Lài mờ nam bơsram pa, nàng kờñ pơn jờng ală kơnòm bơsram jơi bơtiàn dồ êt nă cau lơh ngan bơsram sră, kơnhòal tiah kal ke Tu Mrông, càr Kon Tum neh bơyai lơh ai 40 nă kơnòm bơsram kòn cau Sơdàng geh cồng nha bơsram jak ngan nam bơsram 2023- 2024 mờ 4 nă pơgru bơto jak lòt Hà Nội yal cồng nha Wa Hồ in kung bè tus bal gùng lòt sền git bềng bơta kuơ. Tàm gùng lòt 5 ngai, bơh ngai 12 tus ngai 16/8/2024 lòt càr lơgar Hà Nội mut còp Gơlăng ƀồc Wa Hồ.

Mpồl geh 40 nă kơnòm bơsram kòn cau Sơdàng geh cồng nha bơsram jak ngan mờ 4 nă pơgru bơto jak bơh kơnhoàl Tu Mrông dê geh lòt còp uă tiah tềl kah yau: Tiah tềl kah yau sơnĕ pe Đồng Lộc, càr Hà Tĩnh; Tiah tềl kah yau tiah kir sơnrai Củ tịc Hồ Chí Minh tàm Kim Liên – Nam Đàn, càr Nghệ An. Tàm càr lơgar Hà Nội, Mpồl kơnòm bơsram jak kòn cau Sơdàng mut còp Gơlăng ƀồc Wa Hồ mờ còp Tiah tềl kah yau Hồ Chí Minh tàm Hìu lơh broă Củ tịc bal mờ bàr, pe tiah niam tiơng pơn rơ bơh càr lơgar dê.