VOV4.K’ho- Jăt Cơldŭ lơh broă sùm Mpồl đơng lam dà lơgar bè rơcăng sơndră trồ tiah lơh aniai dê yal, kờp tus 5 jiơ mho ngai 03/04, mìu dà tih tàm tiah tàm gùl lơgar neh lơh 2 nă cau chơ̆t, 1 nă cau roh thĭt mờ 5 nă cau gơtìp sồt să. Mùl màl, mìu dà tih lơh tơrlơm 2 nơm hìu; 50 nơm hìu gơtìp gơ pồ rơkàng; 262 nơm plung gơtìp gơ bŭ; pơgăp 2 rbô 600 nơm hìu gŭ ròng tam phan tàm dà gơtìp hoàc hươr; rlau 88 rbô lồ kòi mờ pơgăp 17 rbô lồ phan tam lơyah ngai gơtìp ngơr bam tàm dà mờ hoàc hươr.

Bơsong jơnau gơlời wơl bơh trồ tiah lơh aniai, ală tiah neh bơyai lơh yuh pơrdô dà, dà gơhoài soăt tus kàr lơi tơnhàu tus kàr hơ̆, tus ngai 03/04, ală càr: Quảng Ngãi, Bình Định, mờ Phú Yên neh tơnhàu rlau 23 rbô lồ kòi; neh hoài kuă geh 171 nơm ơhò plung. Cơldŭ lơh broă sùm Mpồl đơng lam dà lơgar bè rơcăng sơndră trồ tiah lơh aniai dê sồr ală tiah pơn jăt tai mhar bơsong hoàc hươr; dong kờl làng bol bè phan sa nàng ờ hìu bơnhă lơi gơtìp jơgloh. Hòi tơrgùm mpồl cau dong làng bol lơh sàng goh tiah ơm kis, lơh niam wơl hìu gơtìp gơ pồ rơkàng, ngơr bam jrô tàm dà, mhar bè ờs wơl rài kis làng bol in.

Cau mblàng Lơ Mu K’Yến