VOV4.K’ho- Mho ngai 30/5, geh bơta ring bal bơh Thủ tướng Cíñ phủ dê, Mpồl atbồ Gơlăng Củ tịc Hồ Chí Minh neh pơgồp bal mờ Đại sứ quán Việt Nam tàm lơgar Nga mờ Viện Kơlôi sơnơng jak chài phan lơh sơnơm mờ tiñ zờu lơgar Nga bơyai lơh Pơrjum tơn jơh 30 nam lơh broă bal tơn sền gàr jŏ jòng, sền gàr ờdo ờdă să jan ƀồc Củ tịc Hồ Chí Minh (1922- 2022).

Đơs tàm pơrjum, Thiếu tướng Bùi Hải Sơn, ala mat kwang atbồ Mpồl atbồ Gơlăng Củ tịc Hồ Chí Minh, kwang đơng lam bồ Mpồl ling sền gàr Gơlăng ƀồc pà git: măi mok sền gàr să jan ƀồc Củ tịc Hồ Chí Minh là măi mok kuơmàng ngan, là măi mok is bơh lơgar Nga dê. Bulah bè hơ̆ tŭ do, ală cau jak chài bơh lơgar Việt Nam dê neh gơtùi lơh tòm is tàm broă sền gàr să jan ƀồc Củ tịc Hồ Chí Minh, mơya kung ờ gơtùi ờ geh ală cau pơgru là ală cau jak chài bơh lơgar Nga dê. Việt Nam pơn jat tai kơlôi sơnơng, bơsong ală broă gơlik geh, lơh niam bè sră pơ àr mờ mờng chài ngan ngồn ai ală cau jak chài Việt Nam in, hời rơ hời mờ wèt tus lơh tờm is jơh tơn măi mok do.

Cau mblàng K’Duẩn