1. Lơh sa Việt Nam bơtàu tơnguh wơl mhar, gơ ơm tàm mpồl lơgar geh khà gơguh GDP jơnhua ngan rlau jơh

Sơrlèt gan uă kal ke tài bơh kòp Kovid-19 mờ ală tam gơl tàm dunia, Việt Nam neh lam lơh geh cồng nha, tơl làm jơnau kờñ, kơnòl broă ờ mìng tơrgùm tàm broă rơcang sơndră, gròi sền kòp bơtờp mờ gam chồl pràn bơtàu tơnguh wơl mờ bơtàu tơnguh lơh sa- mpồl bơtiàn, bơt bơtàu rài lơh sa lơh tờm is gơ jat bal mờ rơcang lài, jơh nùs mut gơ rờm bal dunia jrô ơnàng mờ geh cồng nha. Lơh sa dờng geh gàr kơ̆ kơljap, bơta roh giă priă geh gròi sền, ală bơta tàm pơn ring dờng bơh rài lơh sa dê geh gàr niam tàm bơta gơtìp uă kal ke.

Gơguh GDP nam 2022 kờp dŭ geh 8,02%, khà gơguh jơnhua ngan rlau jơh tàm tơngai bơh nam 2011 tus nam 2022. GDP kờp bal dùl nă cau nam 2022 jat giă tŭ do kờp dŭ geh 95 tơlak 600 rbô đông dùl nă cau, ndrờm mờ 4 rbô 110 dolar Mỹ, gơguh 393 dolar Mỹ pơndrờm mờ nam 2021. Sơñio khà giă ngui sa (CPI) gơguh 3,15% pơndrờm mờ nam 2021, lơh geh jơnau kờñ Quôk hội ai tơlik. Roh giă priă kờp bal nam 2022 gơguh 2,59% pơndrờm mờ nam 2021, lơyah rlau khà CPI kờp bal (gơguh 3,15%).

2. Uă broă dờng màng kơrhia ngan geh lơh nền geh bơta kwơ jŏ jòng gơwèt mờ bơta bơtàu tơnguh bơh dà lơgar dê

Pơrjum Dà lơgar 5 mờ Dà lơgar 6, khoă XIII neh lơh nền uă tơngume kwơmàng, bè: Pơlam gùng dà Rơndăp ù tiah jơh ală bơta kâp dà lơgar tơngai bơh nam 2021- 2030 mờ gùng dà tus nam 2050; Pơn jăt tai lơh pràn tam gơl bơh dà lơgar geh rài lơh sa ngui dùl bơnah măy mok, tus dà lơgar geh rài lơh sa ngui măy mok jơm lơm; Tam gơl pa gùng dà lam bồ bơh Đảng dê; Bơ̆t bơtàu mờ lơh sir Dà lơgar gơnoar adat boh lam Xã hội Củ nghĩa Việt Nam; Gùng dà broă lơh, adat boh lam bè ù tiah; Broă lơh broă sa sươn sre, cau lơh broă sa, ƀòn lơgar, lơh sa bal; Tơnguh uă bơta jak mpồl đảng viên tàm tŭ tơngai pa...

Ƀộ Cíñ trị ai lơh jăt 6 Kơrnoăt Kơnhoàl ù tiah bè bơtàu tơnguh lơh sa- mpồl bơtiàn, sền gàr niam sền gàr dà lơgar mờ lơngăp lơngai tus nam 2030, wèt sền tus nam 2045, lơh gơlik geh bơta ring bal uă bè bơta gĭt wă mờ lơh broă tàm jơh gùt Đảng, gùt làng bol mờ gùt ling klàng. Jăt tàm bơta hơ̆, Quôk hội, Cíñ phủ neh lơh gơs adat boh lam, lơh jăt loh làng gơ gơs ală broă lơh, rơndăp broă lơh, lơh nền loh làng mờ lam lơh tơn tàm rài kis geh ngan, pờ tơlik tŭ tơngai niam bơtàu tơnguh kơ̆ kơl jăp, tơl ală bơta bơh dà lơgar dê jơh bal tềng đăp măt mờ jŏ jòng.

3. Broă lơh bơt bơtàu, lơh niam wơl Đảng, rơcang sơndră sa kuề sa kuà, broă ờ niam ngai sơlơ kràñ cê

Nam 2022, broă lơh rơcang sơndră sa kuề sa kuà, broă ờ niam neh lơh geh cồng nha, pơgồp bal nền nòn mờ broă bơt bơtàu, lơh niam wơl Đảng, rơcang sơndră bơta gơbàn gơ plơ̆ gơ huc bè nùs nhơm cíñ trị, niam chài, rài kis.

Broă crơng gơs Mpồl đơng lam rơcang sơndră sa kuề sa kuà broă ờ niam tàm 63 càr, ƀòn dờng bơh sơn rờp lơh geh cồng nha. Broă lơh glài kwang bàng, đảng viên lơh tìs geh lơh git kơrhia, song dơpă, ring bal, di mờ jơnau cih bơh Đảng mờ adat boh lam bơh dà lơgar dê.

Ală anih lah yă neh yă, lùp khàu mờr 2 rbô 500 broă lơh tìs bè ală tìs sa kuề sa kuà, lơh sa, gơnoar broă, tàm hơ̆ geh uă tìs sa kuề sa kuà, broă ờ niam dờng ngan, kal ke ngan, bè: broă gơlik geh tàm Kụk lãñ sự (Ƀộ Ngoại giao); ală broă lơh tìs gơlik geh tàm Kông ty Việt Á, Tập đoàn FLC, Tân Hoàng Minh, Kông ty AIC, Tập đoàn Vạn Thịnh Phát…

Broă lơh rơcang sơndră sa kuề sa kuà, pơhì pơhà, broă ờ niam pơn jat tai pơgồp bơnah gàr kơ̆ kơljap bơta pin dờn bơh làng bol dê, kwang bàng, đảng viên dê tàm bơta đơng lam bồ bơh Đảng mờ rài atbồ dà lơgar.

4. Lam lơh dùl ròt ală broă lơh lơh broă mờ lơgar ndai tơnguh uă bơngă dà lơgar dê

Dơ̆ lòt còp ngan ngồn lơgar Lo bơh ngai 30/10 tus ngai 01/11 nam 2022 bơh Tổng Ƀí thư ồng Nguyễn Phú Trọng dê là broă dờng màng ngan, lơh geh cồng nha tơl ală bơta, pơgồp bơnah lơh pràn kơldang mờ bơtàu tơnguh bơta gĭt gơ̆p đah Việt Nam mờ Lo.

Bal mờ hơ̆ là ală dơ̆ lòt còp kâp Dà lơgar tus lơgar Hàn Quôk, Indonesia bơh Củ tịc lơgar ồng Nguyễn Xuân Phúc dê, dơ̆ lòt còp lơgar Mỹ, Hà Lan, Bỉ, Luxembourg bơh Thủ tướng Cíñ phủ ồng Phạm Minh Chính dê, dơ̆ lòt còp ală lơgar: Hungary, Anh, Australia, New Zealand, Philippines bơh Củ tịc Quôk hội ồng Vương Đình Huệ dê.

Việt Nam kung tus bal jơh nùs, geh kơnòl tàm ală dơ̆ pơrjum tàm kơnhoàl ù tiah do mờ dunia, bè: Asean, AIPA, APEC, Liên hợp quôk...Nam 2022 kung lơh tềl broă bơyai lơh geh cồng nha Nam Tam klăc Lơh bơyô bal Việt Nam mờ Lào, Việt Nam mờ Campuchia. Việt Nam pơn jăt tai đơs nền gùng dà lơh broă mờ lơgar ndai pờ ơnàng, crơng mòn mờ sền gàr tiah ơm kis ring lơngai, kơ̆ kơl jăp nàng bơtàu tơnguh dà lơgar, tơnguh uă gơnoar broă mờ bơngă bơh dà lơgar dê.

5. Việt Nam geh tơn pồ tàm Mpồl duh broă Gơnoar kòn bơnus Liên hợp quôk

Ngai 11/10/2022, Việt Nam neh dơ̆ 2 geh tơn pồ mut tàm Mpồl duh broă Gơnoar kòn bơnus Liên hợp quôk tơngai lơh broă bơh nam 2023 tus nam 2025, tàm pơrjum bơh pơrjum dờng Liên hợp quôk khoă 77 dê geh lơh tàm New York, lơgar Mỹ mờ khà sră pồ uă ngan.

Cồng nha tơn pồ là bơta cih dờp bơh mpồl bơtiàn dunia dê mờ ală jơnau hơ pơrgon mờ bơta lơh ngan pràn kơldang bơh Việt Nam dê bè sơlơ tơnguh mờ sền gàr gơnoar kòn bơnus.

Mờ kơnòl dờng màng tàm Mpồl duh broă Gơnoar kòn bơnus Liên hợp quôk, Việt Nam rơp geh tŭ niam nàng tă pơgồp tàm broă sơlơ tơnguh jơh ală gơnoar kòn bơnus dê jat bơnàng jă song dơpă, lơh broă bal mờ tìp mat tàm boh bơr, gàr niam ngai sơlơ niam rlau tai gơnoar bơh làng bol dê tàm jơh ală gah.

6. Bơyai lơh geh cồng nha Pơrlòng tàp pràn să jan tiah đah jum mat tơngai lik câu Á dơ̆ 31 (Sea Games 31)

Mờ jơnau đơs “Tài dùl Tiah đah jum mat tơngai lik câu Á pràn kơldang rlau”, Việt Nam neh bơyai lơh geh cồng nha Pơrlòng tàp pràn să jan tiah đah jum măt tơngai lik câu Á dơ̆ 31 (Sea Games 31) bơh ngai 12- 23/05/2022.

Bơh 14 ngai tàm pơrlòng, mpồl tàp pràn să jan lơgar tờm drơng lơh là Việt Nam pơrlòng geh 205 nơm gai lòng biàng, 125 nơm gai lòng trà mờ 116 nơm gai lòng lơngô. Việt Nam pơrlòng geh khà dùl jơh gùt mpồl bal mờ dùl ròt ală cồng nha lơh geh niam ngan, neh lơh geh dùl dơ̆ Sea Games ring bal, song dơ pă, tơngŏ nùs nhơm tàp pràn să jan niam ngan, nùs nhơm tam klăc bal bơh mpồl bơtiàn Asean dê.

Việt Nam neh lơh geh bơta kah wơl uă ngan bè dùl lơgar tàm mpồl Asean đềt mềr, mềr năc, wil tơl mờ neh bơtàu tơnguh sir jơh mờ gam bơtàu tơnguh pràn kơldang.

7. Drà kă bro priă bơcri, ù tiah, hìu đam… geh uă bơta tam gơl nisơna, pal jal mhar tă bơsong

Nam 2022 sền gŏ bơta tam gơl pràn kơldang ngan bơh ală drà kă bro dê bè ù tiah, hìu đam, trái phiếu mpồl lơh sa kă bro, cứng khoán, xăng zờu…

Drà kă bro cứng khoán gơguh, gơmù nisơna, gơguh jơnhua ngan tàm ală nhai bồ nam mờ gơmù sùm tàm ală nhai lồi nam. Tài gơ rềng bơh drà kă bro dunia dê, giă xăng zờu tàm lơgar gơguh jơnhua ngan, bal mờ hơ̆ là bơta ờ tơl anih tac lơh uă anih tac xăng zờu pal til mpồng halà mìng pờ mpồng nàng tac dùl êt lơm. Bơta do dùl bơnah tài bơta lơh ngan bơsong ală bơta ờ niam jŏ jòng bơh broă lơh tac bro dê tàm 2, 3 mpồl lơh sa kă bro dờng, ờ gam ai tơlik broă lam lơh lài ngan pal pơn jat tai bơsong dùl bă kràñ cê, bơsong jơh tàm nam 2023.

8. Jơnau ờ tơl sơnơm, phan ngui gah lơh sơnơm lơh gơlik bơta kal ke ai broă lơh kham sơm kòp in

Dùl ròt ală hìu sơnơm tàm jơh gùt lơgar gơ ơm tàm bơta ờ tơl sơnơm, dà sơnơm, phan bơna măy mok gah lơh sơnơm jŏ jòng tài bơh uă jơnau, tàm hơ̆ geh ală bơta gơkòl tàm ală sră nggal gơrềng tus blơi phan, tàm pơrlòng jòi cau blơi sơnơm, măy mok phan bơna gah lơh sơnơm gơlam tus broă wă wờng, broă lơh krơi is.

Jơnau do neh lơh gơrềng tus bơta niam kham, sơm kòp, gơrềng tus broă ring bal mờ sền gàr rài kis mpồl bơtiàn. Do là dùl jơnau ai lài sồr lơh bơsong bơh Cíñ phủ, Ƀộ Y tế mờ ală ƀộ, ngàñ geh gơrềng dê.

9. Bơt bơtàu ală bơta kuơ dà lơgar, ală bơta kuơ niam chài, ală bơta kuơ hìu bơnhă mờ tơl khà bơta niam kòn bơnus Việt Nam dê tàm tŭ tơngai pa

Sền wơl cồng nha 1 nam lơh jat Jơnau pơn dut bơh Tổng Ƀí thư ồng Nguyễn Phú Trọng dê tàm Pơrjum niam chài gùt lơgar lam lơh jat Nghị quyết pơrjum dờng dơ̆ 13 Đảng dê, ngai 29/11/2022, tàm Hà Nội geh lơh Pơrjum Khoa họk dà lơgar “Ală bơta kuơ dà lơgar, ală bơta kuơ niam chài, ală bơta kuơ hìu bơnhă mờ tơl khà bơta niam kòn bơnus Việt Nam dê tàm tŭ tơngai pa”; ngai 17/12 tàm Bắc Ninh geh lơh Pơrjum niam chài nam 2022 mờ tơngume “Mpồl lơh broă, broă lơh mờ priă jền ai bơtàu tơnguh niam chài in”.

Ală pơrjum do geh lơh tơnơ̆ 1 nam Pơrjum niam chài gùt lơgar ai gŏ broă lam lơh lài ngan bơh Đảng, dà lơgar mờ gùt mpồl bơtiàn dê tàm broă lơh ngan bơt bơtàu dùl rài niam chài Việt Nam gơguh jak, cèng bơta niam chài krơi is jơi bơtiàn dê nàng niam chài ngan ngồn là bơta pràn tàm dơlam is, là bơnàng jă nùs nhơm mờ là bơta pràn chul chồl bơtàu tơnguh bơh dà lơgar dê jat nùs nhơm Nghị quyết pơrjum dờng Đảng gùt lơgar dơ̆ 13.

10. Lơh pràn tam gơl sồ dà lơgar

Ngai 22/04/2022, Thủ tướng Cíñ phủ neh ai lơh jăt Kơrnoăt sồ 505 ai ngai 10/10 pah nam là Ngai Tam gơl sồ Dà lơgar.

Nam 2022 là nam sền gŏ ală cồng nha pơnrơ ngan tàm broă bơ̆t bơtàu Cíñ phủ sồ, lơh sa sồ, mpồl bơtiàn sồ mờ kă bro điện tử. Tam gơl sồ neh gơ gơs jơh gùt làng bol, tơl làm, mờ bơta tus bal jơh nùs bơh ală ƀộ, ngàñ, ƀòn lơgar dê.

Kơrnoăt Dà lơgar 6 neh ngan ngồn sền tam gơl sồ là dùl phan ngui bơtàu tơnguh pa geh bơta tam gơl pràn, dong lơh mhar, tơn rŭc lơyah ală tŭ tơngai tam gơl dà lơgar bơh rài lơh sa ngui dùl bơnah măy mok tus dà lơgar geh rài lơh sa ngui măy mok jơh lơm.