VOV4.K’ho - Thủ tướng Cíñ phủ pa tơlik jơnau sồr ală Ƀộ, gah lơh broă dà lơgar, ală càr, ƀòn dờng gàr niam ờ do ờ dă gùng lòt di tàm dơ̆ satềp Tây, satềp he Ñâm Zần mờ lơh chờ nam pa 2022.

Jơnau sồr Ủy ƀan ờ do ờ dă tàm gùng lòt Dà lơgar, ală Ƀộ, gah lơh broă dà lơgar, ală mpồl lơh broă cíñ trị, mpồl bơtiàn mờ UBÑD ală càr, ƀòn dờng ai bơh gơnoar broă, kơnòl broă lơh, đơng lam mờ bơyai lơh jăt ală kơnòl, broă lam sồr, yal kơrnoăt adăt boh lam, bơto sồr jơnau ngăc ngar bè gàr niam ờ do ờ dă tàm gùng lòt mờ rơcang sơndră mờ kòp Kovid-19 tŭ lòt tàm gùng ai làng bol in; bơyai lơh dơ̆ lòt sền gròi, bơsong tìs mờ kơrnoăt boh lam bè ờ do ờ dă tàm gùng lòt bơh ngai 15 nhai 12 nam 2021 tus jơh ngai 14 nhai 02 nam 2022; bơ̆t bơtàu ală gùng dà pơn diang phan di tàm dơ̆ lik lơh broă di pal; sền gròi bơta niam ờ do ờ dă ală broă lơh gùng tàm gùng; mờ geh gùng dà ai mpồl lơh broă, phan lơh broă, phan lơh sơnơm, sơnơm sơm kòp mờ mhàm nàng gàr niam uă ngan tàm broă sơm cau gơtìp rềs àr gùng lòt in, tơmù ờ uă ngan hoàc huơr bè kòn bơnus tŭ gơtìp rềs àr tàm gùng lòt.

Cau mblàng Ndong Brawl