VOV4.K’ho- Bơh bồ nhai 11 nam 2021 tus tŭ do, càr Gia Lai neh git gŏ 2, 3 tiah geh kòp Covid-19 tàm ală ƀòn jơi bơtiàn kòn cau dùl êt nă cau tàm ƀòn dờng Pleiku mờ kơnhoàl Đăk Đoa. Broă bơtờp kòp geh đal git gơ rềng tus bơhiàn rài kis ƀòn lơgar, ngan là broă bơyai lơh ies, tơp ƀồc.

Ală ngai do, xã Hà Bầu, kơnhoàl Đăk Đoa gơ gơs tiah bơtờp uă kòp pa bơh càr Gia Lai dê. Tàm rlau 1 poh do, xã neh git gŏ mờr 200 nă cau bơtờp kòp Covid-19 tàm 6 ƀòn jơi bơtiàn kòn cau dùl êt nă cau. Tàm hơ̆, mìng is ƀòn Nú geh 88 nă cau kòp. Uă ngan ală cau F0 do geh đal git neh tus bal ñô sa tàm dùl dơ̆ ies ƀồc geh lơh 2 ngai, ngai 10 mờ ngai 11/11. Mò Dương Thị Kim Quy, Phó Chủ tịch UBND xã Hà Bầu pà git: “Mpồl đơng lam geh jàu ai mpồl lơh broă kòp Covid-19 mpồl bơtiàn tàm thôn in, ờ huan ai tơrgùm gal cau; cau bơdìh ù tiah ƀòn, xã dê den cih mat. Pơn yơu, yau Yoan gŏ kòp bơtờp bè do den mìng tus chu ñàng hơ̆ sồng lik rê mơ. Mơya làng bol den krơi, pal nggui tàm kup tê gơp, boh bơr mờ gơp, pal nggui sa, ñô 1 ly ơlak. Den tàng, kal ke ngan tàm broă rơcang sơndră kòp”.

Jat bơhiàn, jơh dùl ƀòn tă pơgồp phan sa bal mờ hìu bơnhă bơyai lơh ies ƀồc tàm 3 ngai (rùp ai lơh pơn yơu)

Ai tàm ƀòn dờng Pleiku, tŭ do jơh bal 3 ƀòn kòn cau Jrai ndrờm gơtìp wàng se tài bơh git gŏ git nđờ rhiang nă cau bơtờp kòp Covid-19, kung gơ rềng tus ală dơ̆ ies, tơp ƀồc sơl. Ồng Rơ Châm Thót, Bí thư chi bộ ƀòn Ốp, sơnah ƀòn Hoa Lư, ƀòn dờng Pleiku pà git, broă bơyai lơh ies, tơp ƀồc jat bơhiàn bơh jŏ tŭ kòp bơtờp gam gơlik geh kal ke neh lơh ƀòn geh 77 nă cau bơtờp kòp: “Tŭ geh cau chơt den làng bol tơrgùm bal, khi geh dră tơrnờm den cèng drăp tơrnờm nàng tam pà bal moat jrùm, iar, ơda den jơi nòi gơ jat tàm bơta geh ngan bơh oh mi tàm hìu bơnhă dê. Uă ngan là iar, ơda dờng lơm; nggui bal, ñô bal. Bơyai lơh ies bơh 2 tus 3 ngai, ngai dơ̆ 4 hơ̆ sồng jơh, gơ rềng ngan tus pràn kơldăng să jan, priă jền. Tŭ do den kung gam gàr bè hơ̆, ờ hềt gơtùi sang tĕ.”

Tŭ do, tàm càr Gia Lai geh mờr 1 rbô ƀòn bơh cau jơi bơtiàn kòn cau dùl êt nă cau dê ơm kis bơh jŏ tàm càr gơ wèt 17 kơnhoàl, thị xã, ƀòn dờng. Gơ wèt mờ ală jơi bơtiàn kòn cau Tây Nguyên, bơta tam klac bal ƀòn lơgar geh ai tơnggŏ loh làng ngan tàm jơh ală broă lơh sa, rài kis niam chài. Mơya tàm tŭ tơngai kòp Covid-19 gơlik geh kal ke, den do gơ gơs dùl bơta kòl yan gơ wèt tus mờ broă lơh rơcang sơndră kòp bơh càr dê.

Uă ƀòn jơi bơtiàn kòn cau dùl êt nă cau tàm kơnhoàl Đăk Đoa, càr Gia Lai gam pal wàng se nàng jòi cau ơm rềp, tam cah F0, F1 lik bơh mpồl bơtiàn

Ồng Lê Văn Quang, Chủ tịch Ủy ban Nhân dân sơnah ƀòn Hoa Lư, ƀòn dờng Pleiku pà git, nàng bơsong bơta do, kờñ geh bơta lơh bal jơh nùs bơh jơh gùt anih lơh broă chính trị, kuơmàng là pal tơnguh gơnoar broă bơh ală cau geh bơngă pin dờn tàm ƀòn lơgar dê, mblàng yal, hòi jà làng bol dùl nùs bal, lơh jat ală broă lơh rơcang sơndră kòp: “Tàm tơngau wàng se, tàm ƀòn Ốp geh dùl dơ̆ ies tơp ƀồc. Bol hi neh tơrgùm anih lơh broă chính trị nàng mblàng yal ai hìu bơnhă geh cau chơt in, đal git nùs nhơm là ờ bơyai lơh ies còp tàm hìu. Tơnơ̆ tŭ hìu bơnhă ring bal broă mblàng yal, den rơcang tờ bơtô tơp ƀồc lài, jun cau roh rê, bơyai lơh tơp tơn, ờ tơrgùm gal cau, pleh broă bơyai lơh ies ƀồc bơh làng bol kòn cau dê.”

Cau mblàng K’Duẩn