghiệp Đắk Roong dê, geh uă ngan tờm chi dổi mờ nho jơnhoa gĭt nđờ jơ̆t thơk, dờng bơh 80 phơng tus 1 thơk mờ nggùl neh gơtìp òt kơl jơh. Tiah koh kơl mìng gam wơl nggu lơm bal mờ ƀòk cơ, mpàn kơltau mờ ntê, cồng lơm. Uă ngan dơm chi geh kuơ neh geh cèng lik bơh brê. Ală nggu chi pa òt, mờ òt jŏ pà gŏ, broă mus kơl kơñau tìs mờ kơrnoat boh lam tàm do neh geh lơh tàm tơngai jŏ jòng. Ồng Nguyễn Minh Sự- Kuang ătbồ Công ty TNHH MTV Lâm nghiệp Đăk Roong, kơnhoàl Kbang mblàng bè do: Jơnau geh ngan tŭ do là làng bol tàm do geh jơnau kờñ lơh hìu ơm mờ hìu rông; geh cau chơ̆t tàm ƀòn, khi kung mŭt tàm brê nàng òt chi òt mpàn. Bơta is rơmis làng bol tàm do ờ gŏ chi ro lơh gơbang, mờ pal ngui chi gam kis. Geh bàr pe nă cau neh sơmờm broă do nàng mus kơl, tăc bro. Kal ke ngan tàm broă lơh sền gàr brê.

Tiah dơ̆ mus kơl aniai brê dổi dờng tàm Kbang, càr Gia Lai

Ờ gŏ di mìng brê gơtìp sơgràm aniai kơn jơ̆ lơm mờ broă pơndiang lơh dipal mờ kơrnoat boh lam dơm chi brê kơl kơñau tàm kơnhoàl Kbang, càr Gia Lai kung geh lơh bơcrì bơcrà ngan sơl. Pa do, tàm xã Đăk Smar, mpồl lơh broă geh gơnoar kơnhoàl Kbang neh gŏ rơndeh ô tô ƀàng sồ 81C-177.40 pơndiang 21 khối 3 dơm chi, geh 15 gơl dơm chi dổi wil, òt geh ndơl mờ toaltăng jơm ndơ̆p jơh.

Nàng kờñ tơngŏ dơm chi ai bơh anih lơi, mpồl lơh sa kă bro làng bol dê lơh is Giao Trang bơh ồng Hồ Ngọc Dao ơm kis tàm thị trấn Kbang, kơnhoàl Kbang lơh cau tờm tă ai sền bàr pe sră nggal đơs là, dơm chi do geh blơi bơh dùl mpồl lơh sa kă bro tàm Thanh Khê, ƀòn dờng Đà Nẵng bơh nhai 2 nam 2015. Mơya, ồng Trương Thanh Hà- Kuang ătbồ Hạt Kiểm lâm kơnhoàl Kbang pà gĭt: sră nggal mờ dơm chi ờ gŏ gơrềng bal mờ gơ̆p mờ rơndeh dơm chi do là dơm chi mus kơl kơñau tìs mờ kơrnoat boh lam. Ồng Trương Thanh Hà, đơs: Kbang là kơnhoàl geh bă brê dờng, uă jơnau geh ngan bă brê geh dơm chi uă ngan, den tàng là bơta rơhơn dơh bơkah mơnga ngan ai bol mus kơl kơñau brê in. Nùs nhơm bơh Hạt Kiểm lâm Kbang dê là pơgồp bal jơh nùs mờ anih lơh broă kảnh sát lùp khàu, cau tờm brê, gơnoar ătbồ tiah do nàng kràñ cê kơ̆ dơn lơh loh ală cau mus kơl, tă bro kơñau tìs mờ kơrnoat boh lam, kràñ cê kơ̆ dơn bơsong di mờ kơrnoat boh lam mờ geh tŭ là dilah geh yal yă den bol añ sồr cah rña ntrờn làm bă tiah nàng lơh krơh ai ală cau ndai in sền nàng rơngòt.

Jăt Ủy ban Nhân dân kơnhoàl Kbang, càr Gia Lai dê, 6 nhai do, ală mpồl lơh broă geh gơnoar tàm tiah do neh gŏ 40 dơ̆ lơh tìs Adat lơh broă brê bơnơm, rlau nggùl khà hơ̆ là mus kơl aniai dơm chi brê tìs mờ kơrnoat boh lam. Ồng Nguyễn Văn Dũng- Chủ tịch Ủy ban Nhân dân kơnhoàl pà gĭt, kơnhoàl neh lam lơh uă broă lơh nàng ătbồ, sền gàr brê, mơya cồng nha ờ hềt uă. Kơnhoàl kung neh cih dờp bàr pe jơnau đơs bơh làng bol dê, yal bè jơnau kuang bàng sền gàr brê dong kờl ai bol mus kơl aniai brê in mờ gam lam lùp khàu, lơh loh. Ồng Nguyễn Văn Dũng, đơs: Ờ hềt gơtùi đơs là geh bơta dong kờl bơh kuang bàng dê mờ bol mus kơl aniai brê halà ờ, mơya tàm do geh tềl tơngŏ ờ lơh kràñ tàm broă lơh ătbồ dơm chi ntê tàm tiah do. Mờ gơnoar broă là cau lam bồ kơnhoàl, bol añ kràñ cê kơ̆ dơn sồr bơsong kràñ ală cau là kuang bàng, mờ bol mus kơl aniai brê, pơndiang dơm chi brê tìs mờ kơrnoat boh lam. Mờ sồr anih lơh broă lùp khàu di tŭ yă ală dơ̆ lơh tìs geh jun tus anih lơh broă lùp khàu in.

Tơnơ̆ dơ̆ sền gŏ rơndeh dơm chi bal mờ ală sră nggal pin gơtìp lơh pơrlồm, ală mpồl lơh broă geh gơnoar kơnhoàk Kbang, càr Gia Lai gŏ sùm brê gơtìp mus kơl aniai, uă tờm chi dờng gơtìp òt kơl gơ pừ jơh. Kờp jơh dơm chi gơtìp hoàc hươr tàm ală dơ̆ lòt sền pa do là rlau 50 khối.

Cau mblàng Lơ Mu K’Yến