Tàm Nhai lơh broă tài kơnòm dềt nam do, ală ƀộ, gah lơh broă dà lơgar, ală càr, ƀòn dờng neh neh hòi jà tă geh rơlao 100 tơmàn đong priă dong kờl 1 tơlăk nă kơnòm dềt tàm gùt lơgar, mìng is Kes priă Dong kờl kơnòm dềt Việt Nam neh dong kờl ai 17 rơbô 800 nă kòn dềt geh rài kis gơtìp kal ke mờ kờp jơh khà rơlao 20 tơmàn đong.

Do là jơnau geh Ƀộ Lao động – Thương ƀiñ mờ Xã hội pà git tàm Pơrjum tơn jơh Nhai lơh broă tài kơnòm dềt nam 2023. Broă lơh do geh bơyai lơh tàm drim ngai òr (10/07), tàm Anih lơh pràn wơl să jan cau koĕt kơl te Thuỵ An, xã Thuỵ An, kơnhoàl Ba Vì, ƀòn dờng Hà Nội. Nhai lơh broă tài kơnòm dềt nam do geh lam sồr mờ tơngu me “Tus bal tơmù ờ uă ngan hoàc huơr aniai kơnòm dềt”. Tàm dơ̆ pơrjum tơn jơh, Thứ trưởng Ƀộ Lao động, Thương ƀiñ mờ Xã hội mò Nguyễn Thị Hà neh pà 100 pò phan mờ lòt còp anih lơh pràn wơl să jan, anih bơsram broă lơh, anih sào sa, ơm kơnòm dềt tàm Anih lơh pràn wơl să jan cau koĕt kơl te Thuỵ An, tàm xã Thuỵ An, kơnhoàl Ba Vì, ƀòn dờng Hà Nội.